१ तिमोथि 6 - बान्तावा राई1 हारुक्ओ कोम्दा कायाक झारासाआ आ-आप्पि अ़चुहाङ्पाचि ब़द्धे सायामेत्मा खान्तुचिओनि मित्माचिदोत। मोवात्नि निन्माहाङ्ओ अ़चुऩङ खोन्कि आन्चिन्माय़ङ ऩसुङ्तुन। 2 हारुक्चिआ साकोङ्छ़ङ कामु अ़चुहाङ्पाचि मोचि साकोङ्छ़ङ्दा बुवा, नाना खोन्कि निछाचिओसा सायामेत्मा ऩङाछित्मा अ़नुनिन। मेन खोचिआ मोचिओ नुलोक अ़चुकाचि मेत्माप़माचिदोत, देकिनालो मोचिआ अ़मुवाओ अ़चुकाचिओ अ़सिवा खोचिआ सोमाअ़तुक्ताओ साकोङ्छ़ङ कामु अ़चुहाङ्पाआङा तोक्तु। ओ य़ङ्चि मुमा खाना चिन्तुचि खोन्कि यायोक प़चि। चासुम्छेन्बि सोमातुक्मा 3 साङ्आ सोज्जेओ य़ङ्चि चिन्तुचि खोन्कि आन्हाङ्पा येसु ख्रिस्तओ अ़छ़ङ य़ङ्चि खोन्कि साम्योक्मिवात्निओ चिन्माय़ङ्एनान अ़तोङ्निन्नालो, 4 खो ऱक्भाक ओ, खोन्कि दित्छाङ अ़तुप्तुन। खो दुम्तुमादा अ़ऩङानु, खोन्कि य़ङ्सिवाचिओ अ़तुक्वादा दुम्छ़न। मोसाआ माइसुङ, खिमा, सुङ्मा खोन्कि अ़अ़त्पा मान्केङ्चि लोइसुचि। 5 ओ म़नाचिआ अ़धुन खिखा अ़लोन। अ़चुओ मिन्मा अ़ओङ्सायुङ्सा, खोन्कि मोचिआ अ़छ़ङ देङ्अ़ह़त्तायुङ्सा। मोचिओ निम्पाङ साम्योक काचि ना दुप्खा लाम ओन्ङा ओनि म़मिन। 6 मेन सोम्स़माएनान्ओ साम्योक्मिङा आप्पिदा तोक्पो चासुम्छेन्बि ओ। 7 देकिनालो आन्कान ओ हेन्खामादा दित्छाङ मान्तात्दोम, खोन्कि आन्कान ओदाङ्का दित्छाङ अ़खात्तिमिन। 8 मेन आन्कान्एदा चामायु खोन्कि हुम्मायु युङ्याङ्नालो आन्कान मोदाङा आन्सोम्सेत्तिन्चिन्ने। 9 मेन खाक्को म़नाचि कातोक लिमा म़लाम, मोचि चिन्माखाङ्मादा म़छुक, खोन्कि वाय़दा म़धा खोन्कि ब़द्धे खामान्सिन खोन्कि क़माकात्तुओ मिन्मादा म़वाङ। मोसाआ म़नाचि चिन्मा खोन्कि लुक्मादा सारुचि। 10 देकिनालो याङ सोमातुक्माङा झारापाराओ अ़अ़त्पाओ अ़भेन ओ। याङ्ओ च़क्ख़य़दा म़छुक्ताकि खा-खाक्कोचि साकोङ्छ़ङ्दाङ्का नि लाम्दा म़वाङायुङ्सा, खोन्कि ब़द्धे दुखाचिआ मोचिओ अ़चुसाकोङ्वाचि धुउयुङ्सु। तिमोथिओ लोमाय़ङ 11 मेन खाना निनाम्हाङ्ओ अ़चुम़ना, ओ झारादाङ्का अ़थाया युङा, खोन्कि साम्योक, निनाम्हाङ ब़क्मा, साकोङ्छ़ङ, सोमातुक्मा, हुङ्मा, खोन्कि सिम्मान्चिन्ओ मित्चिऩङ मुवा। 