छाम्‍माय़ङ 13 - बान्‍तावा राई

बारनाबास खोन्‍कि सावल छेन्‍माय़ङ

¹ एन्‍तिओखिया सहरादाओ साम्‍भुङ्‌दा निनाम्‍हाङ्‌य़ङ खाकालुचि खोन्‍कि काचिन्‍पाचि म़याआङा। मोचि बारनाबास, माक़च़क्‍पानि लोवाङाओ सिमियोन, कुरेनिदाओ लुकियस, हेरोद हाङ एन्‍तिपास्‌ओ अ़छायुङ्‌काओ अ़यावा मनेन खोन्‍कि सावल म़याआङा।

² मोचिआ हाङ्‌पा ब़क्‌याङ्‌सा खोन्‍कि मान्‍चामाङ म़युङाङाओ ग़रि सेङ्‌लावाआ मोचि लोचि, “खाक्‍को काचिओ निम्‍पाङ बारनाबास खोन्‍कि सावल अ़ङ्‌का बुत्‍तुङ्‌युङ्‌सुङ्‌च़ङ, मो काचिदा पाआनुम्‍च़म।”

³ खोन्‍किना मोचि चा मान्‍चामाङ म़युङाकिना याम़माराचिआकि बारनाबास खोन्‍कि सावल्‌एदा अ़चुछुक म़युक्‍तुचिकि खोचि म़छुत्‍तुखाइसुचि।

साइप्रस खाम्‍दाक्‌दा

⁴ सेङ्‌लावाआ बारनाबास खोन्‍कि सावल अ़चुकाचिदा म़खाइसुचि, खोन्‍कि खोचि सिलुकियादाओ वाप्‍तेला नान्‍खादा धाचि। खोन्‍कि मोचि वाप्‍तेलादा वाङाचि, खोन्‍कि मोदाङ्‌का साइप्रस खाम्‍दाक्‌ह्‍यात्‍नि खाराचि।

⁵ खोचि सलामिस सहरादा तालाचिकि यहुदिचिओ अ़चुयावायोक्‍खिम्‌चिदा खोचिआ निनाम्‍हाङ्‌ओ अ़चुय़ङ खाअ़एत्‍ताचुचिन। खोचिओ अ़चुकाफा युहन्‍नानिओ मर्कुस्‌छाङ खोचिआ अ़खात्‍ताचु।

⁶ खोचिआ झारा साइप्रस खाम्‍दाक कोत्‌याङ्‌सा पाफोस्‌तारि तालाचि। खोन्‍कि खोचिआ मोदा यहुदि म़क्‍फेङ कामु बार-येसु अ़ऩङ मुवाङाओ अ़क्‍छा सोज्‍जेओ य़ङ खाकालु अ़धिराचु।

⁷ मो म़क्‍फेङ कामु धिखाहुप्‌हाङ सर्गियस पावलस्‌एनान युङाङा। सर्गियस पावलस खारु कातोक याआङा। खो निनाम्‍हाङ्‌ओ अ़चुय़ङ एन्‍मानि मिनाङाओसा सावल खोन्‍कि बारनाबास बुत्‍तुचि।

⁸ मेन म़क्‍फेङ कामु एलुमास्‌आ (एलुमास ग्रिक य़ङ्‌दाओ मोसोओ अ़ऩङ ओ) सावल खोन्‍कि बारनाबास फित्‍चि मेत्‍तुचि, खोन्‍कि धिखाहुप्‌हाङ सर्गियस पावलस येसु साकोङ्‌छ़ङ मुमादाङ्‌का लामालाप्‍तुङु।

⁹ खोन्‍किना पावल्‌निछाङ अ़लोवाङाओ सावल, सेङ्‌लावाआ भेप्‍तु खोन्‍कि खोसाआ होन्‍नि एलुमास चोउदिसुकि लो,

¹⁰ “खाना सैतानाओ अ़छा खोन्‍कि झारा अ़नुवाक य़ङ्‍ओ अ़ङेङ ओ। झारा म़प्‍मा खोन्‍कि अ़अ़त्‍पाआ त़भेप्‍ताओ! दि हाङ्‌पाओ अ़छ़ङ लाम्‌चि खाना ऱक्‍मा त़छिरुन?

