गलाति 2 - बान्तावा राईछाम्माय़ङ्चिआ पावल साऩङ्वा अ़मेत्ताओ 1 चौधकादोङ्कि बारनाबास्एनान यरुसलेम खाराच्या। तितस्छाङ अ़ङ्का अ़क्नि खात्तुङ। 2 निनाम्हाङ्आ खाङ्ऩमेत्ताङ्वा अ़ङ्का मोदा खाराङ, खोन्कि मोचिओ अ़चुबुदा मो नुय़ङ्खान खालुसुङ, मो अ़ङ्का निरावाचिओ अ़चुरादा खाएत्तुङ्युङ्सुङ्योङ्च़ङ्ओ। मेन साम्भुङ्दाओ बुसुवावाको म़काराङाओचिओ अ़चुबुदा अ़ङ्का मो सुकुलादा खालुसुङ, देकिनालो अ़ङ्का खाक्को लोत्मा लोराङ माङ्लो लोत्ङाङा, मो सोज्जे अ़लिनिन्ने। 3 मेन अ़ङ्काएनान अ़क्नि कायुङ तितस ग्रिक्नुछाङ सिप्मायाम्बुन लिमादोत निकिना साङ्आछाङ राकाङ्थेत्नि मान्मुअ़दा। 4 देम्कापाङ सोज्जेओ साकोङ्छ़ङ कामुचिएदाङ्का सिप्मायाम्बुन्ओ अ़तुक्वादा खा-खाक्कोचिआ ओ य़ङ अ़लोइसा। मोचि आन्रुहुप्दा मान्सिन्माङ म़वाङाकि आन्कान हारुक मुमा निम्पाङ ख्रिस्तएदाओ आन्फोङ्माय़ङ्दा म़सुक्ताखा। 5 नुय़ङ्खान्ओ अ़छ़ङ आम्नुओ निम्पाङ रात्युङ्ने निकिना मोचिओ अ़चुबुदा आन्कान्का अ़क्दुछाङ मान्काङ्दान्का। 6 खा-खाक्को अ़चुऩङ्ऱङाओ तोक्पो बुसुवाचिनि म़लोवाङाओ म़नाचि म़युङाङानुछाङ ओसाआ अ़ङ्का देत्छाङ अ़सिन्ऩङ। निनाम्हाङ्आ म़नाओ अ़ङाइवा अ़खाङ्कि छ़ङ ऩछेन्निन। अ़ङ्का य़ङ्ङा, मोचिआ अ़ङ्य़ङ्खान्दा दित्छाङ मान्तेप्अ़दा। 7 मेन च़लोक देङ्सा, देत्नि सिप्मायाम्बुन कापाक्चि नुय़ङ्खान खाएत्मा पाङ निनाम्हाङ्आ पत्रुस अ़पुवायुङ्साओ, मोवात्नि सिप्मायाम्बुन मान्पाक्कादाचि नुय़ङ्खान खालुमा पाङ अ़ङ्का निनाम्हाङ्आ ऩपुवाङ्युङ्साङ्नि मोचिआ अ़खा। 8 देकिनालो देत्नि निनाम्हाङ पत्रुस्ओ अ़छाम्माय़ङ अ़काचिदा यहुदिचिओ अ़चुरादा काचि म़मुवा, मोवात्निङा अ़ङ्छाम्माय़ङ काचिदाछाङ निरावाचिओ अ़चुरादा निनाम्हाङ काचि म़मुवा। 9 साम्भुङ्दाओ सायाकातोक खाबोचिनि मित्माय़ङ्चि याकुब, केफास खोन्कि युहन्ना, म़मित्तुचिकिना मोचिआ अ़ङ्का प़माय़ङ अ़च़वाङ काचि अ़सिन्ताकि अ़ङ्का खोन्कि बारनाबास यावायोक्ओ चुप्ताङ्छुक ऩपुवाच्या। ओवात्नि आन्काच्या निरावाचिएदा खात्मा खोन्कि खोचि यहुदिचिएदा खात्मा म़काङ्सा। 10 खोचिओ अ़चुय़ङ्मा “मान्तोक्कादाचि मित्मायुङ्माचिदोत”नि ओन्ङा ओ। मो मुमा अ़ङ्कोछाङ अ़ङ्राक याआङा। पावल्आ पत्रुस यासान्तुओ 11 मेन अ़क लेन केफास एन्तिओखियादा ता, खोन्कि अ़ङ्का खोसोओ अ़बुदाङा रुफोक्तुङ, देकिनालो खोसाआ काचि फिसुयुङ्सु। 