गलाति 3 - बान्तावा राईय़ङ्हुप्लाम्पा साम्योक्मि हे सोम्कुवालाम्पा? 1 खामान्सिन गलातिचि ओ! साङ्आ खानानिन ऩधान्तिन? आम्नुओ म़क्ओ अ़बुदाङा येसु ख्रिस्त क्रुस्दा म़ख़न्ताओ छेङ्छेङ्छेङ्वा खालुसाओ। 2 ओ ओन्ङा अ़ङ्का खानानिन सेन्मा स़ङाङा, खानानिन्आ सेङ्लावा य़ङ्हुप्ओ काचिलाम्पा त़तोक्तुम हे त़एनुम्ओ य़ङ्दा साकोङ्छ़ङ त़मुन कि? 3 दि खानानिन अ़न्नुनु खामान्सिन त़मुन्येन? सेङ्लावालाम्पा त़पुङ्सुम्कि दि आम्नुओ पोक्दा त़लुक्तुम्योम? 4 दि खानानिन्आ ओन ब़द्धे दुखा सोज्जेङा त़आङ्तुम? ओवात्नि ना देम्खाछाङ माआङ! 5 साङ्आ खानानिन सेङ्लावा ऩप़न, खोन्कि आम्नुओ रादा म़दोम्दाओ काचिचि म़मुचि, दि ओ झारा खोक्कोसाआ य़ङ्हुप्दाओ आम्नुओ काचिओ अ़तुक्वाआ अ़मुवा ओ? हे त़एनुम्ओ य़ङ्दा खानानिन्आ साकोङ्छ़ङ त़मुम्ओसा ओ? 6 मोवात्निङा अब्राहाम्आ “निनाम्हाङ साकोङ्छ़ङ मु, खोन्कि निनाम्हाङ्आ खो साम्योक्मि अ़काइसा।” 7 खोन्ओसा खानानिन्आ तुप्मादोत, साङ्चि साकोङ्छ़ङ म़मु, मोचिङा अब्राहाम्ओ अ़छाचि ओ। 8 निनाम्हाङ्आ निरावाचि साकोङ्छ़ङ्लाम्पाङा साम्योक्मि म़काइसुचिनि साम्कालिन्आ बुया खाकिना अब्राहाम “खानालाम्पाङा झारा रावाचिआ आसिखा अ़तोक” नि बुयाङा नुय़ङ्खान खाअ़एत्ता। 9 खोन्ओसा साकोङ्छ़ङ कामु म़नाचिआ साकोङ्छ़ङ कामु अब्राहाम्एनान अ़क्नि आसिखा अ़तोक। 10 य़ङ्हुप्दा सोम्कुवा कामु झारा माङ्म़हिम, देकिनालो साम्कालिन्दा ओवात्नि छाप्तायुङ्सा, “य़ङ्हुप छाप्लाखादा छाप्ताओ झारा य़ङ्चिदा मान्युङ्कादा खोन्कि मो मान्मुकादाचि झारा माङ्म़हिम।” 11 निनाम्हाङ्ओ अ़चुबुदा य़ङ्हुप्लाम्पा खाक्कोछाङ म़ना साम्योक्मि अ़कान्निन्ओ य़ङ छेङ्छेङ्छेङ्वा मुयाङ। देकिनालो “साम्योक्मि साकोङ्छ़ङ्लाम्पा ह़ङ।” 12 मेन य़ङ्हुप सोम्कुवाओ य़ङ माआङ, “खाक्को म़नाआ ओ काचिचि मुचि, खो मोचि लाम्पाङा ह़ङ।” 13 आन्को निम्पाङ माङ्हिम म़लिसाकि य़ङ्हुप्आ तारुओ माङ्हिम्दाङ्का ख्रिस्तआ आन्कान म़लेइसा, देकिनालो “स़ङ्दा क़ङ्माय़ङ झारा माङ्हिम लि”नि छाप्याङ। 14 खोक्कोसाआ आन्को आन्लुङ अ़छोराकि म़लेइसा, खोन्ओसा अब्राहाम प़माय़ङ आसिखा ख्रिस्त येसुलाम्पा निरावाचिएदा ताने, मोवात्नि आन्कान सोम्कुवालाम्पा हिप्माय़ङ्ओ सेङ्लावा तोक्मा ऱम्ने। य़ङ्हुप खोन्कि हिप्माय़ङ 15 ब़ब़, नाना खोन्कि निछाचि ओ, अ़लेन्खिन्तुम्ओ ह़ङ्म़ङ्दाङ्का अ़क्तात अ़मात्ऩङ खाङ्मेत्नानिन्ने। अ़क्दु अ़छ़ङ लिसाचिआओ म़नाओ हिप्माय़ङ्दा साङ्आछाङ क़प्मा अ़ऱन, ना मोदा अ़क्चित तेप्माङा ऱ। 