२ थेसलोनिकि 3 - बान्तावा राईआन्काओ निम्पाङ यामारानिन 1 हान अ़लुक्मादा, ब़ब़, नाना खोन्कि निछाचि ओ, हाङ्पाओ अ़चुय़ङ च़क्नि फेयाङ्साखात्ने निम्पाङ आन्कान्का यामात्निप़नि, देत्नि आम्नुओ रादाछाङ फेसायुङ्सा। 2 खोन्कि झारा म़नाचि साकोङ्छ़ङ ऩमुनिन्ओसा अ़अ़त्पा खोन्कि अ़त्लोकाच़ म़नाचिएदाङ्का निनाम्हाङ्आ आन्कान्का ऩफोङ्सिन्काने निम्पाङ यामारिन्का। 3 मेन निनाम्हाङ साकोङ्छ़ङ मुमा खान्तुओ म़मुयाङ। खोक्कोसाआ लावामि सावा ऩप़न, खोन्कि अ़अ़त्पादाङ्का ऩरात्तिन। 4 आन्कान्का लोनिओवा खानानिन त़च़न्युङ्सिन्येन, खोन्कि त़च़न्युङ्सिन निकिना आम्नुओ तुक्वादा आन्कान्का हाङ्पाएदा सोम्कुवा मुन्का। 5 हाङ्पाआ आम्नुओ साकोङ्वा निनाम्हाङ्ओ अ़चुसोम्तुक्मा खोन्कि ख्रिस्तओ अ़चुहुङ्मा नुलोक तुप्मादा ऩतित्तिन्ने। झारासा काचि मुमादोत 6 ब़ब़, नाना खोन्कि निछाचि ओ, आन्हाङ्पा येसु ख्रिस्तओ अ़चुऩङ्दा आन्कान्का खानानिन लोनिङ्नि, आन्कान्का खानानिन चिन्माय़ङ्वा मान्काङ्कादा झारा कासो साकोङ्छ़ङ कामुचिदाङ्का अ़थाया युङानिन। 7 देकिनालो खानानिन्आ देत्नि आन्कान्का खेङ्मादोत्ओ, मो खानानिन्आ त़सिन्तुम्योम। आन्कान्का खानानिन्एनान अ़क्नि युङिन्येन्काहिदा मान्सोदान्येन्का। 8 आन्कान्का साङ्कोओछाङ अ़चामायु मोहा मान्चात्प़दोम्का। मेन खानानिन साङ्छाङ दुखा अ़लिनिन्ने निकिना आन्कान्का अ़लेन्खिन्तुम काचि मुन्का। 9 आन्कान्का फामा तोक्मा पाङ मात्द़ङ्ओसा माआङ, मेन खानानिन्आ आन्कान्का खेङ्मा अ़मात्ऩङ लिने निकिना मोत्नि आन्कान्का च़न्का। 10 आन्कान्का खानानिन्एनान अ़क्नि युङिन्येन्काहिदा आन्कान्का खानानिन “साङ काचि अ़मुनिन, मोसाआ चा चामा अ़नुनिन”नि लोनियुङ्नि। 11 मेन आम्नुओ रादा देम्कापाङ कासोचि म़युङ्याङ्नि आन्कान्का एनुम्योम्का। मोचि काचि मुमा अ़चुऩङाछित, खोन्कि नि म़नाचिओ अ़चुकाचिदा सोज्जे छुक अ़पाक। 12 हान आन्कान्का ओवाको म़नाचि हाङ्पा येसु ख्रिस्तओ अ़चुऩङ्दा लोम्च़म्का, खोन्कि यायोक प़म्च़म्का, मोचि चामा ह़ङ्माओ निम्पाङ वाइवेत काचि म़मुने। 13 ब़ब़, नाना खोन्कि निछाचि ओ, खानानिन अ़नुवाक काचि मुमा देम्खाछाङ त़होत्तिमिन्ने। 14 ओ छाप्लावादाओ आन्काओ लोमाय़ङ्वा साङ मुमा छुन्नालो मो म़ना सिन्तायुङ्सानुम। मोचिएनान मान्तोङ्दानिन, खोन्ओसा मोचि लेजो म़लिने। 15 खोन्नुछाङ मोचि ङेन्चिवा मान्मित्दानुम्च़म, मेन ब़ब़ नाना निछावा यायोक पुवानुम्च़म। आदेङ्ओ सेवा 16 हान सेवाङ्निओ हाङ्पाआ खानानिन अ़धुन खोन्कि झाराकापाराआ सेवाङ्नि ऩमुन्ने। हाङ्पा खानानिन झाराएदा म़युङ्ने। 17 अ़ङ्का पावल, अ़ङ्छुक्आङा नुकोङ्ला सावा छाप्तुङ्योङ। झारा अ़ङ्छाप्लावाओ अ़सिन्खा ओङा ओ। ओवात्निङा अ़ङ्का छाप्ङाङा। 18 आन्हाङ्पा येसु ख्रिस्तओ अ़चुसोम्तुक्मा खानानिन झाराएदा युङ्ने। |
© Wycliffe Bible Translators, Inc. All rights reserved.
Wycliffe Bible Translators, Inc.