२ तिमोथि 4 - बान्तावा राईनुय़ङ्खान खाएत्मा पाङ्खुन 1 निनाम्हाङ्ओ अ़चुबुदा खोन्कि अ़ह़ङ खोन्कि म़स़दाओचि छ़ङ्काछेन ख्रिस्त येसुओ अ़चुबुदा, खोन्कि खोक्कोसोओ अ़चुलामातामा खोन्कि अ़चुहाङ्होन मित्याङ्सा अ़ङ्का खाना चाप्चेत्याङ्सा लोना: 2 नुय़ङ्खान खालुसु, ग़रिदा खोन्कि मान्ग़रिदा चुम्सान्युङ्सान्चिन। हुङ्याङ्सा नुलोक चिन्याङ्सा यायोक प़चि, यासान्तुचि, खोन्कि राक प़चि। 3 देकिनालो ग़रि तायाङ, मोन ग़रि मोचिआ अ़नुवाक चिन्माय़ङ ऩआङ्तुन, मेन मोचिआ अ़चुऩङानुओ चिन्माय़ङ ओन्ङा एन्मा म़लाम खोन्कि मोचिआ आप्पि अ़चुऩङानुओ य़ङ खाकाएत ब़द्धे काचिन्पाचि म़कोउचि। 4 मोचि अ़छ़ङ य़ङ एन्मा ऩङाअ़छित, खोन्कि दोय़ङ्लादात्नि म़लाखात। 5 मेन खाना झारा ग़रि क़म्तान्चिन। दुखा आङ्तु, नुय़ङ्खान खालुमा काचि मुवा, खोन्कि आम्ब़क्मा काचि तासुलो। 6 देकिनालो अ़ङ्का ना निनाम्हाङ्ओ निम्पाङ अङ्गुरा माङ्वा थोइन्ओवा ब़क्खादा हेन्खोक्वा लिमा मुङाङा, खोन्कि अ़ङ्हामान्चिन ग़रि तायुङ्सा। 7 अ़ङ्का अ़नुवाक ङेन मुवाङ्युङ्साङ, अ़ङ्का अ़ङ्लोत्मा चिउङ्युङ्सुङ। अ़ङ्का अ़ङ्साकोङ्छ़ङ्ओ य़ङ रात्तुङ्युङ्सुङ। 8 हान्दाङ्का मोह्यात्नि अ़ङ्को निम्पाङ साम्योक्मिओ सिरिफा युङ्सायुङ्सा। मो साम्योक्मिओ छ़ङ्काछेन हाङ्पाआ मो लेन अ़ङ्का ऩप़ङा, खोन्कि अ़ङ्का ओन्ङा माआङ, मेन खोक्कोसोओ अ़चुलामातामा सोमाकातुक झारा म़प़चि। आप्पिओ अ़य़ङ्चि 9 अ़ङ्काएदा अ़न्नुनु च़क्नि बान्मा लामा। 10 देकिनालो देमास्आ, ओ आइमित्ओ हेन्खामा सोमातुक्तुकि अ़ङ्का अ़छिराङ्दाङ्युङ्साङ, खोन्कि खो थेसलोनिके खारायुङ्सा। क्रेसेन्स गलातिया खारायुङ्सा, खोन्कि तितस दलमातियादा। 11 लुका ओन्ङा अ़ङ्काएनान युङ्याङ। मर्कुस खानाएनान अ़क्नि बात्तु, देकिनालो खो अ़ङ्काचिदा फामा अ़न्नुनु अ़नुवाक मुयाङ। 12 तुखिकस अ़ङ्का एफिसस्दा खाइसुङ्युङ्सुङ। 13 त्रोआस्दा कारपस्एदा अ़ङ्का छिरुङ्दोङ्ओ बोप्खु खोन्कि छाप्लाखा भोङ्चि, च़लोक्वा साहोक्वाओ छाप्लावाचि, खाना त़बान्याङ्हिदा बात्तुचिकि बाना। 14 ताबो कादुप्पा अलेक्जेन्दरआ अ़ङ्का ब़द्धे अ़त्लो अ़मुवाङ। निनाम्हाङ्आ खो खोसाआ मुओ अ़काचिवा दन्दा अ़प़। 15 खोएदाङ्का खानाछाङ चाप्चेतान्चिन, देकिनालो खोसाआ आन्चुओ नुय़ङ्खान चात्लो फित्चि मुयुङ्सु। 16 अ़ङ्का बुयाओदु छ़ङ्छेन्खादा खाराङ्हिदा आप्पि रात्ताङ्च़ङ, साङ्छाङ अ़ङ्लिप्पा मान्वाङ्चि, मेन झारासा अ़ङ्का ऩछिराङ। ओ य़ङ्आ मोचि अ़धिरुन्चिन्ने। 17 मेन झारा निरावाचिआ नुय़ङ्खान एन्मा अ़ऱने निकिना हाङ्पा अ़ङ्काएनान म़युङा, खोन्कि अ़ङ्का सावा ऩपुवाङ। मोवात्नि खोक्कोसाआ अ़ङ्का धिनाराओ अ़दोदाङ्का अ़लेइसाङ। 18 हाङ्पाआ अ़ङ्का झारा अ़अ़त्पाचिदाङ्का ऩलेन्ङा, खोन्कि खोक्कोसोओ निनाम्मादुओ अ़चुहाङ्होन्ओ निम्पाङ अ़ङ्का ऩलेन्ङा। खोक्कोसोओ अ़धुन-अ़धुन्तारि अ़चुऩङ लोङ्युङ्ने। मोवात्निङा लिने। देङ्दाओ सेवा 19 प्रिस्किला, अकिलास खोन्कि ओनेसिफरस्ओ अ़चुखिम्लुम्पाचि सेवानि लोत्निप़नि। 20 इरास्तस कोरिन्थिदा युङालारा, त्रोफिमस तुआङाओ ग़रि अ़ङ्का मिलेतस्दा छिरुङ्दोङ। 21 चुङ्हिप्पा बुयाङा बान्मा अ़न्नुनु लामा। युबुलस्आ खाना सेवा ऩछोक्तायुङ्सा, खोन्कि मोवात्निङा पुदेस, लिनस, क्लौदिया खोन्कि झारा ब़ब़, नाना खोन्कि निछाचिआछाङ। 22 हाङ्पा आम्लावाएनान म़युङ्ने। खानानिन झाराएदा निनाम्हाङ्ओ अ़चुसोमातुक्मा युङ्ने। |
© Wycliffe Bible Translators, Inc. All rights reserved.
Wycliffe Bible Translators, Inc.