१ पत्रुस 2 - बान्तावा राईअ़ह़ङ लुङ खोन्कि छेन्माय़ङ रावा 1 खोन्ओसा झारा अ़त्लो च़मा, झारा म़प्मा कोङ्क़त्वा, ऩङ्च़ मुमा खोन्कि झारा सुङ्मा य़ङ्चि छिरानुम्च़म। 2 अ़ऩङ्वा म़पुक्तान्चिन्ओ छाचिवात्नि अ़च़क़ल़क लावामि ओम्पिवा अ़न्नुनु मित्मा सुवानिन, खोन्ओसा खानानिन ओलाम्पा लेन्मादा पोन्याङ्सा खात्मा त़ऱन्ने। 3 देकिनालो हाङ्पाओ अ़चुसोमातुक्मा खानानिन्आ त़छेम्सुम्युङ्सुम। 4 येसु ख्रिस्तएदा तानिन, खोक्को अ़ह़ङ लुङ्ताक म़युङ्याङ। म़नाचिआ ऩङाअ़छिराओ, मेन निनाम्हाङ्आ खोक्को अ़छेन्ताओ खोन्कि खोक्कोसोओ निम्पाङ अ़चुलुङ अ़लुङ्छ़ओ म़मुयाङ। 5 खोन्कि खानानिन्छाङ येसु ख्रिस्तलाम्पा निनाम्हाङ्आ लोक्माखान्तुओ लावामि हेन्खोक्वाचि काधान सेङ्याङ्ओ काब़क्पा लिमा निम्पाङ अ़ह़ङ लुङ्चिवात्नि लावामि खिम लियाङ्सा त़खारिन। 6 देकिनालो साम्कालिन्दा याक्याङ: “खानुम, सियोन्दा अ़क्तात छेन्माय़ङ्ओ खोन्कि अ़लुङ्छ़ओ खुचुरोङ्दाओ लुङ अ़ङ्का युङ्सुङ, खोन्कि साङ खोक्कोएदा साकोङ्छ़ङ मु, खो देम्खाछाङ लेजोदा अ़छुक्निन।” 7 खोन्ओसा खानानिन साकोङ्छ़ङ कामुचिओ निकिना खोक्को अ़लुङ्छ़ओ म़मुयाङ, मेन साकोङ्छ़ङ मान्मुकादाचिओ निकिना, “खिम कामुचिआ अ़काचि मात्द़ङ्ओ निकिना ऩङाअ़छिराओ लुङ्ताक मो खुचुरोङ्दाओ मुलो लुङ्ताक म़लिसायुङ्सा।” 8 खोन्कि, “मोक्को अ़क्ताक लुङ्ताक्आङा म़नाचि धुङ्म़मेत्तुचि, खोन्कि मोक्को लुङ्छ़ङ्आङा म़नाचि काधाम म़मुचि।” देकिनालो मोचि निनाम्हाङ्ओ अ़चुय़ङ ऩङाअ़छित, मोचिओ निकि ओवात्नि लिमाङा निनाम्हाङ्ओ अ़चुमिन्मा याआङा। 9 मेन खानानिन छेन्माय़ङ रावा ओ, हाङ्ओ अ़चुकाब़क्पाचि, त़सेङिन्येन्ओ म़नाचि, निनाम्हाङ्ओ आप्पिओ अ़चुम़नाचि ओ। खोक्कोसाआ खानानिन कुन्यामादाङ्का म़दोम्दाओ साम्दा ऩबुत्तिन, खोन्ओसा खोक्कोसोओ म़दोम्दाओ अ़चुकाचिचि खानानिन्आ खात़लुसुम्ने। 10 बुया खानानिन निनाम्हाङ्ओ अ़चुम़नाचि माआङ्ओ, मेन हान खानानिन निनाम्हाङ्ओ अ़चुम़नाचि ओ। बुया खानानिन्आ निनाम्हाङ्ओ अ़चुसोम्तुक्मा मान्तोक्त़दोम, मेन हान खानानिन्आ निनाम्हाङ्ओ अ़चुसोम्तुक्मा त़तोक्तुम्युङ्सुम। निनाम्हाङ काब़क 11 ओ हेन्खामादा निहेन्कोप्दाओचि खोन्कि तावाङ्चिवात्नि त़मुन्येन्ओ सोमातुक्नाङ्नानिन्ओ अ़ङ्यावाचि ओ, अ़ङ्का खानानिन यायोक प़नाङ्नानिन, आम्नुओ लावाओ अ़देङ्सालाप्पादा ङेन कामु पोक मित्माचिदाङ्का अ़थाया युङानिन। 