१ युहन्ना 5 - बान्तावा राईनिनाम्हाङ्ओ अ़चुछाएदा साकोङ्छ़ङ 1 येसुङा ख्रिस्त म़युङ्याङ निकिना साकोङ्छ़ङ कामु झारा निनाम्हाङ्ओ अ़चुछा ओ। साङ्आ निनाम्हाङ पापा सोमातुक्तु, मोसाआ अ़चुछाछाङ सोमातुक्तु। 2 आन्कान निनाम्हाङ सोमातुक्तुम खोन्कि अ़चुओ लोमाय़ङ्चि काङ्सिन, ओदाङ्काङा आन्कान सिन्तुम, आन्कान निनाम्हाङ्ओ अ़चुछाचि सोमातुक्तुम्च़म। 3 निनाम्हाङ्ओ अ़चुसोम्तुक्माओ अ़तुप्य़ङ ओङा ओ, आन्कान खोक्कोसोओ अ़चुओ लोमाय़ङ्चि काङ्सिन। खोन्कि खोक्कोसोओ अ़चुलोमाय़ङ्चिआ म़तिम्निन। 4 देकिनालो झारा निनाम्हाङ्दाङ्का म़लिसाओचिआ हेन्खामादा म़छो, खोन्कि हेन्खामादा काछो आन्सोम्कुवा ओ। 5 हेन्खामादा छोमा काऱ साङ ओ? येसु निनाम्हाङ्ओ अ़चुछा निकिना साकोङ्छ़ङ कामुङा हेन्खामादा काछो ओ। येसु ख्रिस्तओ अ़चुतुक्वादाओ अ़चुसालुम्स़ङ्चि 6 मो खोक्कोङा ओ, येसु ख्रिस्त चाक्वा खोन्कि ह़लाम्पा म़ता। खोक्को चाक्वादा ओन्ङा माआङ, मेन चाक्वा खोन्कि ह़लाम्पा म़ता। 7 खोन्कि सालुम्स़ङ काप़ ना सेङ्लावाङा म़युङ्याङ, देकिनालो सेङ्लावा अ़छ़ङ म़मुयाङ। 8 देकिनालो सालुम्स़ङ काप़चि सुम्कातात म़युङ्याङ: सेङ्लावा, चाक्वा खोन्कि ह़, खोन्कि सुम्कातात्माङ अ़क्तात्ङा म़मुयाङ। 9 आन्कान म़नाओ अ़सालुम्स़ङ लोउम्नालो निनाम्हाङ्आ म़पुवाओ अ़चुसालुम्स़ङ तोक्पो मुयाङ। देकिनालो ओ निनाम्हाङ्ओ अ़चुसालुम्स़ङ ओ, खोक्कोसाआ अ़चुछाओ अ़तुक्वादा सालुम्स़ङ अ़पुवायुङ्सा। 10 साङ निनाम्हाङ्ओ अ़चुछाएदा साकोङ्छ़ङ मु, मोसोओ अ़साकोङ्वादा ओ सालुम्स़ङ याक। साङ्आ निनाम्हाङ साकोङ्छ़ङ अ़मुन, मोसाआ निनाम्हाङ काम़प काइसु। देकिनालो निनाम्हाङ्आ अ़चुछाओ अ़तुक्वादा अ़पुवाओ अ़चुसालुम्स़ङ्दा मोसाआ साकोङ्छ़ङ मान्मुयुक्तु। 11 खोन्कि सालुम्स़ङ ओक्कोङा ओ, निनाम्हाङ्आ आन्कान अ़लुक्निन्ओ ह़ङ्म़ङ म़पुवायुङ्सा, खोन्कि ओ ह़ङ्म़ङ खोक्कोसोओ अ़चुछाएदा याक्याङ। 12 साङ्एदा निनाम्हाङ्ओ अ़चुछा म़याक्याङ, मोएदा ह़ङ्म़ङ याक्याङ, साङ्एदा निनाम्हाङ्ओ अ़चुछा ऩयाक्निनिन, मोएदा ह़ङ्म़ङ मात्द़ङ। अ़लुक्निन्ओ ह़ङ्म़ङ 13 खानानिन्एदा अ़लुक्निन्ओ ह़ङ्म़ङ याक्याङ्ओ सिन्तानुम निकिना निनाम्हाङ्ओ अ़चुछाएदा साकोङ्छ़ङ कामु खानानिन ओ य़ङ्चि छाप्नायुङ्नानिन। 14 खोक्कोएदा याक्याङ्ओ ओ आन्सोम्कुवाआ निनाम्हाङ्ओ अ़चुमिन्मावा आन्कान दि दोरुम्नुछाङ खोक्कोसाआ आन्य़ङ अ़एन। 15 खोन्कि आन्कान दि दोत्तुम्ओ, निनाम्हाङ्आ अ़एन निकिना आन्कान सिन्तुम्नालो ओछाङ आन्कान सिन्तुम, आन्कान खोक्को दि दोत्तुम्युङ्सुम, मो आन्कान तोक्तुम्युङ्सुम। 16 साङ्आ ख्रिस्तियान अ़यावा हेवा मुयाङ्ओ खा, मो हेवाआ स़मादा अ़खात्तुन्ओ मुयाङ्नालो खोसाआ यामात्तुप़ने, खोन्कि मोसोओ अ़हेवाआ स़मादा अ़खात्तुन्ओ मुयाङ्नालो निनाम्हाङ्आ खो ह़ङ्म़ङ अ़प़। मेन ओवाको हेवाछाङ युङ्याङ, मोसाआ स़मादा तारुलाचि, अ़ङ्का मोसोओ अ़तुक्वादा खानानिन यामारानिन्नि अ़लोनान्निमिन। 17 झारा अ़अ़त्पा काचि हेवा ओ। मेन मो झारा हेवाआ स़मादा अ़खात्तुन्चिन। 18 आन्कान सिन्तुम्योम, आन्कान निनाम्हाङ्एदाङ्का लिसिन्ओ साङ्छाङ हेवा अ़मुनिन, मेन निनाम्हाङ्आङा मो अ़रात, खोन्कि सैतानाआ मो नोप्मा अ़ऱन। 19 आन्कान सिन्तुम्योम आन्कान निनाम्हाङ्ओ अ़चुछाचि ओ, खोन्कि झारा हेन्खामा सैतानाओ अ़क़म्मादा याक्याङ। 20 आन्कान सिन्तुम्योम निनाम्हाङ्ओ अ़चुछा म़तायुङ्सा, खोन्कि अ़छ़ङ निनाम्हाङ आन्कान खाङ्म़मेत्तायुङ्सा। मोवात्नि आन्कान निनाम्हाङ अ़छ़ङ म़मुयाङ निकिना सिन्तुम्ने। खोन्कि ओन्ग़रि आन्कान अ़छ़ङ निनाम्हाङ्एनान अ़क्नि याइन्येन, देकिनालो खोक्कोसोओ अ़चुओ छा येसु ख्रिस्तएनान आन्कान यावायोक्दा अ़क्नि याइन्येन। खोक्को अ़छ़ङ निनाम्हाङ खोन्कि अ़लुक्निन्ओ ह़ङ्म़ङ म़युङ्याङ। 21 अ़चुप्पो छाचि ओ, सेम्पोक्चिदाङ्का खानानिन अ़थाया युङानिन। |
© Wycliffe Bible Translators, Inc. All rights reserved.
Wycliffe Bible Translators, Inc.