१ कोरिन्थि 5 - बान्तावा राईसाम्भुङ्दा ताङ्लान 1 आम्नुओ रादा ताङ्लान लिसाओ अ़नुछ्या खाऩएत्ताङ्युङ्साङ, अ़क्छाआ अ़पाओ अ़खिम्हाङ्मा युङ्सुयुङ्सु नि। ओवात्नि ना निरावाचिओ अ़चुरादाछाङ अ़लिनिन। 2 खानानिन ऱक्भाक त़मुन। खानानिन ना सोखा मुमा मान्दोत्याङ्ओ कि? ओवाको काचि कामु म़नाचि आम्नुओ यावायोक्दाङ्का लोइसाखाइसानुम्च़म। 3 अ़ङ्का खानानिन्एनान अ़ङ्पोक्दा अ़युङ्ऩङ्ऩङ्नुछाङ लावादा खानानिन्एनान युङ्ङाङा। अ़ङ्का खानानिन्एनान युङिन्वात्नि ओ काचि कामु म़नाचिओ अ़चुछ़ङ अ़ङ्का छेन्तुङ्चिउङ्युङ्सुङ। 4 खानानिन आन्हाङ्पा येसुओ अ़चुऩङ्दा त़कोविन्चिन्हिदा अ़ङ्का लावादा खानानिन्एनान युङ्ङा खोन्कि आन्हाङ्पा येसुओ अ़चुसावा मोदा म़युङ। 5 मो म़ना सैतानाओ अ़छुक्दा पाक्तानुम, ओवात्नि मोसोओ अ़पोक लुक्ने खोन्कि हाङ्पाओ अ़चुछ़ङ्छेन्मा लेन्दा मोसोओ अ़लावा लेत्ने। 6 आम्नुओ ऱक्भाक अ़नुवाक माआङ। उन्नि खमिराआ झारा बुत्थ़ बोप होम्सुलोइसुनि दि खानानिन्आ त़सिन्तिमिन्येन? 7 आम्नुओ रादाङ्का बुयाओ खमिरा माङ्लो मो अ़अ़त्पा म़ना लोइसानुम। खोन्किना खानानिन खमिरा मान्होन्माङ्ओ अ़ऩङ्वा बुत्थ़ बोप्वात्निङा त़लिसिन। आन्को काक्माखात्मा चानुचाओ थुबाछा ख्रिस्त म़युङ्याङ, खोन्किना खोक्कोसोओ अ़चुह़ अ़सोलाचिआयुङ्सा। 8 खोन्ओसा आन्कान बुयाओ खमिराआ माङ्लो अ़त्लो खोन्कि अ़अ़त्पा खमिराओ माआङ, मेन खमिरा मान्पाक्माय़ङ अ़नुवाक मिन्मा खोन्कि अ़छ़ङ ओ पेम्पाक्ओ चानुचा चान्ने। 9 अ़ङ्का अ़ङ्छाप्लावादा ताङ्लान कामुचिएनान योक मान्मुदानिन्नि खानानिन छाप्नानिन्ओ। 10 मोसोओ अ़तुप्माय़ङ ओ हेन्खामादाओ ताङ्लान कामु, च़क्ख़य़ कामु, काङाप्चि माङ्लो सेम्पोक काब़क्चिएनान योक मान्मुदानिन्नि लोनानिन्ओ माआङ, माङ्नालोना खानानिन ओ हेन्खामादाङ्का लोन्माखात्मा दोराओ। 11 अ़ङ्का छाप्तुङ्कि लोमा लाप्नाङ्नानिन्ओ य़ङ दिओनालो, साङ आप्पि साकोङ्छ़ङ कामुनि लोनान्चिन, मेन खो ताङ्लान कामु माङ्लो च़क्ख़य़ कामु माङ्लो सेम्पोक काब़क माङ्लो कासुङ माङ्लो खाबात सेत्चावा माङ्लो काङाप्खात ओ। ओवाको म़नाएनान चासिछाङ मान्युङ्दानिन। 12 देकिनालो साम्भुङ बुङ्खादाओचिओ साकोङ्छ़ङ मान्मुकादा म़नाचिओ अ़चुछ़ङ्छेन्मा अ़ङ्दिसु काचि कि? खानानिन्आङा साम्भुङ्दाओ म़नाचिओ अ़चुछ़ङ्छेन्मा अ़दोत्निन कि? 13 निनाम्हाङ्आङा साम्भुङ बुङ्खादाओचि अ़चुछ़ङ म़छेन्तुचि। साम्कालिन य़ङ्याङ, “अ़अ़त्पा म़ना आम्नुओ रादाङ्का लोइसाखाइसानुम।” |
© Wycliffe Bible Translators, Inc. All rights reserved.
Wycliffe Bible Translators, Inc.