१ कोरिन्थि 4 - बान्तावा राईख्रिस्तओ अ़चुछाम्माय़ङ्चि 1 खोन्ओसा खानानिन्आ आन्कान्का ख्रिस्तओ अ़चुकाचि कामुचि खोन्कि निनाम्हाङ्ओ अ़चुकोङ्य़ङ्ओ अ़तुप्माय़ङ म़नाचि खाकाएत पाङ कातोक्चि निकिना मित्मादोत। 2 मोन्ओन्ङा माआङ, पाङ्कातोक्चि सोम्कुवा मुमा खान्तुओचि लिमादोत। 3 मेन खानानिन्दाङ्का माङ्लो खाक्कोछाङ म़नाचिओ अ़चुछ़ङ्छेन्खादाङ्का अ़ङ्छ़ङ छेन्मा ना अ़ङ्को निम्पाङ अ़चुप्पाङ दुम ओ। अ़ङ्काछाङ अ़ङ्छ़ङ अ़छेन्ऩङ। 4 अ़ङ्को अ़ङ्देङ्सालाप्पादा दि-दि युङ्याङ निकिना अ़ङ्का अ़सिन्ऩङ्ऩङ, मेन मोसाआ अ़ङ्का मान्ह़त्माय़ङ अ़कान्ऩङ। अ़ङ्छ़ङ काछेन ना हाङ्पाङा म़युङ्याङ। 5 खोन्ओसा काइसाओ ग़रिदाङ्का बुया दित्छाङ छ़ङ्मान्छेन्दानिन। हाङ्पा म़तालो हुङानुम। दि कुइयामादा कुमायुङ्सा, खोक्कोसाआ साम्दा म़तारुचि खोन्कि म़नाचिओ अ़चुसाकोङ्वादाओ अ़चुमित्चिऩङ्चि खाङ्म़मुसुचि। मोन्ग़रि झारा म़नाचिआ निनाम्हाङ्एदाङ्का अ़चुचोन्मा अ़तोक। 6 हान, ब़ब़, नाना खोन्कि निछाचि ओ, अ़ङ्का खानानिन “तोङ-तोङ्लो य़ङ्हुप्वा च़मादोत”नि छाप्ताओ य़ङ तुप्मेत्माओ निम्पाङ अपोल्लोस खोन्कि अ़ङ्को अ़मात्ऩङ प़नायुङ्नानिन। ओवात्नि अ़क्छालिप्पा वाङ्माकि नि ऩङाछित्मा काचि अ़नुवाक माआङ। 7 निचिदाङ्का खानानिन दिदा तोक्पो त़मुन्येन? खानानिन्आ मान्तोक्त़युक्तुम्ओ दि युङ्याङ? खोन्कि खानानिन मो निनाम्हाङ्दाङ्का त़तोक्तुम्युङ्सुम्नालो मो मोहा त़तोक्तुम्ओ माआङ्वा देकि खानानिन ऱक्भाक त़मुन्येन? 8 खानानिन दोराङाओ झारा य़ङ बुयाङा खानानिन्आ त़तोक्तुम्चिउम? खानानिन कातोक त़लिसिन्चिइन्युङ्सिन? आन्कान्का मात्द़ङ खानानिन हाङ त़लिसिन? खानानिन हाङ काचि त़मुन्ओदे नुवाओ। खोन्दे आन्कान्का खानानिन्एनान हाङ मुन्काओ। 9 अ़ङ्का देत्नि लुङाङानालो, छोमाय़ङ खाङ्मुमाओ अ़देङ्दा काकोन स़माओ दन्दा कातोक छेक्मिचिवात्नि निनाम्हाङ्आ आन्कान्का छाम्माय़ङ्चि झारादाङ्का देङ्या ऩयुङ्सिन्युङ्सिन्का। खोन्किना आन्कान्का हेन्खामादा निनाम्हाङ काफाचि खोन्कि म़नाचिओ अ़चुबुदा चोप्मायु लिसिन्युङ्सिन्का। 