एफिसि 2 - बान्तावा राईस़मादाङ्का ह़ङ्म़ङ्दा 1 खोन्किना आम्नुओ लोमान्तेत खोन्कि हेवाचिआ खानानिन त़स़न्युङ्सिन। 2 मोन्ग़रि खानानिन ओ हेन्खामादाओ अ़अ़त्पा लाम्दा त़कोलिन्येन। खानानिन्आ नाम्छ़ऱदुओ सावाओ अ़हाङ्पा त़त़ङ्तुम्योम, मो लावाङा निनाम्हाङ्आ लोमाय़ङ्वा मान्च़कादा छाचिएदा आइमित काचि मुयाङ। 3 अ़नुछ्या झारा आन्कान्छाङ मोचिओ अ़चुरादा अ़क्दु आन्पोक्ओ हेवामि च़माथाङ्मा च़क्ख़य़चिदा आन्ऩङानुवाङा, खोन्कि आप्पि आन्मित्माचि खोन्कि मिन्माचिवात्नि च़न्येन। नि म़नाचिवात्नि आन्कान च़माथाङ्माआ हेवामि लिसिन्ओसा आन्कान निनाम्हाङ्ओ अ़चुलोमा मान्काङ्दान्येन। 4 मेन निनाम्हाङ्ओ अ़चुसोमातुक्मा ब़द्धे याक्याङ, खोन्कि खोक्कोओ अ़चुसोमातुक्मा आन्कान्एदा अ़न्नुनु तोक्पो मुयाङ। 5 खोन्ओसा आन्कान हेवादा स़न्दान्ओनुछाङ खोक्कोसाआ आन्कान ख्रिस्तएनान अ़क्नि अ़ह़ङ म़मुवा। निनाम्हाङ्ओ अ़चुसोमातुक्मालाम्पाङा खानानिन ऩलेइसिन्युङ्सिन। 6 खोन्कि खोक्कोएनान आन्कान म़खोन्तालोइसाकि निनाम्मादुओ युङ्खाचिदा येसु ख्रिस्तएनान आन्कान म़युङ्सा। 7 येसु ख्रिस्तआ ओ आन्कान्एदाओ खोक्कोसोओ अ़चुसोम्तुक्मादा अ़न्नुनु तोक्पो अ़चुसोमातुक्मा तायाङ्ओ जुगादा खाङ्मुमा निम्पाङ ओ। 8 देकिनालो सोमातुक्मादाङ्का साकोङ्छ़ङ्लाम्पा खानानिन त़लेरिन्युङ्सिन। खोन्कि ओ खानानिन आप्पिएदाङ्का माआङ, ओ ना निनाम्हाङ्आ मोहा प़माय़ङ ओ। 9 आन्कान मुम्ओ अ़नुवाक काचिचिलाम्पा तोक्तुम्ओ माआङ्ओसाआ साङ्छाङ ओसोओ अ़तुक्वादा तोक्पो लिमा अ़ऱनिन। 10 देकिनालो आन्कान अ़नुवाक काचिचिओ निम्पाङ ख्रिस्त येसुदा मुन्माय़ङ खोक्कोसोओ अ़चुसिकि ओ। आन्कान अ़नुवाक काचि मुन्ने निम्पाङ निनाम्हाङ्आ बुयाङा अ़चुम्सायुङ्सा ओ। ख्रिस्तदा झारा अ़क्तात 11 खोन्ओसा मित्तानुम, बुया खानानिन आम्नुओ पोक्दा निरावाचि त़मुन्येन्हिदा अ़चुपोक्दा सिप्मायाम्बुन पाक्माय़ङ्चिआ खानानिन सिप्मायाम्बुन मान्पाक्कादानि ऩसुङ्तिन्येन। 12 मित्तानुम, मोन्ग़रि खानानिन ख्रिस्त मात्द़ङ त़युङिन्येन। इस्राएल्दाओ ताङ्युङ्दाङ्का ऩलोइसिन्खाइसिन, खोन्कि हिप्माय़ङ्ओ अ़छ़ङ दुम्चिदाङ्का तावाङ्चि, सोम्कुवा मात्द़ङ्ओ खोन्कि ओ हेन्खामादा निनाम्हाङ मात्द़ङ त़लिसिन्युङ्सिन। 13 मेन खानानिन, मोन्ग़रि साङ्चि येसु ख्रिस्तदाङ्का अ़थाया त़युङिन्येन, हान ख्रिस्त येसुएनान अ़क्नि त़लिसिन्ओसा खोक्कोसोओ अ़चुह़आ अ़चुच़क्दा ऩतारिन्युङ्सिन। 14 देकिनालो खोक्को आन्सेवाङ्नि म़मुयाङ। खोक्कोसाआ ह्वा रुहुप अ़क रुहुप म़मुवायुङ्सा, खोन्कि काहा ङेङ्ओ कुदारि अ़भुङ्साखाइसायुङ्सा। 15 खोन्कि खोक्कोसाआ यहुदि य़ङ्हुप, मोसोओ अ़लोमाय़ङ्चि खोन्कि साम्योक्मि य़ङ्हुप्चि अ़चुस़मालाम्पा अ़लुक्ता। खोक्कोसोओ अ़चुमित्चिऩङ आप्पि खोक्कोएदाङा ह्वा रुहुप म़नाचि अ़क रुहुप अ़ऩङ्वा म़ना मुमा दोराङा, ओवात्नि खोक्कोसाआ अ़चुरादा सेवाङ्नि म़मुचि। 16 खोन्कि खोक्कोसाआ क्रुस्दाओ अ़चुस़मालाम्पा आन्कान ह्वा रुहुप अ़क पोक्दाङा निनाम्हाङ्एनान म़तोङ्साकि ङेङ अ़लुक्ता। 17 खोक्को म़ताकि खानानिन खाक्को अ़थाया त़लिसिन्ओचि सेवाङ्निओ नुय़ङ्खान खोन्कि अ़चुच़क्दाओचि सेवाङ्नि खाऩएत्तिन। 18 देकिनालो ख्रिस्तलाम्पाङा आन्कान झारा यहुदि खोन्कि निरावा अ़क्तात सेङ्लावालाम्पा आन्निनाम्हाङ पापाएदा तामालामा ऱन। 19 खोन्ओसा खानानिन हान्दाङ्का तावाङ्चि खोन्कि प़न्थादाओचि माआङ, मेन निनाम्हाङ्ओ अ़चुम़नाचिएनान खानानिन यावा-ताङ्युङ्चि खोन्कि निनाम्हाङ्ओ अ़चुखिम्लुम्पादाओ पाङ्यिचि त़लिसिन्युङ्सिन। 20 देकिनालो खानानिन छाम्माय़ङ्चि खोन्कि निनाम्हाङ्य़ङ खाकालुचिओ अ़चुछ़ङ्दा त़लिसिन्युङ्सिन, खोन्कि ख्रिस्त आप्पि मुलो खुचुरोङ लुङ म़लिसायुङ्सा। 21 खोक्कोएदा झारा खिम नुलोक अ़क्नि काम, खोन्कि हाङ्पाएदा अ़क्तात सेङ्याङ्ओ निनाम्हाङ ब़क्खाखिम लिसि पोन। 22 खोन्किना सेङ्लावादा निनाम्हाङ्ओ अ़चुयुङ्खा लिसि खानानिन्छाङ खोक्कोएदा अ़क्नि त़लिसिन्येन। |
© Wycliffe Bible Translators, Inc. All rights reserved.
Wycliffe Bible Translators, Inc.