¹¹ हान एनु! हाङ्‌पाआ ओन्‍ग़रिङा खाना दन्‍दा त़प़, खोन्‍कि खाना अ़क्‍चित्‌तारि नाम्‍साम खाङ्‌माछाङ मान्‍ऱकादा दोप्‍म़क त़लि।” मोन्‍ग़रिङा माक्‍मुइवा खोन्‍कि कुइयामाआ खो भुक्‍तुखात्‍तु, खोन्‍किना खो कातित म़ना लाम्‌याङ्‌सा ओह्‍यात्‍नि-मोह्‍यात्‍नि खासोप्‍मा पुक्‍तु।

¹² खोन्‍किना मो धिखाहुप्‌हाङ्‍आ एलुमास मोवात्‍नि लिसाओ खाकि हाङ्‌पादा साकोङ्‌छ़ङ मुवा, देकिनालो हाङ्‌पाओ अ़चुचिन्‍माय़ङ्‌ओ अ़तुक्‌वादा खो अ़न्‍नुनु दोम्‍तुदो।

पिसिदिया धिखाहुप्‌दाओ एन्‍तिओखिया सहरादा

¹³ पावल खोन्‍कि खोसोओ अ़यावाचि पाफोस सहरादाङ्‌का वाप्‍तेलादा म़वाङाकि पाम्‍फिलियाओ पर्गा सहरातारि म़खारा। खोन्‍किना मर्कुस्‌नि अ़लोवाङाओ युहन्‍नाआ छिरुदोचिकि यरुसलेम लासाखारा।

¹⁴ मेन खोचि पर्गादाङ्‌का पिसिदिया खाहुप्‌दाओ एन्‍तिओखिया सहरादा खाराचि, खोन्‍कि सावातोम्‍खा-लेन खोचि यावायोक्‍खिम्‍हुत्‌दा वाङाचिकि युङाचि।

¹⁵ निनाम्‍हाङ्‌य़ङ खाकालु मोसाओ अ़य़ङ्‌हुप खोन्‍कि निनाम्‍हाङ्‌य़ङ खाकालुचिओ अ़चुछाप्‍लाखादाङ्‌का अ़खिप्‍ताकि यावायोक्‍खिम्‌दाओ बुसुवाचिआ पावल खोन्‍कि बारनाबास बुत्‍सि म़छुत्‍तुचिकि य़ङ म़मेत्‍तुचि, “यावाचि ओ, खानाचिएदा म़नाचि राक प़मायु य़ङ्‌खान युङ्‌याङ्‌नालो य़ङाचि।”

¹⁶ खोन्‍किना पावल पुवालोन्‍ताकि छुक्‌चालाआ वाइवेत युङ्‌मेत्‍तुचि, खोन्‍कि चेप्‍मा पुङ्‌सु, “इस्राएलि अ़ङ्‌द़क्‍छाबुवाचि ओ, खोन्‍कि खानानिन निनाम्‍हाङ काब़क निरावाचि ओ, अ़ङ्‌य़ङ एनानुम!

¹⁷ इस्राएलि रावाओ अ़चुनिनाम्‍हाङ्‌आ आन्‍काओ सुन्‍तुम्‌चि म़छेन्‍तुचि, खोन्‍कि मिस्र हेन्‍कोप्‌दा म़युङाङाहिदा खोचि अ़चुखिप्‍मादा खोन्‍कि अ़चुसावादा म़पोइसुचि, खोन्‍कि खोक्‍कोसोओ तोक्‍पो अ़चुसावाआ मो हेन्‍कोप्‌दाङ्‌का म़लोइसुबात्‍तुचि।

¹⁸ खोक्‍कोसाआ लेक्‍लेक्‍लेक्‌वाओदा आप्‍फात चालिस्‌कादोङ्‌तारि म़आङ्‌तुचि।

¹⁹ खोन्‍किना निनाम्‍हाङ्‌आ कनान हेन्‍कोप्‌दाओ सात्‌कातात रावाचि हारा चात्‍म़मेत्‍तुचिकि मो हेन्‍कोप इस्राएलिचि पाङ मुमा म़प़चि।

²⁰ मोन्‍ग़रितारि आप्‍फात चार सये पचास्‌कादोङ लिसायुङ्‌सा। खोन्‍किना निनाम्‍हाङ्‌य़ङ खाकालु समुएल्‌तारि निनाम्‍हाङ्‌आ आन्‍सुन्‍तुम्‌चि कातित छ़ङ काछेन्‍पाचि म़प़चि।

