२ तिमोथि 1 - बान्तावा राई1 ख्रिस्त येसुदा याक्याङ्ओ ह़ङ्म़ङ्ओ हिप्माय़ङ्वा निनाम्हाङ्ओ अ़चुमित्मालाम्पा ख्रिस्त येसुओ अ़चुछाम्माय़ङ पावल्दाङ्का, 2 अ़ङ्का अ़ङ्छावात्नि सोमातुक्नाङ्नाओ तिमोथि खाना ओ छाप्लावा छाप्नाङ्ना। आन्पापा निनाम्हाङ खोन्कि आन्हाङ्पा येसु ख्रिस्तआ खाना सोमातुक्मा, फामामिन्मा खोन्कि सेवाङ्नि ऩप़ने। आलाङ खोन्कि राक 3 अ़ङ्का खाना अ़धुन अ़ङ्यामात्माचिदा मित्नाहिदा अ़ङ्का निनाम्हाङ आलाङ प़ङ। खोक्को अ़ङ्सुन्तुम्चिआ अ़ब़क्ताओवात्नि अ़ङ्का सेङ्याङ्ओ अ़ङ्छेन्खातायाआ ब़क्तुङ। 4 आम्म़क्वा मित्तुङ्हिदा अ़ङ्का खाना अ़न्नुनु तुप्मा स़ङाङा, मोवात्नि अ़ङ्को ब़द्धे अ़ङ्ऩङानुने। 5 अ़ङ्का आम्को अ़छ़ङ साकोङ्छ़ङ मित्तुङ। मो साकोङ्छ़ङ, बुया आम्दिमा लोइस्दा याआङा, खोन्कि आम्मा युनिस्दा, खोन्कि अ़ङ्का अ़नुछ्या सिन्तुङ्योङ, मो साकोङ्छ़ङ खानाएदाछाङ याक्याङ। 6 खोन्ओसा अ़ङ्का खाना मित्मेत्ना, अ़ङ्का खानाएदा अ़ङ्छुक युङ्सुङ्हिदा खाना त़तोक्तुओ निनाम्हाङ्ओ लावामि सावा लेइसुयुङ्सु। 7 देकिनालो निनाम्हाङ्आ आन्कान क़माओ लावा माआङ, मेन सावा, सोम्तुक्मा खोन्कि आप्पि क़म्मान्चिन्ओ लावा म़पुवायुङ्सा। 8 खोन्ओसा आन्हाङ्पाओ अ़चुसालुम्स़ङ प़मा आम्लेजो अ़कात्निन्ने, ना अ़ङ्का, ख्रिस्तओ निम्पाङ छेक्ङाङाओसो निम्पाङ आम्लेजो कात्ने। मेन निनाम्हाङ्ओ अ़चुसावादा नुय़ङ्खान्ओ निम्पाङ दुखा आङ्मादा अ़ङ्काएनान वाङा। 9 खोक्कोसाआ आन्कान म़लेइसा, खोन्कि सेङ्याङ्ओ ह़ङ्म़ङ ह़ङ्सि आन्कान म़बुत्ता। आन्कान अ़नुवाक काचिचि मुन्ओसा माआङ, मेन खोक्कोसोओ आप्पिओ अ़नुवाक मित्चिऩङ खोन्कि सोमातुक्माआ ओ। मो सोमातुक्मा खोक्कोसा ख्रिस्त येसुलाम्पा अ़पुङ्चिपुक्दाङ्का बुयाङा आन्कान म़पुवा। 10 मेन मो सोमातुक्मा ओन्ग़रि आन्कालेन्पा येसु ख्रिस्तओ अ़चुतामालाम्पा आन्कान खाङ्म़मेत्तायुङ्सा। खोक्को स़मादा म़छोसा, खोन्कि नुय़ङ्खान्लाम्पा अ़लुक्निन्ओ ह़ङ्म़ङ साम्दा अ़तारा। 11 खोन्कि ओ नुय़ङ्खान्ओ निम्पाङ अ़ङ्का अ़क्छा खाकालु, खोन्कि छाम्माय़ङ खोन्कि काचिन ऩछेन्ताङ। 12 खोवात्निओसा अ़ङ्का ओ य़ङ्चिदा छेक्खादा दुखा आङ्तुङ्योङ, खोन्नुछाङ अ़ङ्का ओ य़ङ्दा अ़ङ्लेजो अ़कात्निन। देकिनालो अ़ङ्का साङ्एदा साकोङ्छ़ङ मुङ्युङ्सुङ, अ़ङ्का सिन्तुङ्योङ खोन्कि अ़छ़ङ मुङ्युङ्सुङ, दि अ़ङ्का खोक्कोसोओ अ़चुलामाय़मातारि प़ङ्युङ्सुङ, मो रात्मा काऱ खोक्को म़युङ्याङ। 13 ख्रिस्त येसुएदा याक्याङ्ओ साकोङ्छ़ङ खोन्कि सोम्तुक्मादा अ़ङ्का चिन्नाओ अ़नुछ्याओ य़ङ्चि खाना त़ङ्मा अ़मात्ऩङ्ओ निम्पाङ रात्तुयुङ्सु। 14 खाना ऩपुवाओ अ़नुवाक य़ङ्चि आन्कान्एदा कायाक सेङ्लावाओ अ़सावाआ रात्तुयुङ्सु। 15 एसियादा कायुङ झारासा अ़ङ्का ऩछिराङ्दाङ्युङ्साङ्ओ खाना त़सिन्तुङुङा, मोचिएदाओ फुगेलस खोन्कि हर्मोगेनस्आछाङ अ़छिराङ्दाङ्युङ्साङ्च़ङ। 16 हाङ्पाआ ओनेसिफरस्ओ अ़खिम्लुम्पा सोमाअ़तुक्ने। देकिनालो खोसाआ अ़ङ्का अ़धुन राक अ़पुवाङ, खोन्कि अ़ङ्का छेक्खादा छुक्ताङ्हिदा देम्खाछाङ खोसोओ अ़लेजो मान्कात। 17 खो रोम्दा बानाकिना झारादात्नि अ़ङ्का मान्धित्अ़दाङ्तारि राक्एनान अ़लामाङ। 18 हाङ्पा येसु म़लाय़ओ लेन हाङ्पाआ खो सोमातुक्मा खाङ्अ़मेत्ने! खाना नुलोक त़सिन्तुङु, एफिसस्दा खोसाआ अ़ङ्का ब़द्धे अ़फासाङ्ओ। |
© Wycliffe Bible Translators, Inc. All rights reserved.
Wycliffe Bible Translators, Inc.