२ थेसलोनिकि 1 - बान्तावा राईख्रिस्तओ अ़चुछ़ङ्छेन्मा 1 पावल, सिलास खोन्कि तिमोथिएदाङ्का आन्निनाम्हाङ पापा खोन्कि हाङ्पा येसु ख्रिस्तदा साकोङ्छ़ङ कामु थेसलोनिकेदाओ साम्भुङ्एदा ओ छाप्लावा छाप्तुम्का। 2 आन्निनाम्हाङ पापा खोन्कि हाङ्पा येसु ख्रिस्तएदाङ्का सोम्तुक्मा खोन्कि सेवाङ्नि लिसानिन! आलाङ खोन्कि यामात्मा 3 ब़ब़, नाना खोन्कि निछाचि ओ, आम्नुओ निकिना अ़धुन आन्कान्का निनाम्हाङ आलाङ प़माङादोत, देकिनालो आम्नुओ सोम्कुवा च़लोक पोन्याङ, खोन्कि अ़क्छा निएदा झारासोओ आम्नुओ सोम्तुक्मा पोन्याङ। 4 खोन्ओसा खानानिन्आ आङ्माय़ङ खोन्कि झारा दुखाचिदाओ सोम्कुवा मुमाय़ङ खोन्कि अ़चाअ़त्माचि खानानिन्आ त़आङ्तुम्योम्ओ अ़तुक्वादा तोक्पो लियाङ्सा निनाम्हाङ्ओ नि अ़चुसाम्भुङ्चि आन्कान्का खाएत्तुम्च़म्का। 5 ओ झारासा निनाम्हाङ्ओ अ़चुछ़ङ्छेन्मा साम्योक्मि मुयाङ्ओ खाङ्मुसु। खोन्ओसा निनाम्हाङ्ओ अ़चुहाङ्होन्दा खानानिन अ़नुवाक ऩकाइसिन, मोसोओ निम्पाङ खानानिन्आ दुखाछाङ त़आङ्तुम्योम। 6 निनाम्हाङ अ़धुन तोङ्लो छ़ङ म़छेन, खानानिन दुखा काप़चि खोक्कोसाआ दन्दा म़प़चि, 7 खोन्कि खानानिन दुखा कातोक्चि आन्कान्काएनान अ़क्नि सावा त़तोम्सिन। हाङ्पा येसु ख्रिस्त अ़चुसावापोरिओ निनाम्हाङ काफाचिएनान लेत्याङ्ओ मिदा निनाम्मादुङ्का खाङ्म़मुनान्चिन्हिदा खोक्कोसाआ ओ अ़मु। 8 निनाम्हाङ मान्सिन्कादाचि खोन्कि आन्हाङ्पा येसु ख्रिस्तओ अ़चुनुय़ङ्खान मान्लोक्कादाचि खोक्कोसाआ दन्दा म़प़चि। 9 मोचिआ अ़धुन अ़लुक्निन्ओ दन्दा अ़आङ, खोन्कि हाङ्पाओ अ़चुबुदाङ्का खोन्कि खोक्कोसोओ अ़चुसावाओ साम्दाङ्का म़लोइसुखाइसुचि। 10 मो लेन खोक्कोसोओ अ़चुम़नाचिएदाङ्का साया मेत्लुसि खोन्कि खोक्कोएदा साकोङ्छ़ङ कामुचिएदाङ्का चोन्लुसि म़ता। खोन्कि खानानिन्छाङ मो साकोङ्छ़ङ कामुचिएदा त़याइन, देकिनालो आन्काओ सालुम्स़ङ्दा खानानिन साकोङ्छ़ङ त़मुम। 11 खोन्ओसा आम्नुओ निकि आन्कान्का अ़धुन यामारिन्का, आन्निनाम्हाङ्आ खानानिन ऩबुत्तिन्ओदा अ़नुवाक ह़ङ्म़ङ ह़ङ ऩमेत्तिन्ने। खोन्कि झारा आम्नुओ अ़नुवाक मित्चिऩङ खोन्कि साकोङ्छ़ङ्ओ काचि खोक्कोसोओ अ़चुसावालाम्पा ऩयाङ्सिन्प़न्ने। 12 खोवात्निओसा आन्निनाम्हाङ खोन्कि आन्हाङ्पा येसु ख्रिस्तओ अ़चुओ सोम्तुक्मालाम्पा आन्हाङ्पा येसु ख्रिस्तओ अ़चुऩङ खानानिन्एदा लोङ्ने, खोन्कि आम्नुओ ऩङ्छाङ ख्रिस्तएदा लोङ्ने। |
© Wycliffe Bible Translators, Inc. All rights reserved.
Wycliffe Bible Translators, Inc.