२ कोरिन्थि 7 - बान्तावा राई1 खोन्ओसा सोमातुक्निङ्निओ यावाचि ओ, आन्कान्एदाओ हिप्माय़ङ्चि म़युङ्याङ्ओसा आन्पोक खोन्कि आन्लावा झारा पोप्मादाङ्का आन्कान आप्पि सेङ्सिन्चिन्ने, खोन्कि निनाम्हाङ्ओ अ़चुकित्मादा झारा सेङिन्ने। पावल्ओ अ़ऩङानुमा 2 आन्काओ निम्पाङ आम्नुओ साकोङ्वाचि होत्निप़नि। आन्कान्काआ साङ्छाङ अ़त्लो मान्मुयुक्तुम्का। आन्कान्काआ साङ्छाङ अ़अ़त्पादा मान्तित्युक्तुम्का। आन्कान्काआ साङ्छाङ मान्च़न्युक्तुम्का। 3 खानानिन लाहिपाक्मा निम्पाङ अ़ङ्का ओ लोनानिन्ओ माआङ। देकिनालो अ़ङ्का बुयाङा लोनायुङ्नानिन, आन्काओ साकोङ्वाचिदा खानानिन त़याइन्येन। आन्कान्का स़न्का, खोन्कि ह़ङिन्कानुछाङ खानानिन्एनान युङिन्का। 4 खानानिन्एदा अ़ङ्को अ़धिवा सोम्कुवा याक्याङ। खानानिन्एदा ब़द्धे अ़ङ्ऩङानुङाङान्च़ङ। अ़न्नुनु अ़ङ्सोम्सुवायुङ्सा। झारा आन्काओ दुखादा च़लोक अ़ङ्ऩङानुवायुङ्सा। 5 आन्कान्का माकेदोनियादा बानिन्काहिदा आन्कान्का सावातोम्मा मान्तोक्दोम्का। मेन झारादात्निङ्का आन्कान्काएदा दुखा तायुङ्सा, बुङ्खादा ङेन खोन्कि साकोङ्वाहुत्दा क़मा। 6 मेन अ़चुराक सुवाओचि सोम्कासेत निनाम्हाङ्आ तितस्ओ अ़तामालाम्पा आन्कान्का राक ऩप़न्युङ्सिन्का। 7 खोसोओ अ़तामाआ ओन्ङा माआङ, मेन सोम्सेत्माआछाङ, मो सोम्सेत्मा खोसाआ खानानिन्एदाङ्का तोक्तुओ। अ़ङ्का तुप्मा आम्नुओ अ़धिवा मिन्माओ अ़तुक्वादा खोसाआ आन्कान्का अ़लोन्का। अ़ङ्को निम्पाङ आम्नुओ सोखाओ अ़तुक्वादा खोन्कि अ़ङ्काएदाओ आम्नुओ ब़द्धे सोम्तुक्माओ अ़तुक्वादाछाङ खोसाआ खाअ़एत्तिन्का। खोन्ओसा अ़ङ्का च़लोक अ़ऩङानुवायुङ्सा। 8 अ़ङ्छाप्लावालाम्पा आम्नुओ मिन्मा तुआ, खोन्नुछाङ अ़ङ्मिन्मा मान्तुक्युक। बुयाना अ़ङ्मिन्मा तुआओङा ओ। मेन ओन्ग़रि मो अ़ङ्छाप्लावाआ अ़क्चित लेन्तारि ओन्ङा आम्नुओ मिन्मा तुआओ अ़ङ्का सिन्तुङ। 9 आम्नुओ राक सेत्नानिन निकिना अ़ङ्का अ़ऩङानुवाओ माआङ, मेन आम्नुओ राक सुवाओसाआ खानानिन निनाम्हाङ्एदा त़लासिन्लो त़मुन निकिना ओ। देकिनालो निनाम्हाङ्ओ अ़चुमिन्मावाङा आम्नुओ राक सेरा ओ, खोन्ओसा आन्कान्काएदाङ्का खानानिन्आ दित्छाङ तुत्ता आङ्मा मान्दोत। 10 देकिनालो निनाम्हाङ्आ तारुओ राक स़माआ लेन्माओ निम्पाङ मिन्मालामादा म़तित, खोन्ओसा मिन्मालामा अ़दोत्निन, मेन हेन्खामादाओ राक स़माआ स़खादा म़खात। 11 खानुम, हान खानानिन्एदा ताओ दुखादा निनाम्हाङ्आ दे ऩमुन्युङ्सिन, मित्तानुम। ओ य़ङ्आ खानानिन अ़छ़ङ काचि मुमा राक ऩप़न्युङ्सिन, ओ यङ्आ खानानिन्आ दित्छाङ मान्फित़युक्तुम्नि अ़छ़ङ खाङ्मुसु। खानानिन आम्नुओ माइसुङ्कात्लो ऩमुन्युङ्सिन। देम सोखा, दियाको मिन्मा, दियाको ब़क्मामिन्मा लोइसु। हेवा कामुएदा आम्नुओ माइसुङ्कारायुङ्सा। ओ झारादा फिमा मात्द़ङ्निओ य़ङ खानानिन्आ त़काइसुम। 12 अ़ङ्का मो छाप्लावा काफिचि लाहि पाक्माचिओ निम्पाङ माङ्लो काफिएदाङ्का मिन्मातुक्मा तोक्माओ निम्पाङ छाप्तुङ्ओ माआङ। खानानिन्आ ना निनाम्हाङ्ओ अ़चुबुदा आन्काओ निम्पाङ अ़नुछ्याङा देम खान्नुलो त़ब़त्निङ्निनिओ य़ङ नुलोक खाङ्मुमा छाप्तुङ्ओ। 13 खोन्ओसा आन्कान्का ओ झारालाम्पा राक तोक्तुम्युङ्सुम्का। आन्कान्का तोक्तुम्काओ राक्दाङ्का च़लोक तितस्ओ अ़सेवाङ्निदा आन्काओ ऩङानुवा। देकिनालो खानानिन झारालाम्पा खोसोओ अ़मिन्मा चानुवायुङ्सा। 14 देकिनालो खोसोओ अ़बुदा आम्नुओ तुक्वादा तोक्पो लिसाङ्नुछाङ, अ़ङ्का खानानिन्आ लेजो मान्मेत्त़दाङ्ऩङ। मेन देत्नि आन्कान्का खानानिन लोनिओ झारा य़ङ्चि अ़छ़ङ म़मुवाङा, मोवात्निङा तितस्ओ अ़बुदा आम्नुओ तुक्वादा आन्कान्का तोक्पो लिसिन्काओ य़ङ्छाङ अ़छ़ङ लिसायुङ्सा। 15 खानानिन झारासा लोमावा त़च़न्ओ खोन्कि खानानिन्आ कित्याङ्सा खोन्कि सायामेत्याङ्सा खो साऩङ्वा त़मेत्तुम्ओ मित्तुहिदा खोसोओ अ़साकोङ्वादाओ सोम्तुक्मा खानानिन्एदा च़लोक पोन्ता। 16 अ़ङ्को अ़ङ्ऩङानु, देकिनालो खानानिन्एदा झारा अ़ङ्सोम्कुवा याक्याङ। |
© Wycliffe Bible Translators, Inc. All rights reserved.
Wycliffe Bible Translators, Inc.