१ पत्रुस 3 - बान्तावा राईखिम्हाङ्पा खोन्कि खिम्हाङ्मा 1 मोवात्निङा खिम्हाङ्माचि ओ, खानानिन्छाङ आम्नुओ खिम्हाङ्पाचिओ अ़चुक़म्मादा युङानिन। खोन्नालो मोचि निनाम्हाङ्ओ अ़चुय़ङ्दा साकोङ्छ़ङ ऩमुनिन्नुछाङ, आम्नुओ च़माथाङ्माआ मोचि देत्छाङ मान्लोमाङ फान्मा त़ऱम्च़म। 2 आम्नुओ अ़नुवाक च़माथाङ्मा खोन्कि साऩङ्वा अ़खाङ्कि खोचिओ अ़चुमिन्मा फान। 3 ताङ्मुवा चोङ्मा, हाराक्वाओ चोङ्खान्चिन खोन्कि खान्नुओ तित्चि आम्नुओ बुङ्खालिप्पाओ चोङ्खान्चिन ऩलिनिन्ने। 4 आम्नुओ साकोङ्वा सिम्माय़ङ्आ खोन्कि सेवाङ्निओ लावाओ अ़लुक्निन्ओ चोङ्मायुआ चोङ्सानुम, मो निनाम्हाङ्ओ अ़चुबुदा अ़न्नुनु ब़द्धे अ़लुङ्ओ मुयाङ। 5 ओवात्नि निनाम्हाङ्एदा साकोङ्छ़ङ कामु बुयाओ म़सेङाङाओ मेत्छामाचि निनाम्हाङ्एदा सोम्कुवा म़मुवाकि खान्कानुमा म़मुवान्चिन, खोन्कि अ़चुओखिम्हाङ्पाचिओ अ़चुक़म्मादा म़युङा। 6 मोवात्नि, सारा देत्नि अब्राहाम्आ लोओ काङ्सा, खोन्कि “हाङ्पो”नि लोङु। खानानिन अ़नुवाक काचि त़मुन, खोन्कि खाक्कोछाङ य़ङ्दा त़क़सिमिन्नालो खानानिन साराओ अ़मेत्छाछा छाचिवात्निओचि ओ। 7 मोवात्निङा खिम्हाङ्पाचिआछाङ आम्नुओ खिम्हाङ्माचि मान्ऱकादा मेत्छामाचिनि तुप्तानुम्च़म्कि सायामेत्याङ्सा अ़क्नि युङानिन, देकिनालो खानानिन खोन्कि मोचिआ अ़क्नि निनाम्हाङ्ओ अ़चुसोमातुक्माओ ह़ङ्म़ङ्ओ पाङ त़तोक्तुम। खोन्ओसा आम्नुओ यामात्मा दिसाआछाङ अ़छेक्तुन्ने निकिना आम्नुओ खिम्हाङ्माचि नुलोक मुवानुम्च़म। अ़नुवाक काचिदा दुखा आङ्मा 8 अ़चिन्मादिमादा, खानानिन झारा साकोङ्वादा अ़क्तात लिसानिन, अ़क्छा निएदा फामुवानिन, अ़क्छा निएदा सोमातुक्कातुक मुवानिन, अ़नुवाक साकोङ्वा खोन्कि कासिम्नान्चिन मिन्माओ लिसानिन। 9 अ़त्लोओ अ़फान्दा अ़त्लो मान्च़दानिन, माङ्लो रुफोक्माओ अ़फान्दा रुमान्फोक्दानिन, मेन मोसोओ अ़फान्दा आसिखा पुवानुम्च़म। देकिनालो ओसोओ निम्पाङ निनाम्हाङ्आ खानानिन ऩबुत्तिन्ओ, खोन्ओसा आसिखा तोक्तानुम। 10 देकिनालो साम्कालिन य़ङ्याङ, “साङ्आ अ़ह़ङ्म़ङ सोमातुक्तु खोन्कि अ़नुवाक लेन्चि खाङ्मानि मिन, मोसाआ अ़लेम अ़त्लो चेप्मा खोन्कि अ़दोसिवा म़प्माय़ङ्दाङ्का अ़थाया युङ्सुने। 11 मो अ़अ़त्पादाङ्का लाने, खोन्कि अ़नुवाक काचि मुने। मोसाआ सेवाङ्नि लामुने खोन्कि मोङा त़ङ्तुने। 