एफिसि 5 - बान्तावा राईसाम्दा ह़ङ्मा 1 खानानिन सोम्तुक्माय़ङ निनाम्हाङ्ओ अ़चुछाचि त़लिसिन्ओसा निनाम्हाङ म़च़याङ्वा चुवानिन। 2 देत्नि ख्रिस्तआ आन्कान सोमाम़तुक्ता खोन्कि निनाम्हाङ्ओ निम्पाङ नाम्नुयाङ्ओ छुक्दाम खोन्कि हेन्खोक्वावात्नि म़लिसाकि खोक्को आप्पि आन्को निम्पाङ म़सुवा, मोवात्नि खानानिन्छाङ सोमातुक मुवानिन। 3 मेन आम्नुओ रादा पोप्मुमा खोन्कि झाराकाखालाओ अ़सेङ्निनिन्ओ माङ्लो च़ख़य़ओ अ़ऩङ्छाङ अ़बुत्निन्ने। मो निनाम्हाङ्ओ अ़चुम़नाचिएदा लिमा अ़खान्तुन। 4 खाक्कोछाङ चिप्माकात्तुओ य़ङ, खामान्सिन चेप्मा माङ्लो सोज्जेओ चुत्माय़ङ अ़मुन्मिन्ने। ओ य़ङ्चिआ खानानिन त़खान्तिमिन, मेन खानानिन्आ निनाम्हाङ आलाङ प़मादोत। 5 देकिनालो खानानिन्आ ओ अ़नुछ्या सिन्तानुम, खाक्कोछाङ ताङ्लान कामु खोन्कि अ़सेङ्निनिन्ओ म़ना माङ्लो च़क्ख़य़ कामु म़ना (मो अ़क्छा सेम्पोक काब़क ओ), ख्रिस्तओ खोन्कि निनाम्हाङ्ओ अ़चुहाङ्होन्दा देम्खाछाङ पाङ्यि अ़तोक्तुन। 6 साङ्आछाङ खानानिन सोज्जेओ य़ङ्आ ऩधान्तिमिन्ने, देकिनालो मो य़ङ्ओ अ़तुक्वाआ लोमान्तेत्चिएदा निनाम्हाङ्ओ अ़चुच़ऱपा छुक। 7 खोन्ओसा मोचिएनान मान्होन्दानिन्चिन। 8 देकिनालो अ़क्दु खानानिन कुइयामादा त़युङिन्येन्ओ, मेन हान हाङ्पाएदा खानानिन त़उसिन्युङ्सिन। खोन्ओसा साम्ओ अ़छाचिवात्नि कोलानिन। 9 देकिनालो झारा अ़नुवाक य़ङ, साम्योक्मि खोन्कि अ़छ़ङ्दा साम्ओ अ़सिवा तोक्तुम। 10 खोन्कि हाङ्पा दिसाआ अ़चुऩङानु, मो चिन्मान्चिन लामानिन। 11 कुइयामादाओ अ़अ़त्पा काचिचिदा मान्वाङ्दानिन, मेन मोचि खाङ्मेत्तानुम्च़म। 12 देकिनालो मोचिआ कुम्याङ्सा अ़मुवाओ य़ङ्चिओ अ़तुक्वादा य़ङ्माछाङ लेजो ओ। 13 मेन साम्लाम्पा खाङ्मुमाय़ङ झारा नुलोक दात। 14 खाक्को य़ङ नुलोक दात, मोङा साम ओ। खोन्ओसा साम्कालिन ओवात्नि य़ङ्याङ: “दुखुप्दा त़छुक्ता ओ, थिन्ता। खोन्कि त़सुवादाओदाङ्का पुवालोन्ता, खोन्कि ख्रिस्तआ खाना साम ऩप़।” 15 खोन्ओसा देत्नि त़कोलिन, नुलोक मिन्मा पाक्तानुम्कि खानुम। अ़खारु मात्द़ङ्ओ म़नावात्नि माआङ, मेन खारुकातोक्वात्नि चुवानिन। 16 खोन्कि झारा अ़वाखाम्चि नुलोक याङानुम्च़म, देकिनालो लेन्चि अ़अ़त्पा म़मुयाङ। 17 खोन्ओसा खामान्सिन मान्लिदानिन, मेन हाङ्पाओ अ़चुमिन्मा दि ओ, मो तुप्मा लामानिन। 18 अङ्गुरा माङ्वाआ त़सेरिमिन्ने, देकिनालो मोसाआ खानानिन त़लुक्तिन, मेन सेङ्लावाआ भेप्तानिन। 