12 निरावाचिओ अ़चुरादा आम्नुओ च़माथाङ्मा अ़नुवाक मुवानुम। मोचिआ खानानिन अ़त्लो काच़चिनि आम्नुओ देङ्सालाप्पादा म़चेप्नुछाङ मोचिआ आम्नुओ अ़नुवाक काचिचि म़खाचिकि हाङ्पा म़ताओ लेन मोचिआ निनाम्हाङ्ओ अ़चुओ ऩङ अ़चोन्ने। पाङ्यि कातोक्चि खोन्कि हाङ्पाचि सायामेत्मा 13 हाङ्पाओ निम्पाङ झारा पाङ्यिचिआ ऩलोन्ओ काङ्सानिन। खो झारा पाङ्यि कातोक तोक्पोहाङ्ङाने, 14 माङ्लो हाङ्कामुचिङाने, निनाम्हाङ्आ मोचि अ़अ़त्पा काचि कामुचि दन्दा प़सि खोन्कि अ़नुवाक काचि कामुचि चोइसि म़छुत्तुचिओ। 15 देकिनालो निनाम्हाङ्ओ अ़चुमित्चिऩङ ओङा ओ, खानानिन अ़नुवाक काचि मुवानिन्कि ऱक्भाक म़नाचिओ अ़चुखामान्सिन्दामा वाइवेत मुमाचिदोत। 16 लेत्वाचिवात्नि युङानिन। खोन्नुछाङ लत्वाओ अ़ऩङ त़मुम्कि अ़अ़त्पा काचि मान्मुदानिन, मेन निनाम्हाङ्ओ अ़चुहारुक लिसानिन। 17 झारा म़नाचि साया मेत्तानुम्च़म। साकोङ्छ़ङ कामु ब़ब़, नाना खोन्कि निछाचि सोमातुक्तानुम्च़म। निनाम्हाङ कित्तानुम। हाङ साया मेत्तानुम। ख्रिस्तआ दुखा अ़आङ्ताओ अ़मात्ऩङ 18 हारुक्चिओ, झारा सायाएनान आम्नुओ हाङ्पाचिआ ऩलोन्ओ काङ्सानिन। खानानिन सोमाकातुक खोन्कि नुलोक कामुचि ओन्ङा माआङ मेन सोमामान्तुक्कादाचिआ ऩलोन्ओदाछाङ काङ्सानिन। 19 देकिनालो खाक्कोसाआ निनाम्हाङ मित्तुकिना अ़त्लो मुमाय़ङ दुखा आङ्तुनालो मो चोन्मा खान्तु। 20 अ़त्लो काचि त़मुन्किना धात्खावा त़चान्येन्हिदा दिसुवा मान्मिन्माङ त़आङ्तुम्नालो खानानिन दि त़तोक्तुम? मेन खानानिन अ़नुवाक काचि त़मुन्कि दुखा त़आङ्तुम्नालो निनाम्हाङ्आ खानानिन ऩचोन्तिन। 21 देकिनालो ओसोओ निकिना निनाम्हाङ्आ खानानिन ऩबुत्तिन्ओ। ख्रिस्तआछाङ आम्नुओ निम्पाङ दुखा अ़आङ्ताकि अ़क्तात अ़मात्ऩङ ऩछित्तिन्दान, खोन्कि खोक्कोसोओ अ़चुलाम्दा खानानिन्छाङ कोन्मादोत। 22 “खोक्को ना हेवाङा म़मुवा, ना खोक्कोसोओ अ़चुदोदाङ्का म़प्मा य़ङ्ङा लोन्ता।” 23 मोचिआ खोक्को अ़सुङ्ताङाहिदा खोक्कोसाआ अ़फान मान्लात्अ़दा। दुखा अ़आङ्ताङाहिदा खोक्कोसाआ मान्किन्म़दोचि। मेन नुलोक छ़ङ्काछेन निनाम्हाङ्एदा खोक्को सोम्कुवा म़मुवा। 24 हेवाओ अ़सावा आन्कान्एदा दित्छाङ अ़युङ्निन्ने, खोन्कि साम्योक्मिओ निम्पाङ ह़ङिन्ने निकिना क्रुस्दा खोक्कोसाआ आप्पि आन्हेवा अ़खुया। खोक्कोसोओ अ़चुखेन्चिलाम्पा खानानिन त़नुन्युङ्सिन। 25 देकिनालो खानानिन म़थेमाखाराओ भेराचिवात्नि त़मुन्येन, मेन हान खानानिन आम्नुओ लावाचि काखाङ्पा खोन्कि कारात्पाएदा त़लासिन्तान्युङ्सिन। |
© Wycliffe Bible Translators, Inc. All rights reserved.
Wycliffe Bible Translators, Inc.