गलाति 5 - बान्तावा राईफोङ्मा रात्तायुङ्सानुम 1 ख्रिस्तआ आन्कान म़फोङ्साओ। खोन्ओसा खानानिन नुलोक एवानिन, खोन्कि देम्खाछाङ हारुक्ओ कोम्दा मान्लानाप्दानिन्चिन। 2 एनानुम, अ़ङ्का पावल्आ खानानिन लोनाङ्नानिन, खानानिन सिप्मायाम्बुन त़मुन्चिन्नालो ख्रिस्तआ आम्नुओ निम्पाङ अ़मुवाओ काचि अ़काचि मात्द़ङ्ओ लि। 3 सिप्मायाम्बुन कामु झारा म़नाओ निम्पाङ अ़ङ्का लासुङ्खालुसुङ, झारा य़ङ्हुप मुमा मो राकाङ्थेत्नि लि। 4 खानानिन य़ङ्हुप्लाम्पा साम्योक्मि कान्मा त़लामिन्येन्ओचि, ख्रिस्तएदाङ्का खानानिन त़लोइसिन्खाइसिन्युङ्सिन्चिन। खोन्कि खानानिन निनाम्हाङ्ओ अ़चुसोम्तुक्मादाङ्का त़धान्खारिन्युङ्सिन। 5 मेन आन्कान्का सेङ्लावालाम्पा साकोङ्छ़ङ्दाङ्का निनाम्हाङ्आ आन्कान्का ऩहिप्तिन्काओ साम्योक्मि राक्एनान हुङुम्का। 6 ख्रिस्त येसुएदा सिप्मायाम्बुन पाक्तुम्नुछाङ अ़पाक्तिमिन्नुछाङ मो अ़च़वाङ य़ङ माआङ। मेन साकोङ्छ़ङ सोमातुक्मालाम्पा खाङ्मु। 7 खानानिन नुलोक त़लोरिन्येन्ओ, साङ्आ खानानिन अ़छ़ङ लोमाय़ङ मुमादाङ्का ऩछेक्तिन? 8 नुछयाङा निनाम्हाङ्आ ना माआङ, देकिनालो खोक्कोसाआङा छुम्माय़ङ्दाङ्का खानानिन ऩबुत्तिन्ओ। 9 अ़क्चिलोक खमिराआ झारा होन्माय़ङ्ओ बुत्थ़ झारा होम्सुलोइसु। 10 अ़ङ्का हाङ्पाएदा सोम्कुवा मुङाङा, खानानिन सोज्जेओ चिन्माय़ङ त़त़ङ्तिमिन। खानानिन दुखा काप़ साङ्आनुछाङ दन्दा आङ्मादोत। 11 ब़ब़, नाना खोन्कि निछाचि ओ, अ़ङ्का सिप्मायाम्बुन मुमादोत निकिना हान्छाङ खालुङाङाओ खाङ्देना अ़ङ्का यहुदिचिआ दुखा मान्प़ऩदाङ्ओ। मोवात्नि क्रुस्ओ अ़तुक्वादा खाअ़लुऩङ्ओ खाङ्दे ना अ़ङ्का फित्चि ऩमुऩङ्ओ। 12 खानानिन काफोम्चिआ ना अ़चुयाम्ङे अ़सिप्नुछाङ नुओ। 13 ब़ब़, नाना खोन्कि निछाचि ओ, खानानिन ना य़ङ्हुप्दाङ्का फोङ्माओ निम्पाङ ऩबुत्तिन्ओ। मेन ओ फोङ्माय़ङ पोक्ओ हेवामि च़माथाङ्मादा मान्याङ्दानुम। मेन सोम्तुक्मादा अ़क्छा निएदा खानानिन ब़त्काब़त मुवानिन। 14 देकिनालो झारा य़ङ्हुप अ़क्तात य़ङ्आङा तालायुङ्सा, “खाना आम्तेन्पाङ आप्पिवात्निङा सोमातुक्तु।” 15 मेन खानानिन अ़क्छाआ नि धेक्काधेक, ख़ङ्का-ख़ङ त़मुन्नालो ना चाप्तेत्तानिन्चिन, खानानिन अ़क्छा निएदाङ्काङा लुक्मा अ़दोत्निन्ने। सेङ्लावालाम्पा ह़ङ्म़ङ 16 मेन अ़ङ्का य़ङ्ङा, सेङ्लावालाम्पा कोलानिन, खोन्कि पोक्ओ हेवामि च़माथाङ्माओ मिन्माचि त़तासिन्लान्मिन्चिन। 17 हेवामि च़माथाङ्मा मिन्माचि सेङ्लावाओ अ़चुदेङ्सालाप्पादा म़मु, खोन्कि सेङ्लावाओ अ़चुमिन्मा हेवाओ अ़देङ्सालाप्पादा। खानानिन दे च़मा त़स़न्येन, मोचिएदाङ्का खानानिन छेक्मा निम्पाङ ओचि अ़क्तात निओ अ़चुदेङ्सालाप्पादा याक्चि। 18 मोवात्नि खानानिन सेङ्लावाआ ऩतित्तिन्ओनालो खानानिन य़ङ्हुप्ओ अ़पाङ्दा त़याइमिन। 19 पोक्ओ हेवामि च़माथाङ्माओ काचिचि छेङ्छेङ्छेङ्वा म़मुयाङ। मोचि ताङ्लान, पोप्मा, हात्मा, 20 सेम्पोक ब़क्मा, म़क्फेङ, ङेङ, खिमा, ऩङ्च़, च़ऱपा, आप्पि नुलोक कामित्नान्चिन, फेक्मा, रुहुप-रुहुप लिमा, 21 माइसुङ, सेत्चावा, ताकावा काच़ खोन्कि नि ओवाको य़ङ्चि ओवाको निचि ओचिओ अ़तुक्वादा अ़ङ्का खानानिन चाप्चेत्नानिन। खोन्कि बुयाछाङ चाप्चेत्नानिन्ओ। साङ्आ ओवाको काचिचि मुचि, निनाम्हाङ्ओ अ़चुहाङ्होन्ओ आसिखाओ पाङ्यि अ़लिनिन। 22 मेन सेङ्लावाओ अ़चुसिवा सोम्तुक्मा, मिन्माचानुमा, सेवाङ्नि, हुङ्मा, सोम्तुक्मा खाङ्मुमा, नुलोक मुमायु, सोम्कुवामुमायु, 23 सिम्मान्चिन, क़म्मान्चिन ओ। ओवाको य़ङ्चिओ अ़चुदेङ्सालाप्पादा य़ङ्हुप मात्द़ङ। 24 खोन्कि साङ्चि ख्रिस्त येसुओचि ओ, मोचिआ हेवामि च़माथाङ्मा मोसोओ अ़पोक मित्माचि खोन्कि अ़मिन्माचि क्रुस्दा अ़ख़न्तायुङ्सा। 25 आन्कान सेङ्लावालाम्पा ह़ङिन्नालो सेङ्लावाओ अ़चुतित्मावाङा कोलिन्ने। 26 आन्कान ऱक्भाक अ़मुन्मिन्ने। अ़क्छा निएदा माइसुङ खोन्कि ऩङ्च़ मेत्अ़मुन्मिन्ने। |
© Wycliffe Bible Translators, Inc. All rights reserved.
Wycliffe Bible Translators, Inc.