10 ख्रिस्तओ निम्पाङ आन्कान्का खामान्सिन मुन्येन्का, मेन खानानिन ना ख्रिस्तएदा खारु कातोक त़मुन्येन। आन्कान्का मान्ऱकादा मुन्येन्का, मेन खानानिन त़छोसिन्येन। खानानिन साऩङ्वा ऩमेत्तिन, मेन आन्कान्का ऩसुङ्तिन्का। 11 आइमित्छाङ आन्कान्का सास़न्का खोन्कि वामित्मा स़न्का, आन्काओ कालाङ्द़क मुन्येन्का, आन्कान्का धात्खावा चान्युङ्सिन्का खोन्कि आन्काओ खिम मात्द़ङ। 12 आन्कान्का आन्काओ छुक्आङा चात्लो काचि मुन्युङ्सिन्का। आन्कान्का ऩसुङ्तिन्काहिदा आसिखा प़म्च़म्का। आन्कान्का दुखा ऩप़न्काहिदा आन्कान्का आङ्तुम्का। 13 आन्कान्का ऩसुङ्तिन्काहिदा आन्कान्का नुलोक य़ङ्लासिन्का। ओन्ग़रितारि आन्कान्का हेन्खामादाओ चिप्मानाम खोन्कि सिप्भाङ लिसिन्युङ्सिन्का। 14 खानानिन लेजोदा धान्मा निकिना अ़ङ्का ओ छाप्तुङ्योङ्ओ माआङ, मेन सोमातुक्तुङ्योङ्च़ङ्ओ अ़ङ्छाचिवात्नि खानानिन यायोक प़मा निम्पाङ ओ। 15 देकिनालो ख्रिस्तदा आम्नुओ कातित्चि दस हजारा म़युङ्याङ्नुछाङ आम्नुओ लावामि पापा अ़क्छा ओन्ङा म़युङ्याङ। देकिनालो नुय़ङ्खान खाएत्निकि ख्रिस्त येसुदा अ़ङ्का आम्नुओपा लिसाङ। 16 खोन्ओसा अ़ङ्का काखेङ लिसानिन्नि खानानिन यायोक प़नानिन। 17 खोवात्निओसा अ़ङ्का सोमातुक्तुङ्योङ्ओ अ़ङ्छा तिमोथि खानानिन्एदा बाइसुङ्योङ, खो हाङ्पाएदा सोम्कुवा कामु मुयाङ। अ़ङ्का झारादात्नि झारा साम्भुङ्दा दि चिन्तुङ्च़ङ, ख्रिस्त येसुएदा अ़ङ्ह़ङ्म़ङ देत्नि मुयाङ निकिना तिमोथिआ खानानिन खाऩएत्तिन। 18 खानानिन्एदाओ देम्कापाङ अ़ङ्का मोदा अ़बान्ऩङ्नि म़मिनाकिना ऱक्भाक म़लिसायुङ्सा। 19 हाङ्पाओ अ़चुमिन्मा याक्याङ्नालो अ़ङ्का खानानिन्एदा च़क्नि बान्ङा, खोन्किना मो ऱक्भाक म़नाचि देत्नि म़चेवाओ य़ङ्चि ओन्ङा माआङ, मेन मोचिओ अ़चुसावा दियाको ओ अ़ङ्का सिन्तुङ। 20 देकिनालो निनाम्हाङ्ओ अ़चुहाङ्होन चेप्मादा माआङ, सावादा याक्याङ। 21 खानानिन दि त़छेन्तुम? अ़ङ्का खानानिन्एदा तोप्मा बात्ङाकि बान्ङा हे, सोम्तुक्मा खोन्कि सिम्मान्चिन लावा बात्ङाकि बान्ङा? |
© Wycliffe Bible Translators, Inc. All rights reserved.
Wycliffe Bible Translators, Inc.