१ युहन्ना 2 - बान्तावा राईख्रिस्त आन्काफापा 1 सोमातुक्नाङ्नानिन्ओ अ़ङ्छाचि ओ, खानानिन हेवा मान्मुदानिन निकिना अ़ङ्का ओ य़ङ छाप्तुङ्योङ। मेन साङ हेवा मुनुछाङ निनाम्हाङ पापाएदा आन्लिप्पादा काचेप अ़क्छा साम्योक्मि येसु ख्रिस्त म़युङ्याङ। 2 खोक्को आन्हेवा लेत्मा निकिना हेन्खोक्वा म़लिसा, खोन्कि आन्को निम्पाङ ओन्ङा माआङ, मेन झारा हेन्खामादाओ म़नाचिओ निकिनाछाङ ओ। 3 आन्कान खोक्कोसोओ अ़चुलोमाय़ङ्चिवा च़न्नालो अ़नुछ्याङा आन्कान खोक्को सिन्तुम्योम निकिना ओ य़ङ्दाङ्काङा आन्कान सिन्मा ऱम। 4 साङ्आ “खोक्को अ़ङ्का सिन्तुङ्योङ”नि य़ङ, मेन खोक्कोसोओ अ़चुलोमाय़ङ अ़लोउन्नालो मो सोज्जे ओ, खोन्किना मोएदा अ़छ़ङ मात्द़ङ। 5 मेन साङ्आ खोक्कोसोओ अ़चुय़ङ लोउ, खोएदा निनाम्हाङ्लिप्पाओ अ़चुसोम्तुक्मा अ़नुछ्याङा ताला। ओ य़ङ्दाङ्काङा आन्कान खोक्कोएदा याइन्येन्निओ य़ङ्दा आन्कान अ़छ़ङ लिसिन। 6 साङ निनाम्हाङ्एदा युङ्ङानि य़ङ, खो ख्रिस्तओ अ़चुच़माथाङ्मावात्नि कोन्मादोत। अ़ऩङ्वा लोमाय़ङ 7 सोमातुक्नाङ्नानिन्ओ अ़ङ्यावाचि ओ, अ़ङ्का अ़ऩङ्वा लोमाय़ङ छाप्तुङ्योङ्ओ माआङ, मेन बुयाओ लोमाय़ङ्ङा ओ, मो अ़पुङ्चिपुक्दाङ्काङा खानानिन्एदा युङाङा। 8 खोन्नुछाङ अ़क्तात अ़ऩङ्वा लोमाय़ङ अ़ङ्का आम्नुओ निम्पाङ छाप्तुङ्योङ। ओसोओ अ़छ़ङ ख्रिस्तदा खोन्कि खानानिन्एदाछाङ दात, देकिनालो कुन्यामा माखात्याङ खोन्कि अ़छ़ङ साम बुयादाङ्काङा लेत्याङ। 9 साङ साम्दा युङ्ङाङानि य़ङ, मेन अ़द़क्छाबुवाचि ऩङाछिरुचिनालो हान्छाङ मो कुन्यामादाङा युङ्याङ। 10 साङ्आ अ़निछा सोमातुक्तु, मो साम्दा युङ, खोन्कि खो मोदा धुङ्माओ अ़तुक्वाङा मात्द़ङ। 11 मेन साङ्आ अ़निछा ऩङाछिरु, मो कुन्यामादा युङ्याङ, खोन्कि कुन्यामादा कोन, खोन्कि खो खादात्नि खात्याङ मोसाआ अ़सिन्तुन्योन, देकिनालो कुन्यामाआ मोसोओ अ़म़क दोप्म़क मुयुङ्सु। 12 सोमातुक्नाङ्नानिन्ओ अ़ङ्छाचि ओ, अ़ङ्का खानानिन छाप्नाङ्नानिन, देकिनालो ख्रिस्तओ अ़चुऩङ्दा आम्नुओ हेवाचि ऩलेत्तिन्प़न्युङ्सिन। 13 आपाचि ओ, अ़ङ्का खानानिन छाप्नाङ्नानिन, देकिनालो खोक्को अ़पुङ्चिपुक्दाङ्काङा कायुङ खानानिन्आ त़सिन्तुम्योम। सावाछाचि ओ, अ़ङ्का खानानिन छाप्नाङ्नानिन, देकिनालो खानानिन अ़त्लो काच़एदा त़छोसिन्युङ्सिन। अ़चुप्पो छाचि ओ, अ़ङ्का खानानिन छाप्नाङ्नानिन, देकिनालो खानानिन्आ निनाम्हाङ पापा त़सिन्तुम्योम। 14 आपाचि ओ, अ़ङ्का खानानिन छाप्नाङ्नानिन, देकिनालो खोक्को अ़पुङ्चिपुक्दाङ्काङा कायुङ खानानिन्आ त़सिन्तुम्योम। सावाछाचि ओ, अ़ङ्का खानानिन छाप्नाङ्नानिन, देकिनालो खानानिन काछो त़मुन्येन, खोन्कि निनाम्हाङ्ओ अ़चुय़ङ खानानिन्एदा याक, खोन्कि खानानिन अ़त्लो काच़एदा त़छोसिन्युङ्सिन। हेन्खामा सोमामान्तुक्दानुम 15 हेन्खामा सोमामान्तुक्दानुम ना हेन्खामादाओ सामाचिङा सोमातुक्तानुम्च़म। साङ्आ हेन्खामा सोमातुक्तुनालो निनाम्हाङ पापाआ मो सोमाअ़तुक्तुन। 