१ थेसलोनिकि 2 - बान्तावा राईथेसलोनिकादा पावल्ओ अ़काचि 1 अ़ङ्ब़ब़, नाना खोन्कि निछाचि ओ, खानानिन्एनान आन्काओ तुप्मा सोज्जे मान्लिओ खानानिन्आ त़सिन्तुम्योम। 2 आन्कान्का बुयाङा फिलिप्पिदा चाअ़त्लो दुखा आङ्तुम्काओ खोन्कि आन्काओ साया ऩपेप्तिन्काओ य़ङ ना खानानिन त़सिन्तुम्योम। मेन अ़न्नुनु फित्चि ऩमुन्कानुछाङ आन्निनाम्हाङ्लाम्पा आन्कान्का राक तोक्तुम्काकिना खोक्कोसोओ अ़नुय़ङ्खान मान्क़माङ खानानिन खाएत्नि। 3 देकिनालो आन्कान्का खानानिन लोनिओ य़ङ फेलाओ माङ्लो पोप्ताओ मित्चिऩङ्दाङ्का माआङ ना आन्कान्का खानानिन म़प्माङा लाप्निङ्निओ। 4 मेन निनाम्हाङ्आ आन्कान्का अ़चुनुय़ङ्खान प़मा अ़खान्तिन्काओ अ़काइसिन्युङ्सिन्का। खोन्ओसा आन्कान्का ओ य़ङ खालुसुम्का, म़नाचि अ़चुऩङानुमा निकिना माआङ, मेन निनाम्हाङ्ओ अ़चुऩङानुमा निकिना ओ, खोक्कोसाआ आन्काओ साकोङ्वा अ़धुन अ़खाङ्युङ। 5 खानानिन त़सिन्तुम्योम आन्कान्का देम्खाछाङ खानानिन्एदा दोलेङ्वा मान्मुदान्का, ना आन्कान्का आम्नुओ सामाचि तोक्मा च़क्ख़य़ मुन्का। आन्काओ अ़सालुम्स़ङ निनाम्हाङ्ङा म़युङ्याङ। 6 आन्कान्का देम्खाछाङ म़नाचिएदाङ्का साऩङ्वा मेत्मान्लुदान्का, ना खानानिन्एदाङ्का ना निचिएदाङ्काङा। 7 ख्रिस्तओ अ़चुछाम्माय़ङ्चि लिसिन्काओसा खानानिन्एदाङ्का आन्कान्का फालुमा ऱन्काओ। मेन आन्कान्का आम्नुओ रादा अ़चुप्पो अ़छाचि नुलोक काखाङ कासिम्नान्चिन अ़चुमावात्नि लिसिन्का। 8 आन्कान्का खानानिन ब़द्धे सोमातुक्निकिना निनाम्हाङ्ओ अ़नुय़ङ्खान ओन्ङा माआङ, मेन आन्काओ ह़ङ्म़ङ्छाङ खानानिन प़मा आन्काओ ऩङानुवा, देकिनालो आन्कान्का खानानिन अ़न्नुनु सोमातुक्नियुङ्नि। 9 अ़नुछ्या, अ़ङ्ब़ब़, नाना खोन्कि निछाचि ओ, आन्काओ काचि खोन्कि दुखा खानानिन त़मित्तुम। आन्कान्का खानानिन साङ्छाङ दुखा मान्प़दामा निकिना अ़खाखुत खोन्कि अ़खोलेन काचि मुयाङ्सा आन्कान्का निनाम्हाङ्ओ अ़चुनुय़ङ्खान खानानिन खाएत्नि। 10 खानानिन साकोङ्छ़ङ कामुचिएदा देत्नि आन्काओ च़माथाङ्मा सेङाङा, साम्योक्मि खोन्कि लाहि मात्द़ङ मुवाङा, मो य़ङदा खानानिन खोन्कि निनाम्हाङ्छाङ आन्काओ सालुम्स़ङ ओ। 