१ थेसलोनिकि 4 - बान्तावा राईनिनाम्हाङ्ओ अ़चुऩङानुओ ह़ङ्म़ङ 1 हान अ़चिन्मादा, ब़ब़, नाना खोन्कि निछाचि ओ, आन्कान्का हाङ्पा येसुएदा खानानिन लोनियुङ्नि खोन्कि यायोक प़नियुङ्नि। खानानिन्आ देत्नि ह़ङ्माकि निनाम्हाङ्ओ अ़चुऩङानुमादोत्निओ य़ङ आन्कान्काएदाङ्का त़चिन्तिन्युङ्सिन्चिन। खानानिन मोवात्निङा त़च़न्येन, खोन्कि मोवात्निङा च़लोक च़याङ्सा खारानिन निकिना आन्कान्का खानानिन राक प़नि। 2 देकिनालो आन्कान्का हाङ्पा येसुओ अ़चुपाङ्लाम्पा दि-दि चिन्नियुङ्नि मो खानानिन त़सिन्तुम्योम्च़म। 3 खानानिन सेङ्लो लिमा निनाम्हाङ्ओ अ़चुमिन्मा ओ, खोन्ओसा खानानिन ताङ्लान्दाङ्का अ़थाया युङानिन। 4 खानानिन झारासाआ आम्नुओ खिम्हाङ्माएनान सेङ्लो खोन्कि सायादा देत्नि काचि मुमादोत्ओ चिन्तानिन्चिन, 5 निनाम्हाङ मान्सिन्कादा निरावाचिवात्नि पोक मित्मादा माआङ। 6 खोन्कि ओसोओ अ़तुक्वादा साङ्आछाङ ख्रिस्तियान अ़निछाओ अ़खिम्हाङ्माएनान ताङ्लान अ़मुनिन्ने माङ्लो अ़त्लो अ़च़निन्ने, देकिनालो ओवाको झारा हेवाचिओ अ़फान कालात हाङ्पा म़युङ्याङ, आन्कान्काआ खानानिन बुयाछाङ लोनियुङ्नि खोन्कि चात्लो चाप्चेत्नियुङ्नि। 7 देकिनालो निनाम्हाङ्आ आन्कान पोप्नान्चिन्सि माआङ, मेन सेङ्याङ्ओ च़माथाङ्मादा ह़ङ्माओ निम्पाङ म़बुत्ताओ ओ। 8 खोन्ओसा साङ्आ ओ चिन्माय़ङ ऩङाछिरु, मोसाआ म़ना माआङ, मेन निनाम्हाङ ऩङाछिरु, खोक्कोसाआङा खानानिन अ़चुसेङ्लावा ऩप़न। 9 मेन साकोङ्छ़ङ कामुचिएदा सोमातुक्मुमाओ अ़तुक्वादा आन्कान्का खानानिन दित्छाङ छाप्मा अ़दोत्निन, देकिनालो अ़क्छा निएदा सोमातुक्मुमाओ निनाम्हाङ्आङा खानानिन ऩचिन्तिन्युङ्सिन। 10 खोन्कि अ़नुछ्याङा खानानिन्आ झारा माकेदोनियादाओ साकोङ्छ़ङ कामु ब़ब़, नाना खोन्कि निछाचि सोमात़तुक्तुम्योम्च़म। मेन ब़ब़, नाना खोन्कि निछाचि ओ, आन्कान्का खानानिन मोवात्निङा च़लोक चुवायुङ्सानिन निकिना राक प़निङ्नि। 11 आन्कान्का खानानिन यायोक प़निवा मान्खिमाङ युङानिन, खोन्कि आम्नुओ काचिदा मिन्मा पाक्तानुम, खोन्कि आम्नुओ छुक्आ काचि मुवाचानिन। 12 खोन्ओसा हाङ्पाएदा साकोङ्छ़ङ मान्मुकादा म़नाचिआ खानानिन साया ऩमेत्तिन, खोन्कि निचिएदा देम्खाछाङ दोत्मा अ़दोत्निन। हाङ्पाओ अ़चुलामातामा 13 ब़ब़, नाना खोन्कि निछाचि ओ, म़सुवादाओचिओ अ़चुतुक्वादा खानानिन मान्सिन्कादा त़लिसिन्ओ आन्कान्का अ़मिनिमिन्का, माङ्लो अ़चुतामित्मा मान्द़ङ्ओ म़नाचिवात्नि खानानिन सोखा मुमा अ़दोत्निन। 14 देकिनालो येसु म़सुवादा खोन्कि म़लासाखोन्तालोन्ता निकिना आन्कान साकोङ्छ़ङ मुन्नालो मोवात्निङा, येसुलाम्पा निनाम्हाङ्आ साङ-साङ म़सुवादाओ खोक्कोएदा म़तारुचि। 15 हाङ्पाओ अ़चुय़ङ्वा आन्कान्का खानानिन लोनिङ्नि, आन्कान साङ-साङ ह़ङिन्येन हाङ्पा म़लाय़याङ्तारि काह़ङ, अ़नुछ्याङा कास़दाचिदाङ्का बुया अ़खारिमिन। 16 देकिनालो हाङ्पा अ़धिवो अ़मुक्माएनान, मुलो निनाम्हाङ काफाओ य़ङ्दा खोन्कि निनाम्हाङ्ओ अ़चुथुथुरिओ अ़ऱङ्माएनान निनाम्मादुङ्का म़य़, खोन्कि ख्रिस्तदा म़सुवादाओचि बुया म़खोन्लोन। 17 खोन्किना आन्कान साङ-साङ ह़ङिन्येन खोन्कि ओ हेन्खामादा अ़ह़ङ कायुङ्चि नाम्छ़ऱदु हाङ्पा तुप्सि मोचिएनान अ़क्नि माक्मुन्वादा च़क्नि म़थेन्खात। खोन्कि अ़धुन आन्कान हाङ्पाएनान युङिन। 18 खोन्ओसा ओ य़ङ्चिआ अ़क्छा निएदा राक प़काप़ मुवानिन। |
© Wycliffe Bible Translators, Inc. All rights reserved.
Wycliffe Bible Translators, Inc.