²¹ खोन्‍किना खोचि हाङ म़दोरा, खोन्‍कि निनाम्‍हाङ्‌आ बेन्‌यामिन भुङ्‌ओ किस्‌ओ अ़छा सावल मोचि म़प़चिकिना खो चालिस्‌कादोङ्‌तारि मोचिएदा हाङ मुवा।

²² खोन्‍कि निनाम्‍हाङ्‌आ सावल हाङ्‌दाङ्‌का अ़लोइसाकि दाउद खोचिओ अ़चुहाङ अ़मुवा। खोसोओ अ़तुक्‌वादा निनाम्‍हाङ्‌आ सालुम्‍स़ङ अ़पुवा, ‘अ़ङ्‌का यिसैओ अ़छा दाउद धिरुङ्‌युङ्‌सुङ, खो अ़ङ्‌मिन्‍माआ चोओ म़ना ओ। अ़ङ्‌का मुमेत्‍तुङ्‍ओ झारा काचिचि खोसाआ मुचि।’

²³ खोन्‍कि ओ दाउद हाङ्‌ओ अ़छावारिचिलाम्‍पा निनाम्‍हाङ्‌आ म़हिप्‍तुचिवा इस्राएलिचिओ निम्‍पाङ अ़क्‍छा कालेन्‍पा येसु अ़तासा।

²⁴ येसु तामा बुया, युहन्‍नाआ झारा इस्राएल्‌दाओ म़नाचि ‘हेवा मुमा छिरानुम्‌कि निनाम्‍हाङ्‌एदा लासानिन, खोन्‍कि बप्‍तिस्‍मा लोआनिन’नि खाएत्‍तुचि।

²⁵ युहन्‍नाआ अ़काचि चिन्‍मा मुङुहिदा खोसाआ सेनुचि, ‘खानानिन अ़ङ्‌का साङ्‌नि त़मित्‍ङाङाऩङ? अ़ङ्‌का ना मसिह माआङ! मेन एनानुम, अ़ङ्‌देङ्‌दा अ़क्‍छा म़तायाङ, खोक्‍कोसोओ अ़चुलाङ्‌दाओ फेङ्‌ता हुत्‍माछाङ अ़ङ्‌का अ़खान्‍ऩङ।’

²⁶ अ़ङ्‍इस्राएलि ब़ब़, नाना खोन्‍कि निछाचि ओ, अब्राहाम्‌ओ अ़छावारिचि खोन्‍कि निनाम्‍हाङ काब़क निरावा यावाचि ओ, निनाम्‍हाङ्‌आ आन्‍कान लेन्‍माओ य़ङ्‌खान अ़तासायुङ्‌सा।

²⁷ मेन यरुसलेम्‌दा कायुङ म़नाचि खोन्‍कि खोचिओ अ़चुबुसुवाचिआ येसु कालेन्‍पा निकिना मान्‍सिन्‌अ़दा। मोचिआ झारा सावातोम्‍खा-लेन्‌दा अ़खिप्‍ताङाओ निनाम्‍हाङ्‌य़ङ खाकालुचिओ अ़चुय़ङ मान्‍तुप्‌अ़दाकिना येसु स़माओ दन्‍दा अ़पुवा, खोन्‍कि निनाम्‍हाङ्‌य़ङ खाकालुचि म़चेवाओ य़ङ अ़तासाला।

²⁸ येसु सेत्‍मा दन्‍दा प़माओ अ़तुक्‌वा दित्‍छाङ मान्‍धित्‌अ़दा, खोन्‍नुछाङ खोचिआ येसु सेत्‍मादोत निकिना पिलातस अ़दोत्‍ता।

²⁹ खोन्‍कि खोक्‍कोसोओ अ़तुक्‌वादा म़छाप्‍ताओ झारा य़ङ्‌चि म़तासुलोचिकि खोचिआ येसु क्रुस्‌दाङ्‌का अ़धान्‍ता, खोन्‍कि एप्‍मादा अ़युङ्‌सा।

³⁰ खोन्‍नुछाङ निनाम्‍हाङ्‌आ येसु म़सुवादाओदाङ्‌का अ़लासाखोन्‍तालोइसा।

³¹ खोन्‍कि खोक्‍कोएनान गालिल्‌दाङ्‌का यरुसलेम्‌दा काबान्‍चिआ खोक्‍को ब़द्‍धेकालेन्‌तारि अ़खा, खोन्‍कि खोचि आइमित्‌ओ इस्राएलि आन्‍म़नाचिओ निम्‍पाङ खोक्‍कोसोओ अ़चुसालुम्‍स़ङ म़युङ्‌याङ।

