कलस्सि 4 - बान्तावा राई1 हाङ्पाचि ओ, आम्नुओछाङ निनाम्मादु आम्नुओ हाङ्पा युङ्याङ्नि सिन्तानुम्कि आम्नुओ हारुक्चिएनान नुलोक खोन्कि खान्तुलो चुवानिन। च़लोक यायोक्चि 2 यामारायुङ्सानिन। चाप्चेत्नान्चिन्सा निनाम्हाङ आलाङ पुवानुम, खोन्कि यामारानिन। 3 आन्काओ निम्पाङ्छाङ ओवात्नि यामारानिन: ख्रिस्तओ अ़चुतुक्वादाओ मो अ़कोङ्दुम खालुमा अ़वाखाम निनाम्हाङ्आ आन्कान्का लाम ऩहोत्तिन्प़न्काने। मोसोओ निम्पाङ अ़ङ्का छेक्खादा छुक्ताङ्युङ्साङ। 4 अ़ङ्का खालुमादोत्ओ य़ङ नुलोक चेप्मा ऱङाने निकिना यामात्निप़नि। 5 साकोङ्छ़ङ मान्मुकादाचिएनान खारुएनान काचि मुवानिन, खोन्कि झारा अ़वाखाम्चि नुलोक याङानुम्च़म। 6 युम्आ चामायु चानुलो मुन्वात्नि आम्नुओ हान्मा चेप्मा अ़धुन सोमातुक्माओ मुवानुम्कि झारा देत्नि तोङ्लो य़ङ्लामाचिदोत्ओ, मो खानानिन सिन्तानुम। देङ्दाओ सेवा 7 अ़ङ्तुक्वादाओ झारा य़ङ्चि सोमातुक्तुङ्योङ्ओ निछा सोम्कुवा मुमा खान्तुओ काचि कामु खोन्कि हाङ्पाएदाओ यावा हारुक तुखिकस्आ खानानिन खात़एत्तिन। 8 आन्काओ तुक्वादा खानानिन्आ सिन्मा त़ऱम्ने, खोन्कि खोसाआ आम्नुओ साकोङ्वाचिदा राक त़प़न्नेनिओ मिन्माआ अ़ङ्का खो खानानिन्एदा बाइसुङ्ओ। 9 खोएनान ओनेसिमस बान्याङ। खो खानानिन्एदाओ अ़क्छा ओ, खोन्कि खो आन्कान्का साकोङ्छ़ङ मुमायु खोन्कि सोमातुक्तुम्योम्काओ निछा ओ। खोचिआ ओदाओ झारा म़लियाङ्ओ य़ङ्चि खानानिन खाऩएत्तिन। 10 अ़क्नि छेक्चिङ्च्याओ अ़ङ्यावा अरिस्तार्खस्आ खानानिन सेवा ऩछोक्तिन्युङ्सिन। बारनाबास्ओ अ़छोक्छा मर्कुस्ओछाङ अ़सेवा। खोसोओ अ़तुक्वादा खानानिन लोनायुङ्नानिन्वा खो खानानिन्एदा तानालो खो साऩङ्वा मेत्तानुम। 11 युस्तस अ़ऩङ मुयाङ्ओ येसुआछाङ खानानिन सेवा ऩछोक्तिन्युङ्सिन। निनाम्हाङ्ओ अ़चुहाङ्होन्ओ निम्पाङ काचि कामु यावाचिएदाङ्काओ यहुदि साकोङ्छ़ङ कामुचि ओचि सुम्कापाङ ओ। ओचिआ अ़ङ्का अ़न्नुनु अ़ङ्सोम ऩसेत्ताङ्युङ्साङ। 12 खानानिन्एदाओ अ़क्छा, ख्रिस्त येसुओ अ़चुहारुक इपाफ्रास्आछाङ सेवा ऩछोक्तिन्युङ्सिन। खोसाआ अ़धुन आम्नुओ निम्पाङ राक्एनान ओवात्नि यामात: निनाम्हाङ्आ खानानिन त़छोसिन्लो ऩमुन्ने खोन्कि नुलोक काऱ ऩमुन्कि खानानिन्आ निनाम्हाङ्ओ झारा अ़चुमिन्मावा काचि त़मुन्येन्निओ य़ङ्दा अ़छ़ङ त़लिसिन्ने। 13 आम्नुओ निम्पाङ, लाउदिकिया खोन्कि हिरापोलिस्दा कायुङ्चिओ निम्पाङ खो ब़द्धे काचि मुवायुङ्सा निकिना अ़ङ्का मोसोओ निम्पाङ सालुम्स़ङ प़ङ। 14 आन्कान्का सोमातुक्तुम्योम्काओ ओक्तोकामेत दाक्तरा लुका खोन्कि देमास्आछाङ खानानिन सेवा ऩछोक्तिन्युङ्सिन। 15 लाउदिकियादाओ ब़ब़, नाना खोन्कि निछाचि खोन्कि नुम्फास खोन्कि खोसोओ अ़खिम्दाओ साम्भुङ अ़ङ्सेवानि लोत्निप़नि। 16 आम्नुओ रादा ओ छाप्लावा खिप्चिन्किना लाउदिकियाओ साम्भुङ्दाछाङ खिप्मेत्तानुम्च़म। खोन्कि मोचिओ निम्पाङ अ़ङ्का छाप्तुङ्ओ छाप्लावाछाङ खिप्तानुम। 17 “खाना हाङ्पाएदाङ्का त़तोक्तुओ ब़त्मा काचि तासुलो”नि अर्खिप्पस लोवानुम। 18 अ़ङ्का पावल्आ ओ सेवाओ य़ङ अ़ङ्छुक्आ छाप्तुङ्योङ। अ़ङ्का छेक्खादा चोक्माय़चिआ छ़साङ्ओ मित्तानुम्च़म। खानानिन्एदा निनाम्हाङ्ओ अ़चुसोमातुक्मा याक्ने। |
© Wycliffe Bible Translators, Inc. All rights reserved.
Wycliffe Bible Translators, Inc.