एफिसि 3 - बान्तावा राईनिरावाचिओ निम्पाङ पावल्ओ अ़काचि 1 ओसोओ अ़तुक्वादा, अ़ङ्का पावल, खानानिन निरावाचिओ लिप्पादा ख्रिस्त येसुओ निम्पाङ छेक्माय़ङ्ओ। 2 आम्नुओ निम्पाङ अ़ङ्का ऩपुवाङ्ओ निनाम्हाङ्ओ अ़चुसोमातुक्माओ काचिओ अ़तुक्वादा खानानिन्आ अ़नुछ्याङा त़एनुम्युङ्सुम्नि मिन्ङाङा। 3 निनाम्हाङ्आ अ़ङ्का मो अ़कोङ्दुम सिन्ऩमेत्ताङ्ओ। ओसोओ अ़तुक्वादा अ़ङ्का खानानिन बुयाङा थुत्मेत्लो छाप्नानिन्ओ। 4 खानानिन्आ ओ त़खिप्तुम्कि ख्रिस्तओ अ़चुकोङ्दुम्ओ अ़तुक्वादा अ़ङ्का तुप्तुङ्ओ अ़तुक्वा सिन्मा त़ऱम। 5 मो य़ङ खोक्कोसोओ म़सेङ्याङ्ओ छाम्माय़ङ्चि खोन्कि निनाम्हाङ्य़ङ खाकालुचि सेङ्लावालाम्पा आइमित खाङ्अ़मुसायुङ्सा, मो बुयाओ दुङ्चिदाओ म़नाचि सिन्मान्मेत्चि। 6 निनाम्हाङ्ओ अ़चुमित्चिऩङ ओङा ओ, नुय़ङ्खान्लाम्पा निरावाचि अ़क्नि यहुदिचिएनान पाङ्यि कातोक्चि ओ, अ़क्तात पोक्ओ पोक्फुत्चि ओ, खोन्कि ख्रिस्त येसुदाओ हिप्माय़ङ अ़क्नि कातोक्चि ओ। 7 खोक्कोसोओ अ़चुसावाओ काचिवा अ़ङ्का प़माय़ङ निनाम्हाङ्ओ मो सोमातुक्माओ छुक्तुप्मावा ओ नुय़ङ्खान्ओ अ़ङ्का अ़क्छा अ़हारुक लिसाङ। 8 झारा निनाम्हाङ्ओ अ़चुम़नाचिएदा अ़ङ्का अ़न्नुनु अ़चुप्पा लिसाङ्नुछाङ ख्रिस्तओ तुप्माङा अ़ऱन्मिन्ओ अ़चुआसिखाओ नुय़ङ्खान निरावाचि खाएत्मा निम्पाङ अ़ङ्का ओ अ़वाखाम ऩपुवाङ्ओ। 9 झारा य़ङ्चि कामुन्पा निनाम्हाङ्एदा जुगा-जुगायुङ्का कुम्माय़ङ अ़कोङ्दुम्ओ अ़मित्चिऩङ दि ओ, मो झारा म़नाचि खाएत्माओ सोमातुक्मा अ़ङ्का ऩपुवाङ। 10 खोन्कि खोक्कोसोओ अ़चुमित्चिऩङ साम्भुङ्लाम्पा निनाम्हाङ्ओ ब़द्धेकाखालाओ ताया निनाम्मादुओ युङ्खाचिदा हाङ्काचि कामुचि खोन्कि पाङ्कातोक्चिओ अ़चुरादा खाङ्मुमा दोराङा। 11 ओ येसु ख्रिस्त आन्हाङ्पाएदा खोक्कोसाआ अ़तासालाओ अ़धुन्ओ अ़चुमित्चिऩङ्वा मुवाङा। 12 खोक्कोएदा मुम्ओ आन्साकोङ्छ़ङ्लाम्पा राक खोन्कि सोम्कुवादा आन्कान निनाम्हाङ्एदा खात्मा तोक्तुम। 13 खोन्ओसा अ़ङ्का खानानिन लोनाङ्नानिन, आम्नुओ निम्पाङ अ़ङ्का आङ्तुङ्योङ्ओ अ़चाअ़त्मादा आम्नुओ राक अ़स़निन्ने। ओ ना आम्नुओ साऩङ्वा ओ। एफिसिचिओ निम्पाङ यामात्मा 14 खोन्ओसा अ़ङ्का निनाम्हाङ पापाओ अ़चुबुदा अ़ङ्तुम्प़छ़क तोम्तुङ्योङ। 15 खोक्कोलाम्पा निनाम्मादुओ खोन्कि हेन्खामादाओ झारा खिम्लुम्पाओ अ़नुछ्याओ अ़चुह़ङ्म़ङ अ़तोक। 16 अ़ङ्का यामात्ङा, निनाम्हाङ्ओ अ़न्नुनु तोक्पो सायाआ अ़चुलावाओ सावालाम्पा आम्नुओ कोङ्हुत्दा त़छोसिन्लो ऩमुन्ने। 17 खोन्कि साकोङ्छ़ङ्लाम्पा ख्रिस्त आम्नुओ साकोङ्वाचिदा म़याक्ने, खोन्कि सोम्तुक्मादा आम्नुओ भेन पाक्तुओ खोन्कि छ़ङ युङ्सानुम निम्पाङ अ़ङ्का यामात्ङा। 18 झारा निनाम्हाङ्ओ अ़चुम़नाचिएनान अ़क्नि ख्रिस्तओ अ़चुसोम्तुक्माओ अ़दाप, अ़मेत, अ़झोन खोन्कि अ़ग़ङ दि ओ, मो तुप्मा सावा तोक्मा रुवानिन। 19 खोन्कि म़नाओ अ़तायाआ अ़तुप्तुन्ओ ख्रिस्तओ अ़चुसोम्तुक्मा सिन्मा रुवानुम, खोन्ओसा निनाम्हाङ्ओ झारा अ़चुच़माथाङ्माआ खानानिन भेप्तानिन। 20 हान खोक्कोसोओ निम्पाङ आन्कान्एदा काचि मुमा खोक्कोसोओ अ़चुसावाओ काचिवा आन्कान दोरुम्ओ माङ्लो मित्तुम्ओदाङ्का अ़न्नुनु च़लोक मुमा अ़ऱ। 21 खोक्कोसोओ अ़धुन-अ़धुन्तारि साम्भुङ खोन्कि ख्रिस्त येसुदा अ़धुन अ़चुऩङ्लोङ्ने! ओवात्निङा लिने। |
© Wycliffe Bible Translators, Inc. All rights reserved.
Wycliffe Bible Translators, Inc.