³² निनाम्‍हाङ्‌आ आन्‍सुन्‍तुम्‌चि म़हिप्‍तुचिओ अ़तुक्‌वादाओ नुय़ङ्‌खान आन्‍काच्‍या खानानिन खाएत्‍निङ्‌नि।

³³ निनाम्‍हाङ्‌आ येसु अ़खोन्‍तालोइसाकि मो य़ङ आन्‍कान खोक्‍कोसोओ अ़छाचिओ निकिना अ़तासालायुङ्‌सा। ओवात्‍निङा ह्‍वातात्‌ओतात साम्‍ऱङ्‍ओ अ़धाङ्‌दाछाङ छाप्‍तायुङ्‌सा, ‘खाना अ़ङ्‌दुवाछा छा ओ, अ़ङ्‌का आय़ आम्‍पा लिसाङ्‌युङ्‌साङ।’

³⁴ निनाम्‍हाङ्‌आ येसु ख्रिस्‍त देम्‍खाछाङ अ़लानिन्‍स़निन्‍दानिन्‍लो अ़खोन्‍तालोइसायुङ्‌सा, ओसोओ अ़तुक्‌वादा निनाम्‍हाङ ओवात्‍नि म़य़ङायुङ्‌सा, ‘अ़ङ्‌का दाउद हिप्‍तुङ्‍ओ सेङ्‌याङ्‌ओ खोन्‍कि अ़च़ङ्‌पाङ्‌वा आसिखाचि खानानिन प़नानिन।’

³⁵ खोन्‌ओसा खो नितात साम्‍ऱङ्‌दाछाङ म़य़ङ्‌याङ, ‘खानानिन आम्‍नुओ सेङ्‌याङ्‌ओ म़नाओ अ़चुपोक क़माखात्‍मा त़प़न्‍मिन।’

³⁶ खो ह़ङाङाओ ग़रि निनाम्‍हाङ्‌ओ अ़चुमित्‍चिऩङ्‌वा खो काचि मुवा, खोन्‍किना सुवादाकि अ़सुन्‍तुम्‌चिओ अ़चुच़क्‌दा दाउद अ़खुम्‍ता, खोन्‍कि खोसोओ अ़पोक कुवाखारा।

³⁷ मेन निनाम्‍हाङ्‌आ म़सुवादाओदाङ्‌का अ़लासाखोन्‍तालोइसाओ येसुओ अ़याम मान्‍क़।

³⁸ खोन्‌ओसा अ़ङ्‌द़क्‍छाबुवाचि ओ, खानानिन्‌आ सिन्‍तानुम, ओ येसुलाम्‍पा निनाम्‍हाङ्‌आ आम्‍नुओ हेवा ऩलेत्‍तिन्‍प़न निकिना आन्‍काच्‍या खानानिन नुय़ङ्‌खान खाएत्‍निङ्‌नि।

³⁹ येसुएदा झारा साकोङ्‌छ़ङ कामुचि अ़चुहेवादाङ्‌का म़फोङ्‌सुचिकि निनाम्‍हाङ्‌आ साम्‌योक्‍मि म़काइसुचि। मेन मोसाओ अ़य़ङ्‌हुप्‌आ खानानिन मो हेवादाङ्‌का फोङ्‌मा मान्‍ऱत़दान्‌येन।

⁴⁰ खोन्‌ओसा चाप्‍चेत्‍तानिन्‍चिन, निनाम्‍हाङ्‌य़ङ खाकालुचि म़चेवाओ य़ङ्‌चिवात्‍नि खानानिन त़लिसिमिन्‍ने:

⁴¹ ‘एनानुम! खानानिन म़ना कासुङ्‌चि ओ, त़दोम्‍तिन्‍दान खोन्‍कि त़स़न्‍दान! देकिनालो आम्‍नुओ ग़रिदा अ़ङ्‌का अ़क्‌तात अ़चाअ़त्‍मा काचि मुङाङा, मो काचिओ अ़तुक्‌वादा खा-खाक्‍कोसाआ खानानिन खात़एत्‍तिन्‌नुछाङ आम्‍नुओ कोङ्‌दा अ़खात्‍निन।’”

