१ पत्रुस 5 - बान्तावा राईताङ्पाचि खोन्कि सावाछाचि 1 अ़ङ्काछाङ अ़क्छा ताङ्पाओसा ख्रिस्तओ दुखाओ सालुम्स़ङ खोन्कि आन्कान खाङ्म़मेत्ओ साम्दा कावाङ्चिओसा हान आम्नुओ रादाओ ताङ्पाचि अ़ङ्का राक प़ङ्योङ्च़ङ। 2 आम्नुओ रादाओ निनाम्हाङ्ओ अ़लोकाचि नुलोक खानुम्च़म। राकाङ्थेत्निआ माआङ, मेन ऩङानुयाङ्सा, छेन्बिओ च़क्ख़य़आ माआङ, मेन राक्एनान फासानुम्च़म। 3 खानानिन खाङ्मा ऩप़न्ओचि तिम्याङ्सा माआङ, मेन अ़लोकाचिओ अ़मात्ऩङ लिसानिन। 4 खोन्कि मुलो काखाङ्पा खाङ्म़मुनान्चिन्हिदा देम्खाछाङ अ़युन्निन्खात्निन्ओ ऩङ्लोङ्माओ सिरिफा त़तोक्तुम। 5 मोवात्निङा सावाछाचि ओ, ताङ्पाचिओ अ़चुक़म्मादा युङानिन। खानानिन झारा सिम्सानिन्चिन्कि अ़क्छा निएदा फाकाफा मुवानिन, देकिनालो, “निनाम्हाङ्आ ऱक्भाक्चि फित्चि म़मुचि, मेन कासिम्नान्चिन्चि खोक्कोसाआ सोमाम़तुक्तुचि।” 6 खोन्ओसा निनाम्हाङ्ओ अ़चुसावापोरिओ अ़चुछुक्दा युङ्याङ्सा सिम्सानिन्चिन, खोन्कि अ़चुग़रिदा खोक्कोसाआ खानानिन ऩझोइसिन। 7 झारा आम्नुओ मिन्राक्चि खोक्को पुवानुम, देकिनालो खोक्कोसाआ खानानिन ऩखान। 8 चाप्चेत्तानिन्चिन खोन्कि चाप्चाप्चाप्वा युङानिन! आम्नुओ ङेङ सैताना काङुन धिनारावात्नि साङ धित्माकि चामा निकिना खालाम्सा हुलुक। 9 साकोङ्छ़ङ्दा काछो लिसानिन खोन्कि सैतानाओ फित्चि मुवानुम, देकिनालो खानानिन त़सिन्तुम्योम, झारा हेन्खामादा साकोङ्छ़ङ कामुचिआछाङ ओवाको दुखा अ़दुत्याङ। 10 झारा सोमाकातुक निनाम्हाङ्आ ख्रिस्तदा अ़धुन अ़चुऩङ्चोन्माओ निम्पाङ खानानिन ऩबुत्तिन्युङ्सिन। खानानिन्आ अ़क्चित्तारि दुखा त़आङ्तुम्चिउम्कि खोक्कोसाआ खानानिन अ़ऩङ्वा ऩलासिन्मुन, ऩतोङ्सिन, सावापोरिओ ऩमुन, खोन्कि ऩतुङ्निन्ओ छ़ङ्दा खानानिन ऩयुङ्सिन। 11 खोक्कोसोओ अ़चुसावा अ़धुन-अ़धुन्तारि युङ्युङ्ने। मोवात्निङा लिने। पत्रुस्ओ देङ्दाओ अ़सेवा 12 सोम्कुवा मुमा खान्तुओ निछा सिलास्ओ अ़फामालाम्पा ओ थुत्मेत्लो छाप्लावा अ़ङ्का छाप्तुङ्योङ। खानानिन राक प़नानिन खोन्कि खाएत्नानिन, निनाम्हाङ्ओ अ़छ़ङ अ़चुसोमातुक्मा ओङा ओ। ओदाङा खानानिन युङायाक्तानिन। 13 बेबिलोन्दा कायुङ खानानिन्एनान छेन्ताओसाआ खोन्कि लावामि अ़ङ्छा मर्कुस्आछाङ खानानिन सेवा ऩछोक्तिन्युङ्सिन। 14 अ़क्छा निएदा सोमातुक्माओ सेवा मेत्मुवानिन। ख्रिस्तदा कायुङ खानानिन झाराएदा सेवाङ्नि लिने। |
© Wycliffe Bible Translators, Inc. All rights reserved.
Wycliffe Bible Translators, Inc.