२ कोरिन्थि 3 - बान्तावा राई1 दि आन्कान्का आप्पि लासिन्चोन्तिन्येन्चिन्का? माङ्लो दि खा-खाक्को म़नाचिवा खानानिन्एदा माङ्लो खानानिन्एदाङ्का आन्कान्का कान्माय़ङ छाप्लावा दोत कि? 2 खानानिन आप्पिङा आन्काओ कान्माय़ङ छाप्लावाचि ओ। झारा म़नाचिआ लेमा खोन्कि खिप्मा निम्पाङ आम्नुओ साकोङ्वाचिदा मो छाप्तायुङ्सा। 3 खानानिन ख्रिस्तआ आन्काओ काचिलाम्पा ऩछाप्तिन्ओ अ़चुछाप्लावाचिओ निओ य़ङ छेङ्छेङ्छेङ्वा मुयाङ। ओ छाप्लावा च़क्मावाआ माआङ, मेन अ़ह़ङ निनाम्हाङ्ओ अ़चुलावालाम्पा छाप्ताओ। लुङ्ओ छाप्खाचिदा माआङ, मेन म़नाओ अ़चुसाकोङ्वाचिदाओ छाप्खाचिदा। 4 आन्काओ ओवाको सोम्कुवा ख्रिस्तलाम्पा निनाम्हाङ्एदा याक्याङ। 5 आन्कान्का आप्पिआ ओवाको काचि मुमा अ़खान्तिन्कानि मित्मै अ़मित्तिमिन्चिन्का, मेन ओवाको काचि मुमा आन्काओ पाङ निनाम्हाङ्एदाङ्का ता। 6 अ़ऩङ्वा हिप्माय़ङ्दा खोक्कोसाआ आन्कान्का काचि मुमा काऱ काब़त्वा ऩमुन्युङ्सिन्का। छाप्माय़ङ य़ङ्हुप्आ माआङ, मेन सेङ्लावादा। देकिनालो छाप्माय़ङ य़ङ्हुप्आ ना म़सेत, मेन सेङ्लावाआ ह़ङ्म़ङ म़प़। अ़ऩङ्वा हिप्माय़ङ्ओ साम 7 लुङ्ओ छाप्खाचिदा छाप्तुओ मो य़ङ्हुप ओवात्नि साम लिसा ताकिना मो साम्आ निनाम्हाङ्य़ङ खाकालु मोसाओ अ़ङाइवा लेराङाओसा इस्राएलिचिआ खाङ्मा मान्ऱअ़दा। खोन्नुछाङ मो साम माखात्याङ्सा खाराङा। स़मा कातात य़ङ्हुप्नुछाङ ओवाको साम लिसा तानालो ना, 8 दि सेङ्लावाओ अ़चुकाचि ओदाङ्का च़लोक साम्स़रिओ अ़लिनिन कि? 9 काह़त य़ङ्हुप साम्स़रिओ मुवाङानालो साम्योक्मि काकान काचि मोदाङ्का च़लोक साम्स़रिओ मु। 10 अ़नुछ्याङा खाक्को अ़क्दु साम्स़रिओ मुवाङा, मोदाङ्का काछो साम ताओसाआ हान मो बुयाओ साम मात्द़ङ। 11 देकिनालो थुत्मेत्लो युङाओ साम्दा मोवात्नि लेराङानालो अ़धुन युङ्युङ्ओदा देम च़लोक साम्स़रिओ मु। 12 खोन्ओसा, आन्काओ ओवाको सोम्कुवा मुयाङ्ओसा अ़न्नुनु आन्काओ राक याक्याङ। 13 आन्कान मोसावाको माआङ, खोसोओ माखात्याङ्सा खाराङाओ अ़साम इस्राएलिचिआ आदेङ्ओदु ऩखान्ने निकिना अ़ङाइवादा मुन्जेत्आ दिप्तुङु। 14 मेन मोचिओ अ़चुसाकोङ्वा छाक्ताखारायुङ्सा, आय़ओ लेन्तारि बुयाओ हिप्माय़ङ खिप्हिदा मो मुन्जेत मान्होङ्माङ युङ्युङ। देकिनालो मो मुन्जेत ख्रिस्तलाम्पा ओन्ङा लात्खान। 15 उवा, आइमित्तारि मोसाओ अ़य़ङ्हुप मोचिआ अ़खिप्हिदा अ़चुओ साकोङ्वाचिदा मुन्जेत्आ दिप्तुङु। 16 मेन अ़क्छा म़ना हाङ्पाएदात्नि लानान्चिन्हिदा अ़मुन्जेत लात्खान। 17 हान हाङ्पा लावा म़मुयाङ, खोन्कि खादा निनाम्हाङ्ओ अ़चुलावा म़युङ्याङ, मोदा हाङ्पाओ अ़चुलावाआ आन्कान म़फोङ। 18 खोन्कि आन्कान झारा मुन्जेत लाराखाइसाओ ङाइवाचिआ हाङ्पाओ अ़चुसाम खाङ्मुसुम। खोन्कि आन्कान खोक्कोसोओ अ़चुसाम्दा च़लोक्वा फान्याङ्सा खारिन। ओ हाङ्पाएदाङ्का ता, खोक्को सेङ्लावा ओ। |
© Wycliffe Bible Translators, Inc. All rights reserved.
Wycliffe Bible Translators, Inc.