11 देकिनालो खानानिन त़सिन्तुम्योम, आन्कान्का खानानिन झारा अ़चुपाआ अ़छाचि मुङुचिवात्निङा खानानिन मुनि। 12 आन्कान्का खानानिन निनाम्हाङ्ओ अ़चुऩङानुओ ह़ङ्म़ङ ह़ङानिन निम्पाङ यायोक प़नि खोन्कि राक प़ निकिना लोनि। खोक्कोसाआ खानानिन खोक्कोसोओ अ़चुसाम्स़रिओ अ़चुहाङ्होन्दा ऩबुत्तिन। 13 खोन्ओसा आन्कान्का अ़धुन निनाम्हाङ आलाङ प़म्का, देकिनालो खानानिन्आ आन्कान्काएदाङ्का त़एनुम्ओ निनाम्हाङ्ओ अ़चुय़ङ खानानिन्आ म़नाओ अ़य़ङ्वा मान्लोक्त़दोम, मेन अ़नुछ्या निनाम्हाङ्ओ अ़चुय़ङ्वात्तिङा त़लोउम। मो य़ङ्आ खानानिन साकोङ्छ़ङ कामुचिएदा काचि मुङु। 14 देकिनालो अ़ङ्ब़ब़, नाना खोन्कि निछाचि ओ, ख्रिस्त येसुदा साकोङ्छ़ङ कामु यहुदियादाओ निनाम्हाङ्ओ अ़चुसाम्भुङ्चि कात़ङ खानानिन त़लिसिन्युङ्सिन। देत्नि यहुदि साम्भुङ्चिआ अ़चुम़नाचिदाङ्का दुखा अ़आङ्ता, मोवात्निङा खानानिन्आ आम्नुओ हेन्कोप्दाओ म़नाचिलाम्पा दुखा त़आङ्तुम। 15 मो यहुदिचिआङा हाङ्पा येसु ख्रिस्त खोन्कि निनाम्हाङ्य़ङ खाकालुचि म़सेरुचि, खोन्कि आन्कान्का ऩऱसिन्का। खोन्कि मोचि निनाम्हाङ्ओ अ़चुऩङाछिरालो म़चुवा, खोन्कि झारा म़नाचि फित्चि म़मेत्तुचि। 16 मोचिआ आन्कान्का निरावाचि लेन्माओ नुय़ङ्खान खाएत्मा मान्प़ऩदान्का। मोवात्नि अ़धुन मोचिआ अ़चुहेवाचि पोन्याङ्सा अ़खात्याङ। मेन आदेङ मोचिएदा निनाम्हाङ्ओ अ़चुमाइसुङ छुक्तायुङ्सा! थेसलोनिकिचि तुप्मा पावल्ओ तोक्पो अ़मिन्मा 17 मेन अ़ङ्ब़ब़, नाना खोन्कि निछाचि ओ, आन्कान्का अ़क्दुओ निम्पाङ आन्काओ पोक्दा हासिन्चिन्काओ, मेन आन्काओ मिन्मादा माआङ। आन्कान्का खानानिन लामाखाङ्मा अ़न्नुनु स़न्काओसा आन्कान्का खानानिन्एदा लामाबान्माकि तुप्मानि ब़द्धे लामिन्का। 18 खोन्ओसा आन्कान्का खानानिन्एदा बान्मानि मिनिन्का। अ़ङ्का पावल अ़दु-अ़दु लामाबान्मा लामाङ, मेन सैतानाआ आन्कान्का मान्प़अ़दान्का। 19 आन्हाङ्पा येसु म़य़हिदा खोक्कोसोओ अ़चुबुदा आन्काओ सोम्कुवा खोन्कि आन्काओ ऩङानुमा माङ्लो सिरिफाओ तोक्पो लिमा खानानिन्ङा माआङ कि? 20 देकिनालो आन्काओ ऩङ्चोन्मा खोन्कि ऩङानुमा खानानिन्ङा ओ। |
© Wycliffe Bible Translators, Inc. All rights reserved.
Wycliffe Bible Translators, Inc.