12 देकिनालो निनाम्हाङ पापाओ अ़चुखाङ्मा साम्योक्मि म़नाचिएदा युङ, खोन्कि खोक्कोसोओ अ़चुनाबाक्आ मोचिओ अ़चुयामात्मा अ़एन। मेन निनाम्हाङ पापाओ अ़चुङाइवा अ़त्लो काचि कामुचिओ अ़चुदेङ्सालाप्पादा याक।” 13 खानानिन अ़नुवाक काचि मुमा त़छेसिन्येन्नालो खानानिन साङ्आ दुखा ऩप़न कि? 14 मेन अ़नुछ्या साम्योक्मिओ निम्पाङ्छाङ दुखा आङ्मादोत्नालो खानानिन देम आसिखा कातोक ओ। मोचिएदाङ्का मान्क़दानिन ना आन्नुओ मिन्माङा स़ने। 15 मेन आम्नुओ साकोङ्वादा ख्रिस्त हाङ्पा निकिना साया मेत्तानुम। खानानिन्एदा याक्याङ्ओ आम्नुओ सोम्कुवाओ अ़तुक्वादा नि म़नाचिआ ऩसेनिन्नालो मोसोओ अ़तुक्वादा खालुमाओ निकि अ़धुन चुम्सान्युङ्सानिन्चिन। 16 मेन मो सिम्नान्चिन्सा खोन्कि साऩङ्वाएनान मुवानुम। आम्नुओ छेन्खाताया सेङ्लो मुवानुम, खोन्ओसा आम्नुओ देङ्सालाप्पादा सुङ्याङ्सा काचेप खोन्कि ख्रिस्तदाओ आम्नुओ च़माथाङ्मादा रुकाफोक्चि लेजोदा म़छुक्ने। 17 निनाम्हाङ्ओ अ़चुमित्चिऩङ ओवाकोङानालो अ़त्लो काचि मुमाकि दुखा आङ्मादाङ्का अ़नुवाक काचि मुमाकि दुखा आङ्मा देम अ़नुवाक ओ। 18 देकिनालो ख्रिस्त्छाङ आन्कान निनाम्हाङ्एदा तात्मा निम्पाङ साम्योक्मि म़ना मान्साम्योक्मिचिओ निकि खोक्को अ़धुन्ओ निम्पाङ हेवामिचिओ अ़चुफान्दा अ़क्दु म़सुवा। खोक्को पोक्दा म़सुवा, मेन लावादा म़खोन्तालोन्ता। 19 मो लावादा म़खाराकि छेक्खादा म़छुक्ताओ लावाचि खोक्कोसाआ नुय़ङ्खान खाम़एत्तुचि। 20 मो लावाचि बुया निनाम्हाङ्ओ अ़चुलोमावा मान्च़चि खोन्कि नोआओ अ़ग़रिदा वाप्तेला मुङुहिदा हेवादाङ्का म़ला हे निकिना निनाम्हाङ्आ आङ्याङ्सा म़हुङुङुचि। मो वाप्तेलादा अ़क्चिलोक म़नाचि माङ्लो आथ्कापाङ ओन्ङा चाक्वादाङ्का म़ह़ङा। 21 ओसाआ चाक्वाओ बप्तिस्मा खाङ्मुसु, खोन्कि ओसाआ खानानिन ऩलेइसिन्छाङ। ओ पोक्दाओ सिप्भाङ वालेक्तिन्खाइसिन्वात्नि माआङ, मेन ओसोओ अ़तुप्माय़ङ अ़च़क़ल़क छेन्खातायाएनान निनाम्हाङ्एदा लामा ओ। येसु ख्रिस्तओ अ़चुलामाखोन्मालोन्मालाम्पा ओसाआ खानानिन ऩलेइसिन। 22 खोक्को निनाम्मादु म़खारायुङ्सा खोन्कि निनाम्हाङ काफाचि, पाङ्चि खोन्कि सावाकातोक लावाचि म़क़म्तुचि खोन्कि निनाम्हाङ्ओ अ़चुचुप्ताङ्छुक्लिप्पा म़युङ्याङ। |
© Wycliffe Bible Translators, Inc. All rights reserved.
Wycliffe Bible Translators, Inc.