२ पत्रुस 2 - बान्तावा राईसोज्जेओ काचिन्पाचि खोन्कि मोचिओ अ़चुलुक्मा 1 देत्नि म़नाचिओ अ़चुरादाछाङ सोज्जेओ निनाम्हाङ्य़ङ खाकालुचि म़युङाङा, मोवात्निङा आम्नुओ रादाछाङ सोज्जेओ काचिन्पाचि म़याक। मोचिआ मान्सिन्माङ सोज्जेओ लुक्खा ताया ऩचिन्तिन। ओदातारि हे तोक्पो अ़चुहाङ्पाछाङ मोचिआ ऩङाअ़छित, खोन्कि आप्पिएदा च़क्नि लुक्मा अ़तात। 2 खोन्कि ब़द्धेकापाङ्आ मोचिओ अ़चुअ़अ़त्पालाम अ़त़ङ, खोन्किना मो सोज्जेओ काचिन्चिओसा म़नाचिआ अ़छ़ङ लाम अ़सुङ। 3 च़क्ख़य़दा म़छुक्किना मो सोज्जेओ काचिन्पाचिआ सोज्जेओ य़ङ्चिलाम्पा आम्नुओ छेन्बि ऩच़न्तिन। मोचिओ अ़चुछ़ङ्छेन्मा निनाम्हाङ्आ अ़छ़ङ लिसायुङ्सा, खोन्कि मोचि अ़नुछ्याङा म़लुक। 4 निनाम्हाङ काफाचि हेवा म़मुवाहिदा निनाम्हाङ्आ मोचि मान्लेत्म़दोचि, मेन मोचि सित्म़ङ्चि दुखा तोक्खायु म़वेइसुदिसुचि, खोन्कि छ़ङ्छेन्माओ लेन्तारिओ निम्पाङ हेन्खामा भेन्युओ कुन्चियाधेक्धेक्ओहुत्दा म़छ़सुयुङ्सुचि। 5 निनाम्हाङ्आ बुयाओ हेन्खामाछाङ मान्लेत्अ़दा, मेन निनाम्हाङ मान्लोक्कादाचिएदा वाधुप अ़ताराहिदा साम्योक्मि खाकालु नोआ खोन्कि नि सात्कापाङ म़रात्तुचि। 6 निनाम्हाङ्आ सदोम खोन्कि गमोरा सहराचिओ दित्छाङ मान्युङ्माङ मिआ म़राङ्तुखाइसुचि, खोन्कि निनाम्हाङ मान्लोक्कादाचिओ अ़चुबुदा मोचि अ़क्तात अ़मात्ऩङ म़मुचि। 7 खोन्कि खोक्कोसाआ अ़त्लोकाच़चिओ अ़चुहात्मादाङ्का चाअ़त्लो दुखादा छुक्ताओ साम्योक्मि लोत अ़लेइसा। 8 खो म़नाचिओ अ़चुरादा युङाङाहिदा खोन्कि अ़लेन्खिन्तुम मोचिओ अ़त्लो अ़चुकाचि खा, खोन्कि एनुकि खोसोओ अ़साम्योक्मि लावादा अ़कोङ चाअ़त्साङा। 9 ओवात्नि निनाम्हाङ काब़क्चि चिन्माखाङ्मादाङ्का लेइसि खोन्कि मान्साम्योक्मिचि दन्दा प़माचि निम्पाङ छ़ङ्छेन्माओ लेन्तारि देत्नि रात्मायुङ्माओ, हाङ्पा म़लेयाङ। 10 खा-खाक्कोचि अ़चुपोक मित्माआ म़पोप्नान्चिन, खोन्कि निनाम्हाङ्ओ अ़चुपाङ ऩङाअ़छित, निनाम्हाङ्आ झारादाङ्का मोचि अ़च़वाङ दन्दा म़प़चि। ओवाको सोज्जेओ ताया काचिन्चि खामान्सिन खोन्कि ऱक्भाक म़मु, खोन्किना निनाम्मादु कायुङ्चि सुङ्मा अ़चुक़मा अ़कात्निन। 11 निनाम्हाङ काफाचि सोज्जेओ काचिन्पाचिदाङ्का ब़द्धे सावापोरिओ खोन्कि तोक्पो म़मुयाङ, खोन्नुछाङ हाङ्पाओ अ़चुबुदा मोचिआ सोज्जेओ काचिन्पाचि सुङ्मा राक ऩमुनिन। 