१ कोरिन्थि 7 - बान्तावा राईसायाकाम्माओ अ़तुक्वादाओ सेन्माय़ङ्चि 1 हान खानानिन्आ त़छाप्तुम्च़म्ओ य़ङ्चिओ अ़तुक्वादा खाम्ने। म़ना साया मान्काम्माङ युङ्मा अ़नुवाक ओ। 2 मेन ब़द्धे ताङ्लान लियाङ्ओसा झारा म़नाओ अ़खिम्हाङ्मा युङ्मादोत, खोन्कि झारा मेत्छामाओ अ़खिम्हाङ्पा युङ्मादोत। 3 अ़खिम्हाङ्पाआ खोसोओ अ़खिम्हाङ्माओ सायाकाम्माय़ङ्ओ अ़पाङ प़ने खोन्कि मोवात्निङा अ़खिम्हाङ्माआछाङ अ़खिम्हाङ्पा सायाकाम्माय़ङ अ़पाङ प़ने। 4 खिम्हाङ्माओ अ़पोक्दा मोसोओ ओन्ङा माआङ, मेन मोसोओ अ़खिम्हाङ्पाओछाङ अ़पाङ याक। मोवात्निङा अ़खिम्हाङ्पाओ अ़पोक्दा खोसोओ ओन्ङा माआङ, मेन खोसोओ अ़खिम्हाङ्माओछाङ अ़पाङ याक। 5 खिम्हाङ्पा खिम्हाङ्मा अ़क्छा निएदा फेआनिन्चिन्कि मान्युङ्दानिन। खानानिन यामात्मादा ग़रि पाक्मा त़ऱम्ने निकिना ह़वाङ्सोओ यायोक्आ ओन्ङा थुत्मेत्लो ग़रिओ निम्पाङ फेक्मान्चिन त़ऱन। खोन्किना खानानिन अ़क्नि लासायुङानिन, माङ्नालोना खानानिन्आ आम्नुओ मिन्मा क़म्मा त़ऱन्मिन्ओसा सैतानाआ खानानिन चिन्माखाङ्मादा धान्मा त़ऱन। 6 अ़ङ्का ओ य़ङ लोमाय़ङ्वा माआङ, मेन यायोक प़मा निम्पाङ लोनाङ्नानिन। 7 झारा म़नाचि अ़ङ्कावात्निङा म़युङ्नेनि अ़ङ्का मिन्ङा। मेन झारा म़नाआ नि-निपाराओ लावामि सावा निनाम्हाङ्दाङ्काङा तोक्तु, अ़क्छाआ अ़क खालाओ खोन्कि निआ नि खालाओ। 8 हान साया मान्काम्कादा खोन्कि मेन्मित्माचि अ़ङ्का लोङ्च़ङ। मोचि अ़ङ्कावात्नि साया मान्काम्माङ युङ्मा ना अ़नुवाक ओ। 9 मेन मोचिआ आप्पि अ़चुमिन्मा क़म्मा ऩऱन्नालो मोचि साया म़काम्ने, देकिनालो अ़त्लो च़मा मिन्माआ ह़त्मादाङ्का ना साया काम्माङा अ़नुवाक ओ। 10 साया म़काम्साओचि अ़ङ्का लोङ्च़ङ, ओ अ़ङ्को अ़ङ्लोमाय़ङ माआङ, मेन हाङ्पाओ अ़चुलोमाय़ङ ओ। खिम्हाङ्मा अ़खिम्हाङ्पाएदाङ्का अ़फेक्नान्चिमिन्ने। 11 मेन मो फेक्नान्चिन्नालो मो साया मान्काम्माङ युङ्ने माङ्लो मो अ़खिम्हाङ्पाएनान लातोङ्ने। खोन्कि अ़खिम्हाङ्पाआ अ़खिम्हाङ्मा अ़छिरुन्ने। 12 मेन निचि अ़ङ्का ओवात्नि लोङ्च़ङ, ओ लोमाय़ङ अ़ङ्को ओ, हाङ्पाओ माआङ। ख्रिस्तदा साकोङ्छ़ङ कामु निछाओ साकोङ्छ़ङ मान्मुकादा अ़खिम्हाङ्मा युङ्याङ, खोन्कि मोएनान युङ्मानि मिन्नालो मोसाआ अ़खिम्हाङ्मा अ़छिरुन्ने। 13 खोन्कि अ़क्छा ख्रिस्तदा साकोङ्छ़ङ कामु मेत्छामाओ साकोङ्छ़ङ मान्मुकादा अ़खिम्हाङ्पा युङ्याङ, खोन्कि मोएनान्ङा युङ्मानि मिन्नालो मोसाआ अ़खिम्हाङ्पा अ़छिरुन्ने। 