छाम्माय़ङ 21 - बान्तावा राईपावल यरुसलेम खाराओ 1 आन्कान्का एफिसस साम्भुङ्दाओ ताङ्पाचिएनान हासिन्चिन्काकि आन्कान्का कोस्निओ खाम्दाक्ह्यात्नि मान्हुमाङ खारिन्का। अ़माङ्कोलेन रोदस्दा खोन्कि मोदाङ्का आन्कान्का पतारादा तान्लान्का। 2 मोदा आन्कान्का सिरिया धिखाहुप्दाओ फोनिके खाराङाओ वाप्तेला धिरुम्का, खोन्कि आन्कान्का मोदा वाङिन्काकि खारिन्का। 3 खोन्किना आन्कान्का साइप्रस खाम्दाक खाम्का खोन्कि मो अ़बेङ्वा मुम्का खोन्कि आन्कान्का सिरिया धिखाहुप्ह्यात्नि खारिन्का खोन्कि तुरोस सहरादा धान्तिन्चिन्का। देकिनालो वाप्तेलादाओ सामाचि मोदा धान्मा म़दोराङा। 4 मोदा कायुङ काखेङ्चि धिरुम्च़म्का खोन्कि अ़क सातातारि आन्कान्का खोचिएनान युङिन्का। मोचिआ पावल “यरुसलेम मान्खात्दानिन”नि सेङ्लावालाम्पा अ़लोवा। 5 मेन आन्काओ ग़रि चिआकि आन्कान्का हासिन्चिन्का खोन्कि आन्कान्का लाम वाङिन्का। झारा काखेङ्चिओ अ़चुओ खिम्हाङ्माचि खोन्कि अ़चुछाचि आन्कान्का सहरादाङ्का धियाङ्वामाओ अ़केम्तारि ऩछोङ्सिन्दान्का। मोदा झारासा आन्काओ तुम्प़छ़क तोम्तुम्काकि यामारिन्का। 6 खोन्किना आन्कान्का अ़क्छा निएदा हासिन्चिन्का खोन्कि वाप्तेलादा आन्कान्का वाङिन्का, खोन्कि खोचि अ़चुखिम म़लासा। 7 आन्कान्का तुरोस सहरादाङ्का वाप्तेलालाम्पा तोलेमाइस सहरादा तान्लान्का। मोदा साकोङ्छ़ङ कामुचि आन्कान्का सेवा मेत्तुम्च़म्का खोन्कि अ़क लेन मोचिएनान आन्कान्का युङिन्का। 8 अ़माङ्कोलेन तोलेमाइस सहरा छिरुम्दोम्काकि आन्कान्का कैसरिया सहरादा तान्लान्का। आन्कान्का मोदा नुय़ङ्खान खाकालु फिलिप्ओ अ़खिम्दा याइन्का। खो सात्कापाङ साम्भुङ्काफाचिदाङ्का अ़क्छा ओ। 9 खोसोओ चारकापाङ सायामान्काम्म़युक्ताओ अ़मेत्छाछा छाचि म़युङाङा, मोचि निनाम्हाङ्य़ङ म़चेवा। 10 खोन्कि आन्कान्का मोदा अ़क्चित्कालेन्तारि युङिन्येन्काहिदा अगाबस अ़ऩङ मुवाङाओ अ़क्छा निनाम्हाङ्य़ङ खाकालु यहुदिया धिखाहुप्दाङ्का आन्कान्काएदा धा। 11 खोन्कि खोसाआ पावल्ओ अ़छिप्माय़ङ क़क्तुकि अ़छुक खोन्कि अ़लाङ छ़सुकि य़ङा, “सेङ्लावाआ, ‘ओ छिप्माय़ङ्ओ अ़हाङ्पा यहुदिचिआ ओवात्निङा यरुसलेम्दा अ़छ़ खोन्कि रोमिचिओ अ़चुछुक्दा अ़पाक’नि म़य़ङ्याङ।” 12 ओ य़ङ आन्कान्का एनुम्काकि आन्कान्का खोन्कि मोदाओ साकोङ्छ़ङ कामुचिएनान पावल “यरुसलेम मान्खात्दानिन”नि छुक फाङ्याङ्सा लोम्का। 13 मेन पावल्आ, “खानानिन देकि त़खाविन्किना अ़ङ्साकोङ्वा चाअ़त्लो त़मेत्निप़निङ्नि? अ़ङ्का छेक्खादा छेक्मा ओन्ङा माआङ, मेन हाङ्पा येसुओ अ़चुऩङ्दा अ़ङ्का यरुसलेम्दा स़माछाङ चुम्ङान्च़ङ”नि लासुलोचि। 14 पावल छुन्ताओसा आन्कान्का वाइवेत युङिन्काकि “निनाम्हाङ्ओ अ़मिन्मा तालाने”नि य़ङिन्का। 15 अ़क्चित्कालेन्किना आन्कान्का चुम्सिन्चिन्का, खोन्कि यरुसलेम्दुत्नि लोन्तिन्का। 