२ पत्रुस 1 - बान्तावा राईपत्रुस्दाङ्का सेवा 1 येसु ख्रिस्तओ अ़चुहारुक खोन्कि छाम्माय़ङ सिमोन पत्रुस्दाङ्का, आन्निनाम्हाङ खोन्कि कालेन्पा येसु ख्रिस्तओ अ़चुसाम्योक्मिदा आन्काओवाको अ़लुङ छुक्ओ अ़क्निवा सोम्कुवा कामुचिएदा ओ छाप्लावा छाप्तुङ्योङ। 2 निनाम्हाङ्ओ खोन्कि आन्हाङ्पा येसुओ अ़चुतायादा सोमातुक्मा खोन्कि सेवाङ्नि खानानिन्एदा च़लोक पोन्याङ्सा खात्ने। ख्रिस्तओ अ़चुबुत्मा खोन्कि अ़चुछेन्मा 3 खोक्कोसोओ अ़चुसावालाम्पा आन्कान ह़ङ्म़ङ खोन्कि साम्योक्मिदा दोत्ओ झारा सामाचि आन्कान म़पुवायुङ्सा। खोक्कोसोओ आप्पिओ अ़चुसाम खोन्कि अ़च़वाङ्लाम्पा आन्कान म़बुत्तायुङ्साओ निनाम्हाङ आन्कान सिन्तुम्ओसा ओ झारा सामाचि तोक्तुम। 4 ओलाम्पाङा अ़लुङ्स़रिओ खोन्कि तोक्पो अ़चुहिप्माय़ङ्चि आन्कान म़पुवायुङ्सा, खोन्ओसा ओ हेन्खामादाओ पोप्माय़ङ अ़अ़त्पा मित्माचिदाङ्का फुङ्सानिन खोन्किना खानानिन निनाम्हाङ्ओ अ़चुच़माथाङ्मादा वाङानिन। 5 मोवात्निओसाआङा, झाराकापाराओ मुमालाम्पा आम्नुओ साकोङ्छ़ङ्दा अ़नुवाक नुमा खोन्कि अ़नुवाक नुमादा ताया तेप्तानुम। 6 तायादा क़म्तानिन्चिन खोन्कि क़म्मान्चिन्दा आङ्मा, आङ्मादा साम्योक्मि, 7 साम्योक्मिदा साकोङ्छ़ङ कामुचि सोम्योक्मा, साकोङ्छ़ङ कामुचि सोम्योक्मादा सोम्तुक्मा तेप्तानुम। 8 देकिनालो ओ य़ङ्चि खानानिन्एदा च़लोक म़युङ्याङ्नालो आन्हाङ्पा येसु ख्रिस्त सिन्मा काचिदा खानानिन कासो त़लिमिन माङ्नालो अ़सिवा मान्सिकादा त़लिमिन। 9 मेन साङ्एदा ओ य़ङ्चि मात्द़ङ्चि, खोसाआ बुयाओ अ़हेवाचिदाङ्का सेङाओ य़ङ मान्तुकेसुकि दोप्म़क माङ्लो अ़थाया मान्खाङ्कादा लि। 10 खोन्ओसा, ब़ब़, नाना खोन्कि निछाचि ओ, खानानिन बुत्माय़ङ खोन्कि छेन्माय़ङ अ़छ़ङ मुमाओ निम्पाङ च़लोक राक मुवानिन, देकिनालो खानानिन मोवात्नि त़च़न्नालो खानानिन देम्खाछाङ त़धाम्सिमिन। 11 खोन्नालो खानानिन आन्हाङ्पा खोन्कि कालेन्पा येसु ख्रिस्तओ अ़धुन्ओ अ़चुहाङ्होन्दा अ़धिवो साऩङ्वाएनान वाङ्मा त़तोक्तुम। साम्कालिन्ओ निनाम्हाङ्य़ङ खालुमा 12 खोन्ओसा खानानिन ओ झारा त़सिन्तुम्योम, खोन्किना खानानिन्आ त़तोक्तुम्ओ अ़छ़ङ्दा त़युङिन्येन्नुछाङ अ़ङ्का ओ य़ङ्चि अ़धुन खानानिन मित्मेत्नानिन। 13 अ़ङ्का ओ अ़ङ्पोक्दा युङ्ङाङाओन खानानिन अ़धुन मित्मेत्मायुङ्मा नुलोक लिनि अ़ङ्का मिन्ङा। 14 देकिनालो अ़ङ्का सिन्तुङ्योङ, आन्हाङ्पा येसु ख्रिस्तआ अ़ङ्पोक छित्मा ग़रि च़क्निङा तायाङ निकिना खाङ्ऩमेत्ताङ्युङ्साङ। 15 अ़ङ्का स़ङाकिछाङ ओ य़ङ्चि अ़धुन मित्मा रुवानुम्च़म निकिना अ़ङ्का चाअ़त्लो काचि मुङा। ख्रिस्तओ अ़चुसाम्ओ अ़सालुम्स़ङ 16 देकिनालो आन्कान्का खानानिन आन्हाङ्पा येसु ख्रिस्तओ अ़चुसावा खोन्कि म़लातायाङ्ओ नुय़ङ्खान खाएत्निङ्निहिदा चाप्चाएनान मुमाय़ङ वाहिराङ्मित्चि आन्कान्का मान्त़ङ्दोम्च़म्का, मेन खोक्कोसोओ तोक्पो अ़चुसावा काखाङ आन्कान्का सालुम्स़ङ युङिन्येन्का। 17 मो तोक्पो सावापोरिओ निनाम्हाङ्आ “ओक्को अ़ङ्का सोमातुक्तुङ्योङ्ओ अ़ङ्छा ओ, खोक्कोएदा च़लोक अ़ङ्ऩङानुवायुङ्सा”नि येसु म़य़ङाहिदा खोक्कोसाआ निनाम्हाङ पापाएदाङ्का साया खोन्कि ऩङ्चोन्मा अ़तोक्ता। 18 मो सेङ्याङ्ओ भ़ऱदु खोक्कोएनान आन्कान्का युङिन्येन्काहिदा निनाम्मादुङ्का ताओ ओ य़ङ्छाम आन्कान्का आप्पिङा एनुम्काओ। 19 खोन्कि निनाम्हाङ्य़ङ खाकालुचिओ अ़चुय़ङ आन्कान्एदा च़लोक सोम्कुवा मुमा खान्तुओ मुयाङ। देकिनालो फ़ऱऱवा खादात्याङ्ओ लेन मान्तायुक्तारि खोन्कि आम्नुओ साकोङ्वादा अ़वाय़ङ्ओ साङ्केन्मा मान्लोन्युक्तारि कुन्यामादा लेत्याङ्ओ कुपिवा खानानिन्आ ओ य़ङ्दा नुलोक मिन्मा पाक्तानुम। 20 झारादाङ्का बुया खानानिन्आ ओ य़ङ तुप्मादोत, झारा साम्कालिन्दाओ निनाम्हाङ्य़ङ खालुमाय़ङ म़नाआ आप्पि खालुसुओ माआङ। 21 देकिनालो म़नाओ अ़मिन्मादाङ्का देम्खाछाङ निनाम्हाङ्य़ङ मान्ता, मेन सेङ्लावाआ म़नाचि म़तित्तुचि खोन्कि निनाम्हाङ्दाङ्का म़चेवा। |
© Wycliffe Bible Translators, Inc. All rights reserved.
Wycliffe Bible Translators, Inc.