१ तिमोथि 4 - बान्तावा राईतिमोथि यायोक प़माय़ङ 1 सेङ्लावा नुलोक म़य़ङ्याङ, माय़ङ तायाङ्ओ ग़रिदा काम़प लावाचि खोन्कि चाकावालावाचिओ अ़चुलाम अ़त़ङ खोन्कि खा-खाक्कोचिआ अ़चुसाकोङ्छ़ङ अ़छित। 2 ओवाको चिन्माय़ङ्चि चाचाचाकाच़ सोज्जे काचेप्चिएदाङ्का ता, मोचिओ अ़चुछेन्खाताया कुयाङ्ओ काकाराआ ङेप्तिन्वात्नि लिसायुङ्सा। 3 मोचिआ म़नाचि सायाकाम्मा ऩप़न्चिन, खोन्कि साकोङ्छ़ङ कामुचि खोन्कि अ़छ़ङ कासिन्चिआ आलाङ्एनान लोक्मादोत्ओ निनाम्हाङ्आ अ़मुयाओ चामायुदाङ्का अ़थाया युङ्म़मेत्तुचि। 4 निनाम्हाङ्आ अ़मुयाओ झारा सामाचि अ़नुवाक म़मुयाङ, खोन्कि निनाम्हाङ आलाङ प़याङ्सा ओ लोउम्नालो दित्छाङ ऩङाछित्मा अ़दोत्निन। 5 देकिनालो निनाम्हाङ्ओ अ़चुय़ङ खोन्कि यामात्माआ मो सेङ। 6 ओ य़ङ्चि खाना येसु ख्रिस्तएदा साकोङ्छ़ङ कामुचि त़चिन्तुचिनालो खाना त़खेङ्सुओ साकोङ्छ़ङ्ओ अ़छ़ङ य़ङ खोन्कि अ़नुवाक चिन्माय़ङ्दा त़पोन्कि खाना नुलोक ख्रिस्त येसु काब़त त़लि। 7 मान्साम्योक्मि खोन्कि अ़तुम्माय़ङ मात्द़ङ्ओ दोदुम्चिदाङ्का अ़थाया युङानिन। मेन, आप्पि साम्योक्मिओ निम्पाङ चिन्तान्चिन। 8 पोक्योक्मा थोरेत नुलोक लि, मेन लावामि योक्मादा झारादाङ्का अ़नुवाक मु, देकिनालो ओसाआ आइमित्ओ खोन्कि माय़ङ तोक्तुम्ओ ह़ङ्म़ङ ह्वातात्माङ्दा म़हिप। 9 ओ य़ङ सोम्कुवा मुमा खान्तुओ मुयाङ खोन्कि झारासा लोक्माकि साकोङ्छ़ङ मुमादोत। 10 खोत्निओसा आन्कान ओ मित्चिऩङ्आ चात्लो काचि खोन्कि दुखा मुन। देकिनालो झारा म़नाचिओ अ़चुकालेन्पा खोन्कि च़लोक्वा खोक्को साकोङ्छ़ङ कामुचि अ़ह़ङ निनाम्हाङ्दा आन्कान आन्सोम्कुवा युङ्सुम। 11 ओ य़ङ्चि खाना लोचि खोन्कि चिन्तुचि। 12 सावाछा त़मुयाङ्ओसा साङ्आछाङ खाना आम्साया ऩपेप्नान्ने। मेन साकोङ्छ़ङ कामुचिएदा आम्हान्मा, च़माथाङ्मा खोन्कि सोमातुक्मा, साकोङ्छ़ङ खोन्कि सेङ्मादा खाना अ़क्छा अ़मात्ऩङ लिसा। 13 अ़ङ्का मान्बान्युक्ङातारि खाना साम्कालिन झारासोओ अ़चुबुदा खिप्मा, राक प़मा खोन्कि चिन्मादा मिन्मा पाक्तु। 14 खानाएदा याक्याङ्ओ लावामि सावा मान्मान्केदो, मो सावा ताङ्पाचिआ खोचिओ अ़चुछुक खानाएदा अ़युङ्साहिदा निनाम्हाङ्य़ङ खालुमालाम्पा खाना त़तोक्तुओ। 15 ओ काचिचि मुचि। मो य़ङ्चिएदा आम्मिन्मा पाक्तुयुङ्सु, खोन्ओसा झारासाआ आम्ऱमा पोन्याङ्ओ अ़खाङ्ने। 16 आम्ह़ङ्म़ङ्ओ अ़तुक्वादा खोन्कि खाना त़चिन्तुचिओ अ़तुक्वादा चाप्चेत्तान्चिन। मोचि मुयुङ्सुचि। देकिनालो ओवात्नि त़च़नालो खाना आप्पि खोन्कि आम्य़ङ काएन्चिछाङ त़लेइसुचि। |
© Wycliffe Bible Translators, Inc. All rights reserved.
Wycliffe Bible Translators, Inc.