१ तिमोथि 3 - बान्तावा राईधिकाखाङ्पाचि खोन्कि साम्भुङ काफाचि 1 ओ य़ङ अ़छ़ङ मुयाङ, खाक्को धिकाखाङ्पा काचि मुमा स़नालो खो अ़नुवाक काचि मुमानि मिन। 2 खोन्ओसा धिकाखाङ्पा साङ्आछाङ लाहि पाक्मा ऩऱन्ओ, अ़क्छा खिम्हाङ्माओ ओन्ङा अ़खिम्हाङ्पा, काक़म्नान्चिन, खारु कातोक, सायाकातोक, तावाङ साऩङ्वा कामेत, खोन्कि चिन्मा काऱ मुमादोत। 3 खाबात सेत्चावा खोन्कि ङेन कामु माआङ, मेन वाइवेत कायुङ, मान्खिकादा, छेन्बि च़क्ख़य़ मान्मुकादा मुमादोत। 4 खोसाआ अ़खिम्लुम्पा नुलोक तोङ्मा ऱमादोत खोन्कि अ़छाचिआ नुलोक साऩङ्वाएनान खोसाआ लोचिओ काकाङ मुमादोत। 5 अ़क्छा म़नाआ आप्पि अ़खिम्लुम्पा तोङ्मा अ़लेसुन्लो निनाम्हाङ्ओ अ़चुसाम्भुङ देत्नि खोसाआ खाङ्मा ऱ? 6 खो अ़ऩङ्वा साकोङ्छ़ङ कामु माआङ्ने, देकिनालो खो ऱक्भाक लिकिना सैतानाआ तोक्माओ दन्दादा छुक। 7 साम्भुङ्दाङ्का बुङ्खादाओ म़नाचिओ अ़चुखाङ्मादाछाङ नुलोक सायाकातोक मुमादोत, माङ्नालोना खो लाहिदा खोन्कि सैतानाओ अ़वाय़दा छुक। साम्भुङ काफाचि 8 मोवात्निङा साम्भुङ काफाचिछाङ साऩङ्वा मेत्मा खान्तुचिओ खोन्कि सोत्सोत्वाओ मुमादोत। मोचि ब़द्धे अङ्गुरा माङ्वा कादुङ खोन्कि अ़त्लो च़याङ्सा छेन्बि कादुप लिमा अ़नुनिन। 9 मेन मोचि साकोङ्छ़ङ्ओ अ़छ़ङ अ़तुप्माय़ङ अ़च़क़ल़क छेन्खातायादा कालाप्युङ मुमादोत। 10 बुया मोचि चिन्माखाङ्माचिदोत। खोन्किना मोचिआ आप्पि लाहि मात्द़ङ्ओ खाङ्मुमा अ़ऱनालो मोचि साम्भुङ काफाचि म़लिने। 11 ओवात्निङा अ़चुखिम्हाङ्माचिछाङ सोत्सोत्वाओ, नि म़ना मान्सुङ्कादा, मेन झारा य़ङ्दा काक़म्नान्चिन खोन्कि सोम्कुवा मुमा खान्तुओ मुमादोत। 12 साम्भुङ काफाचिओ अ़क्छाओ ओन्ङा खिम्हाङ्माओ अ़खिम्हाङ्पा मुमादोत। खोन्कि आप्पि मोचिओ अ़चुछाचि खोन्कि अ़चुखिम्लुम्पा नुलोक कातोङ मुमादोत। 13 देकिनालो साङ्चि साम्भुङ काफाचिवात्नि नुलोक काचि म़मु, मोचिआ आप्पिओ निम्पाङ तोक्पो साऩङ्वा खोन्कि ख्रिस्त येसुदाओ साकोङ्छ़ङ्ओ अ़तुक्वादा राक्एनान चेप्मा म़ऱ। अ़धिवाङ कोङ्दुम 14 अ़ङ्का च़क्नि खानाएदा बान्माकि तुप्मानि मिन्ङाङा, खोन्नुछाङ अ़ङ्का ओ खाना छाप्नाङ्ना। 15 मेन अ़ङ्का बान्मा छ़ङानालो निनाम्हाङ्ओ अ़चुखिम्लुम्पादा देत्नि तुङ्मादोत मो खानानिन सिन्मादोत। ओ खिम्लुम्पा अ़ह़ङ निनाम्हाङ्ओ अ़चुसाम्भुङ ओ, खोन्कि अ़नुछ्याओ अ़तोम्खा खोन्कि छ़ङ ओ। 16 आन्कान काङ्सिन, आन्साकोङ्छ़ङ्ओ अ़तुप्माय़ङ अ़न्नुनु तोक्पो मुयाङ: खोक्को पोक्दा खाङ्म़मुसान्चिन, सेङ्लावालाम्पा खोक्को साम्योक्मि अ़काइसा। निनाम्हाङ काफाचिआ खोक्को अ़खा, खोक्कोसोओ अ़चुतुक्वादा रावा-रावाचिओ अ़चुरादा खालुसा। खोक्को झारा हेन्खामादाओ म़नाचिआ साकोङ्छ़ङ अ़मुवा, खोन्कि खोक्को साम्दा निनाम्मादु अ़थेन्ताखात्ता। |
© Wycliffe Bible Translators, Inc. All rights reserved.
Wycliffe Bible Translators, Inc.