12 मेन ओ म़नाचिआ ऩतुप्तुन्ओ य़ङ्चि म़सुङ्तुचि। ओचि अ़चुखारु मात्द़ङ्ओ सायाम्पोक्चिवात्नि म़मुयाङ, ओचि लाप्माकि सेत्मा निम्पाङ म़लिसाओवा म़मुयाङ। खोन्कि ओचिछाङ सायाम्पोक्चिवाङा म़लुक्खात। 13 मोचिआ नि म़नाचि दुखा म़प़चिवात्नि मोचिआछाङ दुखा आङ्मादोत। मोचिओ अ़चुमिन्मादा अ़खोलेन्ङा कुक्भुक्नि चामा खोन्कि दुङ्मा अ़चुऩङानु। आम्नुओ रादा मोचि लेजो खोन्कि सायापेप्माय़ङ ओ। मोचि आम्नुओ यावायोक खाबाचादा चासि त़युङिन्हिदाछाङ धान्मा अ़चुऩङानु। 14 मोचिओ अ़चुम़क अ़धुन्ङा काचान्चा चेत्छामाचिएदा अ़पाक खोन्कि हेवा मुमादाङ्का देम्खाछाङ अ़चुसोम अ़स़निन। मोचिआ चाप्चिरोङ म़नाचि थालिदा म़धान्तुचि। मोचिओ अ़चुसाकोङ्वा च़क्ख़य़ मुमा म़चिन्तुयुङ्सुचि। मोचिएदा निनाम्हाङ्ओ अ़चुमाङ्हिम छुक। 15 मोचिआ अ़नुवाक लाम अ़छिराकि अ़अ़त्पा लाम्दा म़वाङायुङ्सा। अ़अ़त्पादाङ्का तोक्माय़ङ काचिलुङ अ़नुवाक कामित बओरओ अ़छा बालाम मोचिआ अ़त़ङ्तायुङ्सा। 16 मेन खोसोओ अ़हेवाआ खो पात्चालुवा। मान्चेप्कादा गधा म़नाओ अ़य़ङ्दा चेवाकि मो खालाकाह़ अ़हिम्मा छेक्तु प़। 17 मोचि सिप्तुदोओ चाक्वाओ अ़लोन्खावा म़मुयाङ। मोचि कुह़क्माआ मुत्तुखात्तुओ य़वारिवाको म़मुयाङ। मोचिओ निम्पाङ निनाम्हाङ्आ कुन्चियाधेक्धेक्ओ कुन्यामा अ़च़क्तायुङ्सा। 18 मोचि ऱक्भाक्एनान तोक्पो-तोक्पो खामान्सिन य़ङ म़मु, खोन्कि राक्काभाला अ़अ़त्पा लाम्दाङ्का म़लासाताओचि मोचिआ पोक मित्माय़ङ थालिदा म़धान्तुचि। 19 मो सोज्जे काचिन्पाचिआ म़नाचि “फोङ”नि ना म़हिप्तुचि, मेन मोचि आप्पिङा अ़अ़त्पा च़माथाङ्माओ अ़हारुक म़मुयाङ। देकिनालो खाक्को य़ङ्आ म़ना क़म्तु, मो म़ना मोसोओङा अ़हारुक लि। 20 मेन मोचि आन्हाङ्पा खोन्कि कालेन्पा येसु ख्रिस्त अ़सिन्किछाङ हेन्खामादाओ अ़अ़त्पा य़ङ्चिदाङ्का म़फ़न्नान्चिन्कि हेवादा म़लावाङ खोन्कि मोसाआ क़म्तुचिनालो मोचि बुयाओदाङ्का आदेङ च़लोक अ़त्लो म़लि। 21 देकिनालो मोचि म़प़चिओ सेङ्याङ्ओ लोमाय़ङ अ़सिन्ताकिछाङ देङ्सा लामादाङ्का ना मोचिआ साम्योक्मि लाम देम्खाछाङ मान्सिन्अ़दाओ खाङ्दे नुलोक लिसाओ। 22 ओ मोचिएदा अ़नुछ्याओ दोय़ङ्लावा तालायुङ्सा, “कुतिवाआ अ़पेत्मा लासुचा” खोन्कि “वाचाङ्साओ भाक्मामा लेतेतेवाओ बाखादाङा लाताकि पुलिनाम्ताङ मेत।” |
© Wycliffe Bible Translators, Inc. All rights reserved.
Wycliffe Bible Translators, Inc.