19 अ़क्छा निएदा चोन्मा छाम, साम्ऱङ, खोन्कि लावामि छाम लुवानिन। खोन्कि आम्नुओ झारा साकोङ्वाचिआ हाङ्पाओ अ़चुसाम्ऱङ लुयाङ्सा चोन्तानुम। 20 अ़धुन झारा य़ङ्चिओ निम्पाङ आन्हाङ्पा येसु ख्रिस्तओ अ़चुऩङ्दा निनाम्हाङ पापा आलाङ पुवानुम। 21 ख्रिस्तओ अ़चुसाऩङ्वादा अ़क्छा निओ अ़पाङ्दा युङानिन। खिम्हाङ्पा खोन्कि खिम्हाङ्मा 22 खिम्हाङ्माचि ओ, हाङ्पाओ अ़चुक़म्मादा त़युङिन्येन्वात्नि आ-आप्पिओ आम्नुओ खिम्हाङ्पाचिओ अ़चुक़म्मादा युङानिन। 23 देत्नि ख्रिस्त साम्भुङ्ओ अ़मुलो म़युङ्याङ, मोवात्नि खिम्हाङ्पा खिम्हाङ्माओ अ़मुलो ओ। मो साम्भुङ खोक्कोसोओ अ़चुपोक ओ, खोन्कि खोक्कोङा मोसोओ अ़कालेन्पा ओ। 24 देत्नि साम्भुङ ख्रिस्तओ अ़चुपाङ्दा युङ्याङ, मोवात्निङा खिम्हाङ्माचिछाङ झारा य़ङ्चिदा अ़चुखिम्हाङ्पाचिओ अ़चुक़म्मादा म़युङ्ने। 25 खिम्हाङ्पाचि ओ, देत्नि ख्रिस्तआ साम्भुङ सोमाअ़तुक्ता खोन्कि मोसोओ निम्पाङ खोक्को आप्पि म़सुवा, मोवात्नि खानानिन्छाङ आम्नुओ खिम्हाङ्माचि सोमातुक्तानुम्च़म। 26 खोक्कोसाआ साम्भुङ अ़च़क़ल़क मुमा निम्पाङ चाक्वाआ वाअ़स़कि निनाम्हाङ्य़ङ्लाम्पा सेङ्मा अ़ऱने, 27 खोन्कि खोक्कोसाआ थुपि मात्द़ङ्ओ खोन्कि मान्चुन्युक्तुओ माङ्लो दियाकोछाङ मान्फिकादा साम्स़रिओ साम्भुङ खोक्कोसाआ आप्पि खाङ्मुमा निम्पाङ ओ, खोन्किना मो सेङ्याङ्ओ खोन्कि थुपि मात्द़ङ्ओ लिने। 28 मोवात्निङा खिम्हाङ्पाचिआछाङ अ़चुखिम्हाङ्माचि खोचिओ आप्पि अ़चुपोक्वाङा सोमातुक्माचिदोत। खोन्कि अ़चुखिम्हाङ्माचि सोमा कातुक्चिआ खोचि आप्पि सोमाम़तुक्नान्चिन। 29 देकिनालो खाक्कोछाङ म़नाआ देम्खाछाङ आप्पि अ़पोक अ़चिप्मा अ़कात्तुन, मेन मोसाआ चामायु प़, खोन्कि मो खा खोन्कि मोवात्निङा ख्रिस्तआछाङ अ़चुसाम्भुङ्ओ निम्पाङ अ़मु। 30 देकिनालो आन्कान खोक्कोसोओ अ़चुपोक्ओ अ़चुफुत्चि ओ। 31 साम्कालिन्दा ओवात्नि छाप्याङ, “खोन्ओसा दुवाछाआ अ़पा खोन्कि अ़मा छिरुदाचिकि अ़खिम्हाङ्माएनान युङ। खोन्किना मो ह़वाङ्माङ अ़क पोक लिचि” 32 ओ तोक्पो अ़कोङ्दुम य़ङ ओ। खोन्कि ओ य़ङ अ़ङ्का ख्रिस्त खोन्कि साम्भुङ्ओ अ़तुक्वादा चेप्ङा। 33 देत्निनुछाङ खानानिन झारासाआ आम्नुओ खिम्हाङ्माचि खानानिन्वात्निङा सोमातुक्माचिदोत, खोन्कि खिम्हाङ्माचिआछाङ अ़चुखिम्हाङ्पाचि साया मेत्माचिदोत। |
© Wycliffe Bible Translators, Inc. All rights reserved.
Wycliffe Bible Translators, Inc.