16 देकिनालो हेन्खामादाओ झारा सामाचि माङ्लो पोक मित्मा, म़क्ओ खाङ्मामिन्मा, ह़ङ्म़ङ्ओ ऱक्भाक निनाम्हाङ पापाएदाङ्का म़ताओ माआङ, मेन हेन्खामादाङ्का म़ताओ। 17 हेन्खामा खोन्कि हेन्खामादाओ अ़अ़त्पा मिन्माचि म़लुक्खात, मेन निनाम्हाङ्ओ अ़चुमिन्मावात्नि काच़ अ़धुन्तारि युङ्युङ। ख्रिस्तओ अ़चुदेङ्सालाप्पादा काचिन्चि चाप्चेत्माय़ङ 18 सोमातुक्नाङ्नानिन्ओ छाचि ओ, आदेङ्ओ ग़रि ओङा ओ। ख्रिस्तओ अ़चुङेङ तायाङ निकिना खानानिन्आ त़एनुम्युङ्सुम। ओन्ग़रिछाङ ख्रिस्तओ अ़चुङेङ्चि ब़द्धे म़ताचिआयुङ्सा। खोन्ओसा ओ आदेङ्ओ ग़रिओ निम्पाङ आन्कान सिन्तुम्योम। 19 मोचि आन्कान्एदाङ्का म़फेआन्खात्तान्चिन, देकिनालो मोचि आन्कोचि माआङ। मोचि आन्कोचिओदे आन्कान्एनान अ़क्नि म़युङाओ, मेन मोचि झारा आन्कोचि माआङ्निओ य़ङ खाङ्मुमा निम्पाङ मोचि म़लोन्ताखाराओ। 20 मेन खानानिन सेङ्याङ्ओ निनाम्हाङ्लाम्पा ऩछेन्तिन्युङ्सिन, खोन्कि खानानिन झारासा अ़छ़ङ त़सिन्तुम्योम। 21 खानानिन अ़छ़ङ त़सिन्तिमिन्येन निकिना अ़ङ्का छाप्तुङ्ओ माआङ, मेन खानानिन्आ अ़छ़ङ त़सिन्तुम्योम निकिना छाप्तुङ्ओ। देकिनालो अ़छ़ङ्दा म़प्मा अ़याक्निन निकिना खानानिन्आ त़सिन्तुम्योम। 22 काम़प साङ ओ? साङ्आ येसुङा ख्रिस्तओ निकिना ऩङाछिरु खोङा ओ। साङ्आ निनाम्हाङ पापा खोन्कि अ़चुछा ऩङाअ़छित, ओङा ख्रिस्तओ अ़चुङेङ ओ। 23 निनाम्हाङ्ओ अ़चुछा ऩङाकाछित्एदा निनाम्हाङ पापा ऩयुङ्निन। साङ्आ निनाम्हाङ्ओ अ़चुछा लोउ, मोएदा निनाम्हाङ पापाछाङ म़युङ। 24 खानानिन्आ बुयादाङ्का दि त़एनुम्युङ्सुम, मो खानानिन्एदा युङ्युङ्ने। बुयादाङ्काङा त़एनुम्ओ मो य़ङ खानानिन्एदा युङ्युङ्नालो खानानिन निनाम्हाङ्ओ अ़चुछा खोन्कि निनाम्हाङ पापाएदा त़युङिन। 25 खोन्कि येसुआ आन्कान दि म़हिप्ताओ, मो अ़लुक्निन्ओ ह़ङ्म़ङ ओ। 26 ओ झारा य़ङ्चि खानानिन साङ्चिआ धान्मा ऩलाप्तिन्येन, मोसोओ अ़तुक्वादा अ़ङ्का खानानिन छाप्नाङ्नानिन। 27 मेन खानानिन्आ ख्रिस्तलाम्पा सेङ्लावा त़तोक्तुम्युङ्सुम, खोक्को खानानिन्एदा म़युङ, साङ्आछाङ खानानिन चिन्मा अ़दोत्निन, देकिनालो खानानिन सेङ्लावाआङा झारा य़ङ्ओ अ़तुक्वादा ऩचिन्तिन। खोक्कोसाआ ऩचिन्तिन्ओ य़ङ अ़छ़ङ मु, खोन्कि सोज्जेओ अ़मुनिन। खानानिन ऩचिन्तिन्वात्नि ख्रिस्तदा युङायाक्तानिन। निनाम्हाङ्ओ अ़चुछाचि 28 खोन्कि हान अ़चुप्पो सोमातुक्निङ्निओ छाचि ओ, खोक्कोएदा युङायाक्तानिन, खोन्ओसा खोक्को खाङ्म़मुनान्चिन्ओ ग़रि आन्कान राक तोक्तुम्ने, खोन्कि खोक्कोसोओ अ़चुबुदा आन्कान लेजोदा अ़छुक्तिमिन्ने। 29 ख्रिस्त साम्योक्मि म़मुयाङ निकिना खानानिन त़सिन्तुम्नालो खानानिन सिन्मादोत झारा नुलोक काच़चि निनाम्हाङ्एदाङ्का म़लिसाओ। |
© Wycliffe Bible Translators, Inc. All rights reserved.
Wycliffe Bible Translators, Inc.