३ युहन्ना 1 - बान्तावा राईसाम्भुङ्दाओ अ़चाअ़त्मा 1 साम्भुङ्दाओ ताङ्पाएदाङ्का, सोमातुक्नाओ अ़ङ्यावा गायस, अ़ङ्का खाना अ़नुछ्या सोमातुक्नाङ्ना। 2 सोमातुक्नाओ अ़ङ्यावा, झारा य़ङ्दा नुलोक त़लिने खोन्कि आम्पोक चानुने निकिना अ़ङ्का खाना यामात्नाप़नाङ्ना, अ़ङ्का सिन्तुङ्योङ, आम्लावामि ह़ङ्म़ङ्छाङ नुयाङ। 3 देम्कापाङ ब़ब़, नाना खोन्कि निछाचि म़ताकि आम्ह़ङ्म़ङ्ओ अ़छ़ङ्ओ अ़तुक्वादा सालुम्स़ङ अ़पुवाहिदा अ़न्नुनु अ़ङ्ऩङानुवा। खाना अ़नुछ्याङा अ़छ़ङ त़त़ङ। 4 अ़ङ्छाचि अ़छ़ङ्दा म़कोन्याङ्निओ य़ङ एन्माओन्तेका तोक्पो अ़ऩङानुमा अ़ङ्को निकि दित्छाङ मात्द़ङ? 5 सोम्तुक्नाओ अ़ङ्यावा, खाना ब़ब़, नाना खोन्कि निछाचिओ निम्पाङ दिसु काचि त़मुनुछाङ सोम्कुवालुलो त़मु, च़लोक्वा तावाङ्चि ओ। 6 खोचिआ साम्भुङ्ओ अ़बुदा खाना सोमात़तुक्तुचिओ अ़तुक्वादा खाअ़लुसायुङ्सा। निनाम्हाङ्ओ अ़चुऩङानुओ पाराआ खाना खोचि अ़चुकोन्खादा त़खाइसुचिनालो खाना नुलोक त़च़। 7 देकिनालो मोचिआ निरावाचिएदाङ्का दित्छाङ मान्लोक्माङ हाङ्पाओ अ़चुऩङ्ओ निकिना कोइसि म़लोन्ताओ। 8 खोन्ओसा आन्कान ओवाको म़नाचि फामाचिदोत। मोवात्नि आन्कान अ़छ़ङ ओ निकि अ़क्नि काचि मुन। 9 अ़ङ्का साम्भुङ्दा अ़चिलोक य़ङ छाप्तुङ्युङ्सुङ। मेन आम्नुओ रादा तोक्पो लिमाकालाम दियोत्रिफस्आ आन्कान्का अ़लोइमिन्का। 10 खोन्ओसा अ़ङ्का मोदा बान्ङाहिदा खोसाआ आन्काओ देङ्सालाप्पादा अ़अ़त्पा दुम मुयाङ्ओ काचिचिओ अ़तुक्वादा नुलोक खाएत्नानिन। खोन्कि मो काचिआ ओन्ङा अ़सोम अ़स़निन्कि खोसाआ ब़ब़, नाना खोन्कि निछाचि साऩङ्वा मेत्मा छुन, खोन्कि साऩङ्वा मेत्मा कालाम्चिछाङ अ़प़न्चिन, खोन्कि मोचि साम्भुङ्दाङ्का लोइसुखाइसुचि। 11 सोमातुक्नाङ्नाओ यावा, अ़अ़त्पा य़ङ मान्खेङ्दो, मेन अ़नुवाक य़ङ ओन्ङा खेङ्सु। साङ नुलोक च़, मो निनाम्हाङ्दाङ्का ओ, साङ अ़त्लो च़, मोसाआ निनाम्हाङ मान्सिन्युक्तु। 12 झारासा देमेत्रियस्ओ अ़तुक्वादा अ़सालुम्स़ङ अ़प़, खोन्कि अ़छ़ङ्आछाङ खाङ्मुसु। आन्कान्काछाङ खोसोओ अ़सालुम्स़ङ नुलोक प़म्का। खोन्कि खानानिन त़सिन्तुम्योम आन्काओ सालुम्स़ङ अ़छ़ङ मुयाङ। 13 अ़ङ्का खानानिन छाप्मायु य़ङ्चि ना ब़द्धे म़याक्याङ, मेन छाप्लावा खोन्कि च़क्मावाआ अ़ङ्का छाप्मा मान्स़ङा। 14 अ़ङ्का खाना च़क्नि तुप्मा स़ङाङा, खोन्कि अ़क्नि आन्चुओ दोआङा हान्चिने। 15 खाना सेवाङ्नि लिसा। ओदाओ यावाचिआ खाना सेवा ऩछोक्तायुङ्सा। मोदाओ यावाचि झारा सेवानि लोनिप़नि। |
© Wycliffe Bible Translators, Inc. All rights reserved.
Wycliffe Bible Translators, Inc.