16 खोन्कि कैसरियादाङ्का थोरेत्कापाङ काखेङ्चि आन्कान्काएनान अ़क्नि म़खारा, खोन्कि खोचिआ आन्कान्का साइप्रस्दाओ अ़क्छा बुयादाङ्का साकोङ्छ़ङ कामु मनासोन्ओ अ़खिम्दा ऩखातिन्का, मोदा आन्कान्का याक्मादोराङा। पावल्आ याकुब धिरुओ 17 आन्कान्का यरुसलेम्दा तान्लान्काहिदा मोदाओ येसुदा साकोङ्छ़ङ कामुचिआ अ़चुऩङानुयाङ्सा साऩङ्वा आन्कान्का ऩमेत्तिन्का। 18 अ़माङ्कोलेन पावल खोन्कि आन्कान्का याकुब तुप्सि खारिन्का, खोन्कि यरुसलेम साम्भुङ्दाओ झारा ताङ्पाचि मोदा म़युङाङा। 19 पावल्आ मोचि सेवा मेत्तुचिकि खोसोओ अ़काचिलाम्पा निनाम्हाङ्आ निरावाचिओ अ़चुरादा अ़मुवाओ झारा काचिचि अ़सिसिपेन खाएत्तुचि। 20 मोचिआ ओ य़ङ अ़एनाकि निनाम्हाङ्ओ अ़चुऩङ झारासा अ़लोङ्सा। खोन्किना खोचिआ पावल अ़लोवा, “एनाखानुम पावल निछा, ओदाछाङ अ़हजारा-हजारा यहुदिचिआ हाङ्पा साकोङ्छ़ङ अ़मुवाकि निनाम्हाङ्य़ङ खाकालु मोसाओ अ़य़ङ्हुप्वा च़मादा अ़चुमिन्मा अ़पाक। 21 खोन्किना खोचि आम्नुओ तुक्वादा खाम़एत्तुयुङ्सुचि। खानानिन्आ निरावाचिओ अ़चुरादा कायुङ झारा यहुदिचि ‘निनाम्हाङ्य़ङ खाकालु मोसाओ अ़य़ङ्हुप छित्मादोत’नि त़चिन्तुम्योम्च़म्नि म़य़ङ्याङ। मोचि खानानिन्आ ‘आम्नुओ छाचि सिप्मायाम्बुन पाक्मा अ़नुनिन, माङ्लो यहुदि आन्च़माथाङ्मावा च़मा अ़दोत्निन’नि त़लोम्योम्च़म्नि म़य़ङ्याङ। 22 हान आन्कान्का दे च़न्का? खानानिन ओदा त़बानिन्युङ्सिन्ओ मोचिआ अ़नुछ्याङा अ़एन। 23 खोन्ओसा आन्कान्का खानानिन दे लोनि, मो मुवानुम। ओदा आन्कान्काएदा चारकापाङ म़नाचि म़युङ्याङ, मोचिआ निनाम्हाङ अ़हिप्तायुङ्सा। 24 ओ म़नाचि निनाम्हाङ ब़क्खाखिम्दा खात्तानुम्च़म्कि ओचिएनान अ़क्नि सेङ्मान्चिन थाप्स़ङ मुवानिन, खोन्कि ओचिओ अ़चुताङ्मुवा खोमाय़ङ्ओसो अ़लुङ खानानिन्आङा छोत्तापुवानुम्च़म। मोवात्नि मोचिआ अ़चुताङ अ़खोने। खोन्किना आम्नुओ तुक्वादा अ़एनाओ य़ङ सोज्जेओ निकिना खानानिन आप्पि निनाम्हाङ्य़ङ खाकालु मोसाओ अ़य़ङ्हुप्वा त़च़न्येन्ओ झारासाआ अ़सिन्ने। 25 हाङ्पा येसु ख्रिस्तएदा साकोङ्छ़ङ कामु निरावाचिओ अ़चुतुक्वादा अ़छ़ङ मुम्काकि आन्कान्का ‘सेम्पोक हेन्खोक्वा दात्माय़ङ अ़सा चामा, अ़ह़ चामा, अ़पोत्दा पिन्मासेत्माय़ङ सायाम्पोक्ओ अ़सा चामा खोन्कि ताङ्लान मुमादाङ्का अ़थाया युङ्मादोत’नि बुयाङा छाप्लावादा बाइसुम्युङ्सुम्का।” 26 खोन्किना पावल्आ मो चारकापाङ म़नाचि अ़माङ्कोलेन निनाम्हाङ ब़क्खाखिम्दा खात्तुचिकि साम्योक्मि य़ङ्हुप्वा खोचिएनान सेङ्सान्चिन। खोन्किना खो निनाम्हाङ ब़क्खाखिम्दा वाङाकि अ़चुहिप्माय़ङ लेन देम्खा तालाओ खोन्कि मोचि झारासोओ अ़चुहेन्खोक्वा प़मादोत्ओ खोसाआ काब़क्पा खाएत्तु। पावल ब़क्खाखिम्दा अ़लावाओ 27 म़सेङ्सान्चिन्ओ सात्कालेन तामालामा मुवाङाहिदा एसिया धिखाहुप्दाओ यहुदिचिआ पावल ब़क्खाखिम्दा अ़खा। खोन्कि मोचिआ झारा म़ना मुक्लाचि खोसोओ अ़देङ्सालाप्पादा म़चोङ्सुचिकि खो अ़लावा। 