⁴² पावल खोन्‍कि बारनाबास यावायोक्‍खिम छित्‍मादामा अ़मुवाङाचुहिदा “तायाङ्‍ओ साताओ सावातोम्‍खा-लेन्‌दा लासाताचिकि मो य़ङ्‌चिओ अ़तुक्‌वादा च़लोक लानिखाएत्‍नि।” निकिना म़नाचिआ खोचि म़बुउचि।

⁴³ अ़चुयायोक चिआकि ब़द्‍धे यहुदिचि खोन्‍कि यहुदि च़माथाङ्‌मावा काच़ निरावा निनाम्‍हाङ काब़क्‌चिआ पावल खोन्‍कि बारनाबास म़त़ङ्‌तुचि, खोन्‍कि खोचिआ निनाम्‍हाङ्‌ओ अ़चुसोम्‍तुक्‍मादा युङायुङ्‌सानिन्‌नि लोयाङ्‌सा मो म़नाचि राक अ़पुवाचुचिन।

⁴⁴ यहुदिचिओ ताङाओ साताओ अ़चुसावातोम्‍खा-लेन्‌दा आप्‍फात झारा सहरादाओ म़नाचि निनाम्‍हाङ्‌ओ अ़चुय़ङ एन्‍सि म़कोआता।

⁴⁵ मेन यहुदि बुसुवाचिआ म़ना मुक्‍लाचि म़खाचिहिदा मोचि च़लोक ऩङ्‌च़ म़मुवा, खोन्‍कि पावल चेवाङाओ य़ङ्‍ओ अ़देङ्‌सालाप्‍पादा याअ़सान्‍ता।

⁴⁶ मेन पावल खोन्‍कि बारनाबास्‌आ राक्‌एनान अ़लासालोवाचुचिन, “निनाम्‍हाङ्‌ओ अ़चुय़ङ झारादाङ्‌का बुया खानानिन्‌ङा खाएत्‍मा दोराङाओ। मेन खानानिन्‌आ ओ ऩङात़छिरुम, खोन्‍कि खानानिन आप्‍पिङा अ़लुक्‍निन्‌ओ ह़ङ्‌म़ङ्‌आ त़खान्‍तिमिन्‌ओ त़काइसिन्‍चिन, खोन्‌ओसा हान आन्‍काच्‍या निरावाचिएदा लाच्‍या।

⁴⁷ देकिनालो हाङ्‌पाआ आन्‍काच्‍या ओवात्‍नि ऩलोवायुङ्‌साच्‍या, ‘हेन्‍खामाओ अ़थायातारि म़नाचि लेन्‍मा निम्‍पाङ, अ़ङ्‌का खाना निरावाचिओ अ़चुसाम लिसि छेन्‍नायुङ्‌ना।’”

⁴⁸ निरावाचिआ ओ य़ङ अ़एनाकिना मोचिओ अ़चुऩङानुवा, खोन्‍कि निनाम्‍हाङ्‌ओ अ़चुय़ङ अ़चोन्‍ता, खोन्‍कि अ़लुक्‍निन्‌ओ ह़ङ्‌म़ङ्‌ओ निम्‍पाङ निनाम्‍हाङ्‌आ म़छेन्‍तुचिओचि झारा साकोङ्‌छ़ङ म़मुवा।

⁴⁹ ओवात्‍नि हाङ्‌पाओ अ़चुय़ङ मो झारा धिखाहुप्‌दा थ़ङा।

⁵⁰ मेन यहुदि बुसुवाचिआ निनाम्‍हाङ कामित सायाकातोक निरावा मेत्‍छामाचि खोन्‍कि सहरादाओ अ़चुऩङ ऱङाओ म़नाचि म़थेन्‍तुचिकि पावल खोन्‍कि बारनाबास्‌ओ अ़चुदेङ्‌सालाप्‍पादा दुखा म़प़चि, खोन्‍कि अ़चुधिखाहुप्‌दाङ्‌का मोचि म़लोइसुखाइसुचि।

⁵¹ निनाम्‍हाङ मोचिओ अ़चुदेङ्‌सालाप्‍पादा अ़चुमाइसुङ काराओ बुन्‌दा पावल खोन्‍कि बारनाबास्‌आ अ़चुलाङ्‌दाओ बाखा थुलि अ़धाम्‍साधान्‍तादाचुकि आइकोनियन्‌दा खाराचि।

⁵² खोन्‍कि एन्‍तिओखियादाओ येसु काखेङ्‌चि अ़चुऩङानुमाआ खोन्‍कि सेङ्‌लावाआ म़भेप्‍ता।