16 निनाम्हाङ्आ अब्राहाम खोन्कि अ़छाओ निम्पाङ हिप्माय़ङ्चि म़प़चिओ। साम्कालिन्आ “आम्छाचि”नि अ़य़ङ्निन, ओसाआ ना ब़द्धे म़नाचि खाङ्मुसुचि, मेन साम्कालिन्आ “आम्छा”नि य़ङ, ओसाआ अ़क्छा म़ना ओन्ङा खाङ्मुसु, खोक्को ख्रिस्त ओ। 17 अ़ङ्य़ङ्माओ अ़तुप्माय़ङ ओङा ओ, निनाम्हाङ्आ अ़छ़ङ अ़मुवाओ हिप्माय़ङ चार सये तिस्कादोङ आदेङ्ओ य़ङ्हुप्आ अ़क़प्तुन, माङ्लोना हिप्माय़ङ सोज्जे लिसाओ। 18 देकिनालो पाङ्यि य़ङ्हुप त़ङ्तुम्कि तानालो हिप्माय़ङ्लाम्पा ओ देम्खाछाङ अ़तोक्तिमिन। मेन निनाम्हाङ्आ हिप्माय़ङ्लाम्पाङा अब्राहाम पाङ्यि अ़पुवा। 19 खोन्नालो य़ङ्हुप्ओ अ़मित्चिऩङ दि ओ? खाक्को छा अ़हिप्तायुङ्साओ, खोक्को मान्ताम़युक ओन म़नाचिआ हेवा अ़खाङ्ने निकिना म़तेप्तुप़चिओ। खोन्कि अ़क्छा कातुम्आ निनाम्हाङ काफाचिलाम्पा य़ङ्हुप अ़युङ्सा। 20 अ़क्छा कातुम्आ अ़क लिप्पा ओन्ङा अ़तित्तुन, मेन निनाम्हाङ्आ अब्राहाम कातुम मात्द़ङ्ङा अ़हिप्ता। य़ङ्हुप्ओ अ़मित्चिऩङ 21 खोन्नालो दि य़ङ्हुप निनाम्हाङ्ओ अ़चुहिप्माय़ङ्चिओ अ़देङ्सालाप्पा मुयाङ कि? देम्खाछाङ अ़मुनिनिन! अ़ह़ङ मुमा काऱ य़ङ्हुप म़पुवाओदे, साम्योक्मि अ़नुछ्याङा य़ङ्हुप्लाम्पा ताओ। 22 मेन साम्कालिन्आ खालुसु, झारा हेन्खामा हेवाआ क़म्तुयुङ्सु, खोन्ओसा खाक्को हिप्माय़ङ येसु ख्रिस्तएदा साकोङ्छ़ङ्लाम्पा प़माय़ङ्ओ, मो साकोङ्छ़ङ कामुचि म़प़ने। 23 मेन साकोङ्छ़ङ तामा बुया आन्कान य़ङ्हुप्ओ अ़क़म्मादा याइन्येन, खोन्कि साकोङ्छ़ङ खाङ्मान्मुयुक्तान्चिन्तारि आन्कान छेक्तिन्युङ्सिन। 24 साकोङ्छ़ङ्लाम्पा आन्कान साम्योक्मि कान्मान्चिन ऱन्ने निकिना य़ङ्हुप आन्कान कारात लिसाकि आन्कान ख्रिस्तएदातारि म़तित्ता। 25 मेन हान साकोङ्छ़ङ ताओसा हान्दाङ्का आन्कान य़ङ्हुप्ओ पाङ्दा अ़याइमिन्येन। निनाम्हाङ्ओ अ़चुछाचि 26 देकिनालो साकोङ्छ़ङ्लाम्पा खानानिन झारा येसु ख्रिस्तएदा निनाम्हाङ्ओ अ़चुछाचि ओ। 27 देकिनालो खानानिन्एदाओ देम्पाङ्साआ ख्रिस्तदा बप्तिस्मा त़लोउम, खानानिन झारासाआ अ़ऩङ्वा तित त़हुम्सिन्येन्वा ख्रिस्तवाको त़लिसिन्युङ्सिन। 28 खोन्ओसा हान ना यहुदि ना ग्रिक, ना हारुक ना लेत्वा, ना दुवाछा ना मेत्छाछा निकिना अ़फेक्निन, देकिनालो ख्रिस्त येसुएदा खानानिन झारा अ़क्तात्ङा ओ। 29 मोवात्नि खानानिन ख्रिस्तदाओनालो ना, खानानिन अब्राहाम्ओ अ़छाचि ओ, खोन्कि हिप्माय़ङ्वा पाङ कातोक्चिओ। |
© Wycliffe Bible Translators, Inc. All rights reserved.
Wycliffe Bible Translators, Inc.