१ युहन्ना 3 - बान्तावा राईनिनाम्हाङ्ओ अ़चुछाचि 1 खानुम, निनाम्हाङ पापाआ आन्कान देम ब़द्धे सोमाम़तुक्तायुङ्सा! खोन्ओसा आन्कान निनाम्हाङ्ओ अ़चुछाचिनि लोमादोत, खोन्कि अ़नुछ्याछाङ ओ। हेन्खामादाओ म़नाचिआ आन्कान मान्सिन्दामाङा मोचिआ निनाम्हाङ मान्सिन्दामा ओ। 2 सोमातुक्नाङ्नानिन्ओ यावाचि ओ, ओन्ग़रि आन्कान निनाम्हाङ्ओ अ़चुछाचि ओ, खोन्कि आन्कान माय़ङ देलिसिन ओ, मो ओन्ग़रितारि मान्सिन्युक्तुम। मेन आन्कान सिन्तुम्योम, ख्रिस्त खाङ्म़मुनान्चिन्ओ ग़रि आन्कान्छाङ खोक्कोवाकोङा लिसिन, देकिनालो खोक्को देत्नि म़कात्याङ, आन्कान मोवात्निङा खोक्को खाम। 3 खोन्कि खोक्को म़सेङ्याङ्वात्निङा खोक्कोएदा सोम्कुवा कामुचि झारा आप्पि म़सेङ्नान्चिन। 4 हेवा कामु झारासाआ य़ङ्हुप्ओ अ़देङ्सालाप्पादा फित्चि म़मु, हेवा मुमाङा य़ङ्हुप फिमा ओ। 5 आन्हेवा लेत्सि ख्रिस्त म़ताओ य़ङ खानानिन त़सिन्तुम्योम, खोन्कि खोक्कोएदा हेवा मात्द़ङ। 6 खोक्कोएदा कायुङ साङ्छाङ हेवा अ़मुनिन्युङ्निन। हेवा कामुयुङ्आ ना खोक्को खायुङ्सु ना सिन्तुयुङ्सु। 7 सोमातुक्नाङ्नानिन्ओ अ़चुप्पो छाचि ओ, खाक्कोछाङ म़नाआ खानानिन ऩधान्तिमिन्ने! साङ अ़नुवाक काचि मु, मोङा साम्योक्मि ओ, येसु साम्योक्मि म़मुयाङ। 8 साङ हेवा मु, खो सैतानादाङ्का ओ, देकिनालो सैतानाआ ना अ़पुङ्चिपुक्दाङ्काङा हेवा मुवायुङ्सा। निनाम्हाङ्ओ अ़चुछा खाङ्मुमान्चिन्ओ अ़तुक्वा ना सैतानाओ अ़काचिचि लुक्मा दोराङाओ। 9 झारा निनाम्हाङ्दाङ्का म़लिसाओचिआ हेवा ऩमुनिन्युङ्निन, देकिनालो खोक्कोएदा निनाम्हाङ्ओ अ़चुच़माथाङ्मा याक, खोन्कि खो हेवा मुमायुङ्माङा अ़ऱनिन, देकिनालो खो निनाम्हाङ्एदाङ्का लिसाओ। 10 निनाम्हाङ्ओ अ़चुछाचि साङ्चि ओ, खोन्कि सैतानाओ अ़छाचि साङ्चि ओ, ओदाङ्काङा आन्कान सिन्तुम, साङ नुलोक काचि अ़मुनिन माङ्लो साङ्आ खोसोओ ख्रिस्तियान अ़यावाचि सोमाअ़तुक्तुन्चिन। अ़क्छा निएदा सोमातुक्मुवानिन 11 खानानिन्आ बुयादाङ्काङा त़एनुम्ओ य़ङ्खान ओङा ओ, “अ़क्छा निएदा आन्कान सोमातुक्मुमादोत।” 12 आन्कान कयिन्वाको लिमा अ़नुनिन, खो अ़अ़त्पा लिसाकि अ़निछा हाविल सेरु। कयिन्आ देकि अ़निछा सेरु? देकिनालो मोसोओ अ़काचिचि अ़अ़त्पा म़याआङा, खोन्कि अ़निछाओ अ़काचिचि साम्योक्मि म़मुवाङा। 