14 देकिनालो साकोङ्छ़ङ मान्मुकादा अ़खिम्हाङ्पा साकोङ्छ़ङ कामु अ़खिम्हाङ्मालाम्पा निनाम्हाङ्एदा लोक्माखान्तुओ मु खोन्कि साकोङ्छ़ङ मान्मुकादा अ़खिम्हाङ्मा मोसोओ साकोङ्छ़ङ कामु अ़खिम्हाङ्पालाम्पा निनाम्हाङ्एदा लोक्माखान्तुओ मु। माङ्नालोना मोचिओ अ़चुछाचि म़पोप, मेन अ़नुछ्याङा मोचि निनाम्हाङ्एदा लोक्मा खान्तुचिओ म़मुयाङ। 15 मेन साकोङ्छ़ङ मान्मुकादाआ छित्मानि मिन्नालो छित्मा पुवानुम। मोवात्नि ओ ग़रिदा साकोङ्छ़ङ कामुपा निछा माङ्लो निछामा फोङ। निनाम्हाङ्आ आन्कान सेवाङ्नि युङ्मा निकि म़बुत्ताओ। 16 खिम्हाङ्मो, खाना दि त़सिन्तुङु, आम्तुक्वाआ साकोङ्छ़ङ मान्मुकादा आम्खिम्हाङ्पा लेत्मा ऱहे? माङ्लो खिम्हाङ्पो, खाना दि त़सिन्तुङु आम्तुक्वाआ साकोङ्छ़ङ मान्मुकादामा आम्खिम्हाङ्मा लेत्मा ऱहे? 17 देत्नि त़युङिन्येन्हिदा हाङ्पा येसुआ खानानिन ऩछेन्तिन खोन्कि अ़चुओ म़ना लिमा निनाम्हाङ्आ ऩबुत्तिन, मोवात्निङा युङानिन। झारा साम्भुङ्चिओ निम्पाङ अ़ङ्य़ङ्हुप ओङा ओ। 18 खाक्को म़ना बुत्मा बुयाङा सिप्मायाम्बुन पाक्ताचिआयुङ्सा? खोसाआ सिप्मायाम्बुन्ओ बुन खान्मा अ़लाप्तुन्ने। खाक्को म़ना बुत्मा बुयाङा सिप्मायाम्बुन मान्पाक्युक्ता? खो सिप्मायाम्बुन पाक्मा अ़दोत्निन। 19 सिप्मायाम्बुन पाक्मा दित्छाङ माआङ खोन्कि सिप्मायाम्बुन मान्पाक्दामाछाङ दित्छाङ माआङ। मेन निनाम्हाङ्ओ अ़चुलोमाय़ङ काङ्माङा अ़च़वाङ य़ङ ओ। 20 खानानिन देत्नि त़युङिन्येन्हिदा निनाम्हाङ्आ ऩबुत्तिन्ओ, मोवात्निङा युङ्मादोत। 21 निनाम्हाङ्आ खाना ऩबुत्ताओ ग़रि दि खाना हारुक त़मुवाङा? हारुक त़मुवाङानालो ओ य़ङ्आ आम्मिन्मा चाअ़अ़त्निन्ने। मेन फोङ्मान्चिन त़ऱनालो खाना फोङ्सान्चिन। 22 देकिनालो हाङ्पाआ अ़बुत्ताहिदा खाक्को म़ना हारुक मुवाङा, हान मो हाङ्पाओ अ़चुलेत्वा लिसायुङ्सा। मोवात्निङा अ़बुत्ताहिदा खाक्को म़ना फोङ्साङा, हान मो ख्रिस्तओ अ़चुहारुक लिसायुङ्सा। 23 खानानिन निनाम्हाङ्आ आम्नुओ लुङ अ़छोराकि ऩखिरिन ओ, म़नाचिओ अ़चुहारुक मान्लिदानिन। 24 खोन्ओसा, ब़ब़, नाना खोन्कि निछाचि ओ, देत्नि त़युङिन्येन्हिदा खानानिन निनाम्हाङ्आ ऩबुत्तिन, मोवात्निङा निनाम्हाङ्एनान युङ्मादोत। 25 हान वारिसाचिओ अ़चुतुक्वादा अ़ङ्का हाङ्पाएदाङ्का खाक्कोछाङ लोमाय़ङ मान्तोक्युक्तुङ। मेन हाङ्पाओ अ़चुसोम्तुक्मालाम्पा अ़क्छा सोम्कुवा मुमा खान्तुओ लिसाङ्ओसा अ़ङ्का खानानिन अ़ङ्यायोक प़नानिन। 26 आइमित्ओ दुखा खाम्हिदा खानानिन देत्नि त़युङिन्येन मोवात्निङा खानानिन युङ्मा अ़नुवाक लि हे नि अ़ङ्का मिन्ङाङा। 27 दि खाना साया त़काम्सायुङ्सा? खोन्नालो छित्मा मान्लाप्दो। दि खाना साया मान्काम्त़युक? खोन्नालो सायाकाम्मा मान्लाम्दा। 