एफिसि 6 - बान्तावा राईछाचि खोन्कि अ़चुमापाचि 1 छाचि ओ, हाङ्पाएदा आम्नुओ मामा-पापाचिआ ऩलोन्ओ य़ङ्दा काङ्सानिन, देकिनालो ओ अ़नुवाक य़ङ ओ। 2 “आम्नुओ पापा खोन्कि मामाचि साया मेत्तानुम्च़म।” (मो हिप्माय़ङ्एनान्ओ बुयाओ लोमाय़ङ ओ), 3 खोन्ओसा “खानानिन नुलोक लिसानिन, खोन्कि हेन्खामादा खानानिन ब़द्धे ह़ङानिन।” 4 खोन्कि पापाचि ओ, आम्नुओ छाचिओ अ़चुमाइसुङ मान्कान्दानुम्च़म, मेन मोचि हाङ्पाओ यायोक्दा खोन्कि चिन्मादा पोइसानुम्च़म। हारुक्चि खोन्कि हाङ्पाचि 5 हारुक्चि ओ, साऩङ्वा खोन्कि क़माएनान अ़नुवाक साकोङ्वाआ ख्रिस्तओ अ़चुलोमाय़ङ्दा त़काङ्सिन्येन्वात्नि, ओ हेन्खामादाओ आम्नुओ हाङ्पाचिआ ऩलोन्ओवात्नि चुवानिन। 6 म़नाचिओ अ़चुऩङाकानुचिवात्नि म़क्साम्दा ओन्ङा खाङ्मुमा काचि मान्मुदानिन, मेन ख्रिस्तओ अ़हारुक्चिवात्नि झारा आम्नुओ साकोङ्वाआ निनाम्हाङ्ओ अ़चुमिन्मावा चुवानिन। 7 म़नाचिओ निम्पाङ माआङ, मेन हाङ्पाओवात्नि अ़नुवाक मिन्माआ काचि मुवानिन। 8 ओ सिन्तानुम, मो हारुक्ने माङ्लो लेत्वाङाने, झारा साङ अ़नुवाक काचि मु, हाङ्पाआ मोवात्निङा खो सिरिफा अ़प़। 9 खोन्कि हाङ्पाचि ओ, आम्नुओ हारुक्चिएनान मोवात्निङा चुवानिन, खोन्कि दुङ्तिम मुमा छिरानुम, देकिनालो खानानिन त़सिन्तुम्योम, ह़वाङ्माङ्ओ आम्नुओ हाङ्पा निनाम्मादु म़युङ्याङ, खोन्कि खोक्को लिप्पा ऩवाङ्निन। निनाम्हाङ्ओ अ़चुबान्छुबिछु 10 हान, हाङ्पा खोन्कि खोक्कोसोओ अ़चुसावाओ ऱमादा काछो लिसानिन। 11 सैतानाओ अ़मित्चिऩङ्ओ अ़देङ्सालाप्पादा पुक्मालोन्मा ऱमा निम्पाङ निनाम्हाङ्ओ झारा अ़चुबान्छुबिछुचि बित्तानुम्च़म। 12 देकिनालो आन्ङेन पोक खोन्कि ह़ओ अ़देङ्सालाप्पादा माआङ, मेन अ़तोक्पोचिओ अ़चुदेङ्सालाप्पादा, सावाचिओ अ़चुदेङ्सालाप्पादा, आइमित्ओ कुइयामा हेन्खामादाओ हाङ्काचि कामुचिओ अ़चुदेङ्सालाप्पा खोन्कि निनाम्मादुओ युङ्खाचिदाओ अ़अ़त्पा लावामि सावाचिओ अ़चुदेङ्सालाप्पादा ओ। 13 खोन्ओसा निनाम्हाङ्ओ झारा अ़चुबान्छुबिछु बित्तानुम्च़म। मोवात्नि अ़अ़त्पा लेन तेम्मा रुवानुम, खोन्कि झारा काचि मुवानुम्कि पुक्मालोन्मा रुवानिन। 14 खोन्ओसा आम्नुओ छुमाय़क अ़छ़ङ्आ छुम्सानुम, खोन्कि साम्योक्मिओ कोङ्कोम रात्खा वारानुम्कि पुवालोन्तानिन। 15 खोन्कि आम्नुओ लाङ्दा सेवाङ्निओ नुय़ङ्खान्ओ लाङ्सुप्वात्नि वारानुम्कि चुम्सानिन्चिन। 16 मोन्ओङा माआङ, साकोङ्छ़ङ्ओ बान्छेक्खा क़क्तानुम, मोलाम्पा खानानिन सैतानाओ म़लेत्याङ्ओ अ़भेचि सेत्मा त़ऱम्च़म। 17 लेन्माओ ताङ्बोप्खा बोम्सानिन, खोन्कि सेङ्लावाओ बान्छोन क़क्तानुम, मो निनाम्हाङ्ओ अ़चुय़ङ ओ। 18 अ़धुन यामात्मा खोन्कि निनाम्हाङ्एदा फालुयाङ्सा सेङ्लावादा यामारानिन। ओ मित्चिऩङ्ओ निम्पाङ, चाप्चाप्चाप्वा युङानिन, खोन्कि झारा निनाम्हाङ्ओ अ़चुम़नाचिओ निम्पाङ यामारायुङ्सानिन। 19 अ़ङ्को निम्पाङ्छाङ यामात्निप़नि, खोन्कि खाउग़रि अ़ङ्का चेप्मा चुम्ङान्च़ङ मोन्ग़रि अ़ङ्का य़ङ्चि ऩप़ङाने, खोन्कि अ़ङ्का राक्एनान नुय़ङ्खान्ओ अ़कोङ्दुम खालुमा ऱङ्ने। 20 देकिनालो ओसोओ निम्पाङ अ़ङ्का चोक्माय़आ छुम्माय़ङ अ़क्छा हाङ्य़ङ्काखुन ओ, खोन्कि अ़ङ्का देत्नि चेप्मादोत ओ, मोवात्नि अ़ङ्का मो राक्एनान चेप्मा ऱङाने। देङ्दाओ सेवा 21 अ़ङ्का दियाको मुङाङा खोन्कि दे च़ङाङा, मो खानानिन्आछाङ त़सिन्तुम्ने निकिना सोमातुक्तुङ्योङ्ओ निछा खोन्कि हाङ्पाएदा सोम्कुवा मुमा खान्तुओ हाङ्पाओ काचि कामु तुखिकस्आ झारा य़ङ्चि खानानिन खात़एत्तिन। 22 आन्काओ तुक्वादा खानानिन्आ सिन्मा त़ऱम्ने, खोन्कि खोसाआ आम्नुओ साकोङ्वाचिदा राक त़प़न्नेनिओ मिन्माआ अ़ङ्का खो खानानिन्एदा बाइसुङ्ओ। 23 निनाम्हाङ आन्पापा खोन्कि हाङ्पा येसु ख्रिस्तदाङ्का ब़ब़, नाना खोन्कि निछाचिओ सेवाङ्नि, खोन्कि साकोङ्छ़ङ्एनान्ओ सोम्तुक्मा युङ्ने! 24 आन्हाङ्पा येसु ख्रिस्त अ़धुन अ़लुक्निन्लो सोमाकातुक्चि झाराएदा सोमातुक्मा युङ्ने। |
© Wycliffe Bible Translators, Inc. All rights reserved.
Wycliffe Bible Translators, Inc.