12 याकुब्आ खाइसुचिओ म़नाचि तामा बुया खो निरावाचिएनान अ़क्नि चाङा। मेन मोचि म़तालाकि निरावाचिएनान चामा छिरु खोन्कि खो आप्पि हासान्चिन, देकिनालो खो सिप्मायाम्बुन पाक्माय़ङ रुहुप्दाङ्का अ़क़माकारा। 13 खोन्कि नि यहुदिचिछाङ खोसोओ अ़कोङ्क़त्वादा म़वाङा। खोन्ओसा मोचिओ अ़चुकोङ्क़त्वाआ बारनाबास्छाङ धा। 14 मोदा नुय़ङ्खान्ओ अ़छ़ङ्वा मोचि मान्च़याङ्चिओ अ़ङ्का खाङ्च़ङ, खोन्किना मोचि झारासोओ अ़चुबुदा अ़ङ्का केफास लोङ, “खानानिन अ़क्छा यहुदि त़लिसिन खोन्नुछाङ निरावावात्नि त़च़न्येन, देत्नि निरावाचि यहुदिचिवात्नि ह़ङ्मा राकाङ्थेत्नि त़मुम्च़म?” 15 आन्कान लिसिन्हिदाङा मोसाओ अ़य़ङ्हुप कातोक यहुदिचि ओ, खोन्ओसा आन्कान निरावाचिवाको हेवामिचि माआङ। 16 खोन्नुछाङ आन्कान सिन्तुम्योम, य़ङ्हुप्ओ काचिलाम्पा म़ना साम्योक्मि अ़कान्निन, मेन येसु ख्रिस्तएदाओ साकोङ्छ़ङ्लाम्पा साम्योक्मि कान। खोन्ओसा आन्कान्छाङ आन्साकोङ्छ़ङ ख्रिस्त येसुएदा युङ्सुम, मोवात्नि आन्कान य़ङ्हुप्ओ काचिलाम्पा माआङ, मेन येसु ख्रिस्तएदाओ साकोङ्छ़ङ्लाम्पा साम्योक्मि कान्मा ऱन्चिन्ने। देकिनालो य़ङ्हुप्ओ काचिलाम्पा साङ्छाङ साम्योक्मि अ़कान्निन। 17 मेन ख्रिस्तएदा आन्कान यहुदि म़नाचिआ साम्योक्मि कान्मान्चिन लामिन्येन्हिदा आन्कान आप्पि हेवामिनि म़मित्नालो ख्रिस्तआ आन्कान हेवा मुमादात्नि म़तित्ताओ कि? देम्खाछाङ माआङ! 18 मेन अ़ङ्का छिरुङ्ओ य़ङ अ़ङ्का लासुङ त़ङ्तुङ्नालो अ़ङ्का आप्पिङा हेवामिओनि खाङ्मुसुङ। 19 निनाम्हाङ्ओ निम्पाङ अ़ङ्का ह़ङ्मा ऱङाने निकिना य़ङ्हुप्ओ अ़तुक्वादा, अ़ङ्का य़ङ्हुप छिरुङ्चिउङ। 20 अ़ङ्का ख्रिस्तएनान क्रुस्दा ख़न्ताङ्युङ्साङ। हान्दाङ्का काह़ङ अ़ङ्का माआङ, मेन ख्रिस्त अ़ङ्काएदा म़ह़ङ। ओन्ग़रि अ़ङ्का पोक्दा ह़ङ्ङाङा, मो ह़ङ्म़ङ निनाम्हाङ्ओ अ़चुछाएदा सोम्कुवालाम्पा ह़ङ्ङा। खोक्कोसाआ अ़ङ्का सोमाऩतुक्ताङ खोन्कि अ़ङ्को निम्पाङ खोक्को आप्पि म़पुवान्लावान्चिन। 21 निनाम्हाङ्ओ अ़चुसोम्तुक्मा अ़ङ्का सोज्जेनि अ़मित्ऩङ, देकिनालो य़ङ्हुप्लाम्पा साम्योक्मि कान्ओदेना ख्रिस्त सोज्जेङा म़सुवा। |
© Wycliffe Bible Translators, Inc. All rights reserved.
Wycliffe Bible Translators, Inc.