28 खोन्कि मोचि पात्याङ्सा म़य़ङा, “इस्राएलि म़नाचि ओ, आन्कान्का फानि! झारादात्नि झारा आन्म़नाचिओ अ़चुदेङ्सालाप्पादा, आन्य़ङ्हुप्ओ अ़देङ्सालाप्पादा, खोन्कि निनाम्हाङ ब़क्खाखिम्ओ अ़देङ्सालाप्पादा काचिन ओ म़नाङा ओ। खोन्ओन्ङा माआङ, निरावाचि निनाम्हाङ ब़क्खाखिम्हुत्दा वाक्तुचिकि ओ ब़क्खाखिम्छाङ पोप्तुयुङ्सु।” 29 (खोचिआ बुया एफिसस्दाओ त्रोफिमस पावल्एनान सहरादा म़खायुङ्सुचिओसा पावल्आ खोङा निनाम्हाङ ब़क्खाखिम्हुत्दा वाक्तुनि खोचिआ अ़मित्ता।) 30 खोन्किना सहरादाओ झारा म़नाचि पावल्ओ अ़देङ्सालाप्पादा म़पुवालोन्ता खोन्कि अ़क्धुवा म़लोरा ताकि मोचिआ पावल अ़लावाकि निनाम्हाङ ब़क्खाखिम्ओ अ़बुक्लुङ्दाङ्का बुङ्खादा अ़सारालोत्ता, खोन्कि च़क्नि वाङ्खालाम्चि म़छेक्तुचि। 31 मोचिआ पावल सेत्मा अ़लाप्ताङाहिदा झारा यरुसलेम सहरादा काचेङ्वा लिसाङाओ य़ङ रोमि रात्खामि रुहुप्ओ अ़चुमुकुधुम खाअ़एत्ता। 32 खोन्किना खोसाआ च़क्नि रात्खामिचि खोन्कि कप्तानाचि खात्तुचिकि म़ना मुक्लायु लोराधा। मोचिआ कप्तानाचि खोन्कि रात्खामिचि म़ताङाओ म़खाचिकिना पावल धात्मा अ़छिरा। 33 खोन्किना मुकुधुम ताकि पावल लाउ, खोन्कि ह्वातात काकाराओ चोक्माय़चिआ छुम्मेत्तुचि, खोन्कि खोसाआ म़नाचि सेनुचि, “ओ साङ ओ? खोन्कि ओ दे चुवायुङ्सा?” 34 मेन मुक्लादाओ खा-खाक्कोचि अ़क्तात य़ङ्आ म़पाराङा खोन्कि खा-खाक्कोचि नि य़ङ्दा म़पारा। मोदाओ काचेङ्वाआ अ़छ़ङ य़ङ मुकुधुम्आ सिन्मा मान्ऱदोओसा खोसाआ पावल रात्खामिचिओ अ़चुयुङ्खादा खात्मेत्तुचि। 35 रात्खामिचिआ पावल अ़चुलाम्चेक्दातारि अ़तारालाहिदा म़ना मुक्लाचिओ चाअ़त्लो अ़चुमाइसुङ काराओसा रात्खामिचिआ खो अ़खुयाखात्ता। 36 झारा म़ना मुक्लाचिआ “ओ सेरानुम!”नि पात्याङ्सा मोचि म़त़ङ्तुचि। पावल्आ खोसोओ अ़तुक्वादा खालुसुओ 37 रात्खामिचिआ पावल अ़चुयुङ्खाखिम्हुत्दा वाक्मा अ़मुवाङाहिदा पावल्आ मुकुधुम सेनु, “अ़ङ्का खानानिन्एदा अ़क्चिलोक य़ङ युङ्मा ऱङ हे?” मुकुधुम्आ दोम्दायाङ्सा लासुलो, “दि खाना ग्रिक य़ङ त़ले? 38 दि खाना हेन्कोप्ओ अ़देङ्सालाप्पादा बुया ङेन त़मुवाकि चार हजारकापाङ म़ना कासेत्चि लेक्लेक्लेक्वादा कातित्खात मो मिस्रि माआङ कि?” 39 पावल्आ लासुलो, “अ़ङ्का ना किलिकियादाओ तार्सस अ़च़वाङ सहरादाओ अ़क्छा ताङ्युङ यहुदि ओ। अ़ङ्का खानानिन्एदा छुक फाङ्ङाङा, ओदाओ म़नाचिएनान अ़ङ्का चेप्मा प़नि।” 40 मुकुधुम काङ्सा, खोन्ओसा पावल लाम्चेक्दा एवाकि म़ना मुक्लाचि छुक्चाला मेत्तुचि। म़नाचि वाइवेत म़लिसाहिदा खोसाआ हिब्रु य़ङ्दा मोचि लोचि। |
© Wycliffe Bible Translators, Inc. All rights reserved.
Wycliffe Bible Translators, Inc.