१ थेसलोनिकि 3 - बान्तावा राईतिमोथि थेसलोनिकेदा खान्माय़ङ 1 खोन्किना आन्कान्का खानानिन मान्खाङ्माङ आङ्माङा मान्ऱदोम्का। खोन्ओसा आन्कान्का एथेन्स सहरादा आप्पि युङ्मालात्मा अ़छ़ङ मुम्का, 2 खोन्कि खानानिन तुप्सि तिमोथि छुत्तुम्का। खो आन्निछा ख्रिस्तओ अ़चुनुय़ङ्खान खालुमा काफा निनाम्हाङ्ओ अ़चुकाचि कामु ओ। आन्कान्का खो खानानिन नुलोक साकोङ्छ़ङ मुमेत्मा फासि खोन्कि आम्नुओ सोम्कुवादा राक प़सि छुत्तुम्का। 3 खोन्ओसा दुखाचिआ आम्नुओ साङ्कोछाङ राक अ़स़निन्ने। खानानिन्ङा त़सिन्तुम्योम, ओवाको दुखाचि ना आन्कान आङ्माङादोत। 4 खोन्कि आन्कान्का खानानिन्एनान युङिन्येन्काहिदाछाङ बुयाङा आन्कान्का खानानिन दुखाचि आङ्माचि दोत्नि लोनि ओ, खोन्कि मो लिसालावायुङ्सा, मो खानानिन नुलोक त़सिन्तुम। तिमोथिओ राक्एनान्ओ य़ङ्खान 5 खोन्ओसा, अ़ङ्का च़लोक आङ्मा मान्ऱङाकिना आम्नुओ साकोङ्छ़ङ्ओ अ़तुक्वादा सिन्मा निकिना अ़ङ्का तिमोथि छुत्तुङ। सैतानाआ खानानिन चिन्माखाङ्मादा ऩधान्तिन्कि आन्कान्का मुम्काओ काचि सोज्जे लिसा हे निकिना अ़ङ्क़माकारा। 6 मेन तिमोथि खानानिन्एदाङ्का आन्कान्काएदा लासाबानायुङ्सा, खोन्कि आम्नुओ साकोङ्छ़ङ खोन्कि आम्नुओ सोमातुक्माओ अ़तुक्वादा नुय़ङ्खान आन्कान्काएदा बात्तुयुङ्सु। खानानिन्आ आन्कान्का अ़धुन सोमातुक्याङ्सा त़मित्निङ्निओ खोन्कि खानानिन आन्कान्का खाङ्मा स़न्येन्कावात्निङा खानानिन्छाङ आन्कान्का खाङ्मा त़स़न्येन्ओ य़ङ आन्कान्का खाअ़एत्तिन युङ्सिन्का,। 7 खोन्ओसा, ब़ब़, नाना खोन्कि निछाचि ओ, आन्काओ झारा दुखा खोन्कि अ़चाअ़त्माओ ग़रिचिदा आम्नुओ सोम्कुवालाम्पा आन्कान्का राक तोक्तुम्युङ्सुम्का। 8 देकिनालो खानानिन हाङ्पा येसुएदा सोम्कुवा नुलोक त़मुन्नालो आन्कान्का ऩङानुयाङ्सा ह़ङ्मा ऱन्का। 9 आम्नुओ सोम्कुवाओ निम्पाङ आन्निनाम्हाङ्ओ अ़चुबुदा ब़द्धे आन्काओ ऩङानुवायुङ्सा। खोन्कि मोसोओ निकिना आन्कान्का निनाम्हाङ दियाको आलाङ प़मा ऱम्का? 10 खानानिन्एनान आन्कान्का तुप्मा ऱन्ने खोन्कि आम्नुओ सोम्कुवादा दि-दि मान्याक्युक, मो तामालामा ऱम्काने निकिना आन्कान्का अ़खाखुत अ़खोलेन झारा मिन्माआ यामारिन्येन्का। 11 हान आन्निनाम्हाङ पापाआङा खोन्कि आन्हाङ्पा येसुआ खानानिन्एनान आन्काओ तुप्खालाम आन्कान्का ऩहोत्तिन्प़न्काने। 12 खोन्कि आन्कान्का खानानिन सोमातुक्निवा हाङ्पाआ खानानिन खोन्कि झारा म़नाचिएनान अ़क्छा निएदा सोम्तुक्मुमादा च़लोक ऩपोइसिन्ने। 13 खोन्ओसा खोक्कोसोओ झारा अ़चुसेङ्ताङ्पाचिएनान आन्हाङ्पा येसु ख्रिस्त म़लाय़हिदा खोक्कोसाआ आन्निनाम्हाङ पापाओ अ़चुबुदा सेङ्याङ्ओ खोन्कि लाहि मात्द़ङ्ओ लिमा आम्नुओ साकोङ्वा छोओ ऩमेत्तिन्प़न्ने। |
© Wycliffe Bible Translators, Inc. All rights reserved.
Wycliffe Bible Translators, Inc.