28 मेन खाना साया त़काम्सानुछाङ हेवा मान्मुत़युक। मोवात्निङा वारिसा सायाकाम्नुछाङ, हेवा अ़मुनिन। मेन साया काकाम्चि, ओ हेन्खामादा दुखा म़तोक खोन्कि अ़ङ्का खानानिन मो दुखाचिदाङ्का रात्मानि मिन्ङाङा। 29 ब़ब़, नाना खोन्कि निछाचि ओ, अ़ङ्का य़ङ्ङाङाओ ओङा ओ, ग़रि दुन्याङ, खोन्कि हान्दाङ्का खिम्हाङ्मा कातोक्चि खिम्हाङ्मा मात्द़ङ्वा म़लिकि म़युङ्ने। 30 काखाप्चि मान्खाप्कादाचिवात्नि अ़चुऩङाकानुचि अ़चुऩङामान्नुकादाचिवात्नि म़युङ्ने, खोन्कि दि-दि काखित्चि, खोचिएदा दित्छाङ मात्द़ङ्वात्नि म़युङ्ने। 31 हेन्खामादाओ सामाचि कायाङ्चिआ मो सामाचिदा मिन्मा ऩपाक्तुन्ओवात्नि म़च़ने। देकिनालो ओन्ग़रि ओ हेन्खामाओ अ़कात्मा माखात। 32 खानानिन झारा मिन्राक मान्मुकादा लिसानिन्नि अ़ङ्का मिन्ङाङा। सायामान्काम्युक्ओ म़नाआ देत्नि हाङ्पाओ अ़चुऩङा नुमानिओ काचिचिओ अ़तुक्वादा मिन्राक मु। 33 मेन सायाकाम्साओ म़नाआ देत्नि अ़खिम्हाङ्माओ अ़ऩङानुमा निकिना हेन्खामादाओ काचिचिओ अ़तुक्वादा मिन्राक मु। 34 ओवाको म़नाओ अ़मिन्मा हा। मोवात्निङा सायामान्काम्युक्ओ मेत्छामाआ माङ्लो वारिसाआ अ़पोक खोन्कि अ़लावा ह्वातात्माङ्दा देत्नि सेङ्लो युङ्मा निकिना निनाम्हाङ्ओङा अ़तुक्वादा मिन्राक मुयुङ। मेन सायाकाम्साओ मेत्छामाआ देत्नि अ़खिम्हाङ्पाओ अ़ऩङानुमा निकिना हेन्खामादाओ य़ङ्चिदा मिन्राक मु। 35 अ़ङ्का ओ य़ङ खानानिन य़ङ्हुप्आ छुम्मा निकिना माआङ्ओ, मेन आम्नुओ नुलोक्ओ निम्पाङ य़ङाङ्ओ। खानानिन आम्नुओ झारा मिन्मा पाक्तानुम्कि हाङ्पाको अ़चुकाचि मुमायुङ्मा रुवानिन निकिना य़ङ्मा लाम्ङाङाओ। 36 अ़क्छा म़नाआ दोरुओ वारिसाएनान नुलोक अ़च़निनिन्ओ खोसाआ मित्तु खोन्कि मो वारिसाओ अ़सायाकाम्मा ग़रिछाङ पाङ्खात्याङ्नालो मो म़ना सायाकाम्मा स़नालो सायाकाम्मा ऱ। मो हेवा अ़लिनिन। मोचि सायाकाम्मादोत। 37 मेन खाक्को म़नाआ अ़साकोङ्वादा मित्तुयुङ्सु, राकाङ्थेत्निदा मान्छुक्युक, अ़मिन्मा क़म्मा ऱ, खोन्कि खोसाआ वारिसाएनान सायामान्काम्दामाओ अ़साकोङ्वादा अ़छ़ङ मुयुङ्सुनालो मो अ़नुवाक य़ङ ओ। 38 ओवात्नि साङ वारिसा सायाकाम, मो अ़नुवाक य़ङ ओ, मेन साङ सायाअ़काम्निन, मोछाङ अ़नुवाक य़ङ ओ। 39 अ़खिम्हाङ्पा ह़ङ्याङ्ओन अ़खिम्हाङ्मा अ़खिम्हाङ्पाओ अ़क़म्मादा युङ। मेन अ़खिम्हाङ्पा स़दानालो मोसाआ अ़ऩङानुसुओ म़नाएनान सायाकाम्मा तोक्तु। मेन खो हाङ्पाओङा अ़चुम़ना याक्मादोत। 40 मेन मो मोन्तेकाङा युङ्नालो च़लोक अ़ऩङानुनि अ़ङ्का मिन्ङाङा। ओ ना अ़ङ्मिन्मा ओ, खोन्कि अ़ङ्का मिन्ङाङा अ़ङ्काएदाछाङ निनाम्हाङ्ओ अ़चुलावा म़याक्याङ। |
© Wycliffe Bible Translators, Inc. All rights reserved.
Wycliffe Bible Translators, Inc.