12 साकोङ्छ़ङ्ओ अ़नुवाक ङेन मुवा। अ़लुक्निन्ओ ह़ङ्म़ङ लाउयुङ्सु। ओ य़ङ्दाङा खाना निनाम्हाङ्आ ऩबुत्ताओ, खाना ब़द्धे सालुम्स़ङ्चिओ अ़चुबुदा साकोङ्छ़ङ्ओ अ़नुवाक सालुम्स़ङ त़प़चिओ। 13 झारा ह़ङ्म़ङ काप़ निनाम्हाङ खोन्कि पन्तियस पिलातस्ओ अ़बुदा अ़नुवाक सालुम्स़ङ काप़ ख्रिस्त येसुओ अ़चुबुदा अ़ङ्का खाना लोनाङ्ना, 14 आन्हाङ्पा येसु ख्रिस्त खाङ्मान्मुयुक्नान्चिन्तारि ओ लोमाय़ङ्वा नुलोक चुवा, खोन्कि थुपि माङ्लो लाहिदाङ्का अ़थादा युङ्सु। 15 ऩङ्चोन्मा खान्तुओ निनाम्हाङ खोन्कि अ़क्छा ओन्ङा तोक्पोहाङ, हाङ्चिओ अ़चुहाङ, हाङ्पाचिओ अ़चुहाङ्पाआ खोक्कोओसो तोङ्ओ अ़चुग़रिदा आन्हाङ्पा येसु ख्रिस्त खाङ्अ़मु। 16 खोक्को ओन्ङा अ़धुन काह़ङ्युङ म़युङ्याङ, खोन्कि खोक्को साम्दा म़याक, खोक्कोसोओ अ़चुसाम्दा साङ्छाङ खात्मा अ़ऱन्मिन। खोक्को साङ्आछाङ देम्खाछाङ मान्खाङ्युक्तु माङ्लो साङ्आछाङ खोक्को खाङ्मा अ़ऱन। खोक्कोसोओ अ़चुसाऩङ्वा लिने खोन्कि खोक्को अ़धुन सावापोरिओ म़मुने! मोवात्निङा लिने। 17 ओ हेन्खामादाओ कातोक्चि ऱक्भाक मान्लिदानिन्नि लोचि। अ़छ़ङ मात्द़ङ्ओ चासुम्छेन्बिदा माआङ, मेन आन्कान ऩङानुमान्चिन्ओ निम्पाङ झारा सामा ब़द्धे याङ्मा काप़ निनाम्हाङ्एदा मोचि सोम्कुवा म़मुने। 18 मोचि अ़नुवाक काचि मुमा, खोन्कि अ़नुवाक काचिचिदा कातोक लिमा, फामामिन्माओ खोन्कि निचिएनान हामाचामा मिन्माओ लिसानिन्नि लोचि। 19 ओवात्नि आप्पिओ निम्पाङ माय़ङ्ओ अ़नुवाक छ़ङ युङ्मा अ़ऱने, खोन्किना मोचिआ अ़नुछ्याओ ह़ङ्म़ङ अ़लाप्युङ्ने। मो अ़नुछ्याओ ह़ङ्म़ङ ओ। 20 तिमोथि, दि खाना खाङ्मा ऩपुवायुङ्सा, मो रात्तुयुङ्सु। मान्साम्योक्मि चेप्मा खोन्कि दुम क़प्माय़ङ्चिदाङ्का अ़थाया युङा। मोचिआ मो य़ङचि “ताया”नि म़य़ङ, मेन मो सोज्जेओ ताया ओ। 21 ओ खामान्सिन य़ङ कात़ङ देम्पाङ म़नाचि अ़चुसाकोङ्छ़ङ्दाङ्का म़थेमाखारायुङ्सा। खानानिन झाराएदा सोम्तुक्मा युङ्ने। |
© Wycliffe Bible Translators, Inc. All rights reserved.
Wycliffe Bible Translators, Inc.