१ पत्रुस 4 - बान्‍तावा राई

निनाम्‍हाङ्‌ओ निम्‍पाङ ह़ङ्‌मा

¹ ख्रिस्‍तआ अ़चुपोक्‌दा दुखा अ़आङ्‌ताओसा खानानिन्‌छाङ येसुआवात्‍नि मिनानिन। देकिनालो साङ्‌आ अ़पोक्‌दा दुखा आङ्‌तुयुङ्‌सु, मोसाआ हेवा मुमा छिरुयुङ्‌सु।

² खोवात्‍निओसा खो अ़पोक्‌दा ह़ङ्‌याङ्‌तारि हान्‌दाङ्‌का म़नाओ अ़अ़त्‍पा मिन्‍मावा माआङ, मेन निनाम्‍हाङ्‌ओ अ़चुमिन्‍मावा ह़ङ।

³ खाराओ लेन्‍चिदा निरावाचिआवात्‍नि खानानिन्‌आ ताङ्‌लान, अ़अ़त्‍पा मिन्‍मा, खाबात्‍सेत्‍चाले, ताकावा च़मा, खाबात्‌दुङ्‌खा रुहुप्‌दा खोन्‍कि चिप्‍माकात्‍तुओ सेम्‍पोक ब़क्‍मादा आम्‍नुओ ग़रि च़लोक त़क़प्‍तुम्‌युङ्‌सुम।

⁴ खानानिन मोचिएनान अ़क्‍नि अ़अ़त्‍पा काचिदा मान्‍कोन्‍त़दान्‌ओ ऩखान्‌कि मोचि दोम्‍तुदाङुचि, खोन्‍कि खानानिन रुऩफोक्‍तिन।

⁵ मेन अ़ह़ङ खोन्‍कि म़सुवादाओचिओ अ़चुछ़ङ्‌काछेन निनाम्‍हाङ्‌ओ अ़चुबुदा, मोचिआ अ़मुवाओ अ़चुकाचिओ अ़तुक्‌वादा खाएत्‍मादोत।

⁶ खोन्‌ओसा पोक्‌दा मोचि म़नाचिवात्‍नि छ़ङ्‌छेन्‍मादा म़छुक्‍तानुछाङ लावादा मोचि निनाम्‍हाङ्‌वात्‍नि म़ह़ङ्‌ने निम्‍पाङ म़सुवादाओचिओ निकिछाङ नुय़ङ्‌खान खाअ़लुसाओ।

⁷ झारा य़ङ्‌चिओ अ़चुलुक्‍माखात्‍मा च़क्‌दा ताचिआयुङ्‌सा। खोन्‌ओसा खारुच़ङ्‌तानुम खोन्‍कि आम्‍नुओ यामात्‍माओ निम्‍पाङ चाप्‍चेत्‍तानिन्‍चिन।

⁸ झारादाङ्‌का बुया आम्‍नुओ रादा अ़क्‍छा निएदा साकोङ्‌वादाङ्‌का सोम्‍तुक्‍मुवानिन। देकिनालो सोम्‍तुक्‍माआङा खिप्‍मा अ़ऱन्‍मिन्‌ओ हेवाचि दिप्‍तुचि।

⁹ छुऩङ्‌वा मान्‍मुमाङ अ़क्‍छाआ नितावाङ्‌चि ब़रानुम्‍च़म।

¹⁰ झारासा दियाको सावा त़तोक्‍तुम्‌युङ्‌सुम, अ़नुवाक कातोङ्‌पावा निनाम्‍हाङ्‌ओ अ़चुसोमातुक्‍माओ अ़खाला-अ़खालाओ अ़चुआसिखा अ़क्‍छा निएदा मो नुलोक याङानुम।

¹¹ साङ चेप्‌नालो निनाम्‍हाङ्‌ओ अ़चुय़ङ खालुसिन्‌वा चेप्‍ने। काब़त निनाम्‍हाङ्‌आ प़माय़ङ्‌ओ सावालाम्‍पा ब़रुने। ओवात्‍नि झारा य़ङ्‌दा येसु ख्रिस्‍तलाम्‍पा निनाम्‍हाङ्‌ओ अ़चुऩङ चोन्‍ने। तोक्‍पो सावा खोन्‍कि अ़चुऩङ्‌चोन्‍मा अ़धुन-अ़धुन्‌तारि खोक्‍कोसोओ लियुङ्‌ने। मोवात्‍निङा लिने!

ख्रिस्‍तियान लिमादा दुखा आङ्‌मा

¹² सोमातुक्‍निङ्‌निओ यावाचि ओ, अ़न्‍नुनु अ़चाअ़त्‍मा चिन्‍माखाङ्‌मा खानानिन्‌एदा ताहिदा मान्‍सिन्‍त़युक्‍तुम्‌ओ य़ङ लियाङ्‌वात्‍नि खानानिन त़दोम्‍तिन्‍दान्‍मिन्‍ने।

¹³ मेन ख्रिस्‍तओ अ़चुदुखा आङ्‌मादा खानानिन त़वाङिन्‌येन्‌हिदा ऩङानुसानिन्‍चिन। खोन्‍नालो खोक्‍कोसोओ अ़चुसाम दात्‌हिदा खानानिन्‌छाङ अ़न्‍नुनु आम्‍नुओ ऩङानुने खोन्‍कि छेमाकात्‍ने।

¹⁴ ख्रिस्‍तओ अ़चुऩङ्‌दा खानानिन ऩसुङ्‌तिन्‌नालो खानानिन आसिखा कातोक ओ! देकिनालो निनाम्‍हाङ्‌ओ साम्‍स़रिओ अ़चुलावा खानानिन्‌एदा म़याक।

¹⁵ मेन खानानिन साङ्‌आछाङ म़नाकासेत माङ्‌लो काख़, माङ्‌लो अ़अ़त्‍पा काचि कामु माङ्‌लो नि म़नाओ अ़काचिदा छुक कापाक्‌आवात्‍नि दुखा आङ्‌मा अ़दोत्‍निन्‍ने।

¹⁶ मेन साङ ख्रिस्‍तियान लिकि दुखा आङ्‌तुङुनालो मोसोओ अ़लेजो अ़कात्‍निन्‍ने। मेन म़नाचिआ ख्रिस्‍तओ अ़चुऩङ्‌लाम्‍पा खानानिन ऩबुत्‍तिन्‌ओदा निनाम्‍हाङ्‌ओ अ़चुऩङ चोन्‍तानुम।

¹⁷ देकिनालो छ़ङ्‌छेन्‍मा निनाम्‍हाङ्‌ओ अ़चुम़नाचिदाङ्‌का पुङ्‌मा ग़रि ताचिआयुङ्‌सा। खोन्‍कि ओ छ़ङ्‌छेन्‍मा आन्‍कान्‌एदाङ्‌काङा पुङ्‌नालो निनाम्‍हाङ्‌ओ अ़चुनुय़ङ्‌खान्‌दा लोमावा मान्‍च़कादाचिओ अ़चुछ़ङ्‌छेन्‍मा देत्‍नि लि?

¹⁸ खोन्‍कि, “साम्‌योक्‍मि म़ना राक्‍काभाला लेत्‌नालो मान्‍साम्‌योक्‍मि खोन्‍कि हेवामि दे लि?”

¹⁹ खोन्‌ओसा निनाम्‍हाङ्‌ओ अ़चुमिन्‍मावा दुखा काआङ्‌चि नुलोक म़च़ने, खोन्‍कि मोचिआ अ़चुलावा साकोङ्‌छ़ङ मुमा खान्‍तुओ कामुन्‍पा अ़प़ने।