13 ख्रिस्तियान यावाचि ओ, हेन्खामादाओ म़नाचिआ खानानिन ऩङाऩछिरिन्हिदा त़दोम्तिन्दान्मिन्ने। 14 आन्कान सिन्तुम्योम, आन्कान स़मादाङ्का ह़ङ्म़ङ्दा सोत्तिन्युङ्सिन्चिन, देकिनालो आन्कान ख्रिस्तियान यावाचि सोमातुक्तुम्योम्च़म। साङ खासोमाअ़तुक्निन, मो स़मादा याक। 15 ख्रिस्तियान अ़यावा ऩङाकाछित झारा म़ना कासेत ओ, खोन्कि खाक्कोछाङ म़नाकासेत्एदा अ़लुक्निन्ओ ह़ङ्म़ङ अ़याक्निन्नि खानानिन त़सिन्तुम्योम। 16 ओदाङ्काङा सोम्तुक्मा दि ओ निकिना आन्कान सिन्तुम, देकिनालो ख्रिस्तआ आन्को निकिना अ़चुह़ङ्म़ङ म़पुवा। खोन्ओसा आन्कान्छाङ ख्रिस्तियान आन्यावाचिओ निम्पाङ आन्ह़ङ्म़ङ प़मादोत। 17 मेन हेन्खामादाओ चासुम्छेन्बि कातोक्आ साकोङ्छ़ङ कामु हाप्ताओ खाकिछाङ अ़साकोङ्वा खोएदा छाक्लो मुनालो निनाम्हाङ्ओ अ़चुसोम्तुक्मा मोएदा देत्नि याक? 18 अ़चुप्पो सोमातुक्नाङ्नानिन्ओ छाचि ओ, य़ङ्सिवा खोन्कि हान्माआ ओन्ङा आन्कान सोमातुक्अ़मुन्मिन्ने, मेन काचि खोन्कि अ़छ़ङ्आ सोमातुक्मुन्ने। निनाम्हाङ्ओ अ़चुबुदा राक 19 आन्कान ओदाङ्काङा अ़छ़ङ्दाओ निकिना आन्कान सिन्तुम, खोन्कि निनाम्हाङ्ओ अ़चुबुदा आन्साकोङ्वा सेवाङ्नि लु, 20 खाउग़रि आन्साकोङ्वाआ आन्कान लाहि म़पाक, देकिनालो निनाम्हाङ आन्साकोङ्वादाङ्का तोक्पो म़मुयाङ, खोन्कि खोक्कोसाआ झारा अ़सिन्याङ। 21 सोमातुक्नाङ्नानिन्ओ यावाचि ओ, आन्साकोङ्वाआ आन्कान लाहि म़पाक्निन्नालो निनाम्हाङ्ओ अ़चुबुदा खात्मा आन्कान राक तोक्तुम। 22 खोन्कि आन्कान दि दोत्तुम, खोक्कोएदाङ्का तोक्तुम, देकिनालो आन्कान खोक्कोसोओ अ़चुलोमाय़ङ्चि काङ्सिन, खोन्कि खोक्कोसोओ अ़चुऩङानुलो काचि मुन। 23 खोक्कोसोओ अ़चुलोमाय़ङ ओङा ओ, खोक्कोसोओ अ़चुछा येसु ख्रिस्तओ अ़चुऩङ्दा आन्कान साकोङ्छ़ङ मुमादोत, खोन्कि खोक्कोसाआ म़लोवाओवात्नि आन्कान अ़क्छा निएदा सोमातुक्मुमादोत। 24 झारा निनाम्हाङ्ओ अ़चुलोमाय़ङ्चि काकाङ निनाम्हाङ्एदा म़युङ, खोन्कि मोचिएदा निनाम्हाङ म़याक। खोक्कोसाआ आन्कान म़पुवाओ सेङ्लावालाम्पाङा निनाम्हाङ आन्कान्एदा म़युङ्याङ्ओ य़ङ आन्कान सिन्तुम्योम। |
© Wycliffe Bible Translators, Inc. All rights reserved.
Wycliffe Bible Translators, Inc.