१ कोरिन्थि 2 - बान्तावा राईक्रुस्दा हेन्खोक्वा म़लिसाओ ख्रिस्त 1 ब़ब़, नाना खोन्कि निछाचि ओ, अ़ङ्का खानानिन्एदा ताङ्हिदा तोक्पो-तोक्पो य़ङ्चि माङ्लो तायादा निनाम्हाङ्ओ अ़चुकोङ्दुम्ओ अ़तुक्वादा खालुयाङ्सा मान्ताङा। 2 खानानिन्एनान युङाङ्याङ्हिदा अ़ङ्का येसु ख्रिस्त खोन्कि क्रुस्दा खोक्को ख़न्मासेत्मादाङ्का नि दित्छाङ मान्सिन्दामा अ़ङ्का अ़छ़ङ मुङ। 3 अ़ङ्का खानानिन्एदा ताङ्हिदा अ़ङ्मान्ऱदामाआ खोन्कि अ़न्नुनु अ़ङ्क़माआ अ़धुन्ताङ। 4 अ़ङ्का चेवाङ्ओ य़ङ खोन्कि खाएत्नानिन्ओ नुय़ङ्खान आम्नुओ कोङ्दा खात्ओ खोन्कि ताया याआङाओ य़ङ्चिदा मात्द़ङ्याङ, मेन सेङ्लावाओ खोन्कि सावाओ अ़खाङ्मुमादा याआङा। 5 आम्नुओ सोम्कुवा म़नाओ तायादा माआङ, मेन निनाम्हाङ्ओ अ़चुसावादा युङ्ने निकिना अ़ङ्का ओवात्नि चुवाङ। सेङ्लावाओ अ़चुखारु 6 खोन्नुछाङ आन्कान्का कालेकासिन्चिओ अ़चुरादा तायाओ य़ङ खालुन्का, मेन ओ जुगादाओ ताया माङ्लो ओ जुगादा हाङ्काचि कामुचिओ अ़चुतायादा माआङ। मोचि ना म़माखात। 7 मेन आन्कान्का निनाम्हाङ्ओ अ़चुसुकुलादाओ खोन्कि कुम्याङ्ओ अ़चुखारुदा खालुसुम्योम्का। मो आराङ्राङ बुया आन्ऩङ्लोङ्माओ निम्पाङ निनाम्हाङ्आ अ़छ़ङ म़मेत्तापुवा। 8 ओ जुगादाओ हाङ्काचि कामुचि साङ्आछाङ ओ य़ङ मान्तुप्अ़दा। अ़तुप्ताओदे मोचिआ ऩङ्लोङ्मा खान्तुओ हाङ्पा क्रुस्दा मान्ख़न्अ़दाओ। 9 मेन ओवात्नि छाप्याङ, “म़नाआ देम्खाछाङ मान्खाङ्युक्तुओ, अ़नाबाक्आ मान्एन्युक्तुओ, देम्खाछाङ मान्मित्दोओ य़ङ निनाम्हाङ्आ खोक्को सोमाकातुक्चिओ निम्पाङ म़चुम्सुप़युङ्सुचि।” 10 मेन निनाम्हाङ्आ खोक्कोसोओ अ़चुलावालाम्पा आन्कान ओ अ़चुय़ङ खाङ्म़मेत्तायुङ्सा। देकिनालो सेङ्लावाआ झारा य़ङ्चि म़लामुचि खोन्कि निनाम्हाङ्ओ तुप्मा अ़ऱन्चिमिन्ओ य़ङ्चिछाङ म़लामुचि। 11 म़नाएदा याक्याङ्ओ अ़लावाएदाङ्का नि साङ्आ म़नाओ अ़मिन्मा तुप्मा ऱ? मोवात्निङा निनाम्हाङ्ओ अ़चुमिन्मा अ़चुलावादाङ्का नि साङ्आछाङ तुप्मा अ़ऱन। 12 आन्कान हेन्खामाओ अ़लावा मान्तोक्दोम, मेन निनाम्हाङ्एदाङ्का सेङ्लावा आन्कान तोक्तुम्युङ्सुम। खोवात्निओसा आन्कान निनाम्हाङ्एदाङ्का मोहा म़पुवाओ य़ङ्चि तुप्मा ऱम्च़म। 13 ओ य़ङ्चि आन्कान्का खाएत्तुम्च़म्का, म़नाओ अ़खारुआ चिन्माय़ङ्ओ य़ङ्चिआ माआङ, मेन सेङ्लावाआ ऩचिन्तिन्काओवा आन्कान्का लावामि अ़छ़ङ्चि लावामि य़ङ्चिदा खालुसुम्च़म्का। 14 मान्लावामि म़नाआ निनाम्हाङ्ओ अ़चुलावादाङ्का म़ताओ य़ङ्चि अ़लोउन्चिन। देकिनालो ओ य़ङ्चि मोसोओ निम्पाङ खामान्सिन मु, खोन्कि खोसाआ मोचि तुप्मा अ़ऱन्चिन। देकिनालो ओचि लावालाम्पा ओन्ङा तुप्मा ऱम्च़म। 15 लावामि म़नाआ झारा य़ङ्चि छ़ङ्छेन्तुचि, मेन खो साङ्आछाङ अ़छ़ङ अ़छेन्तुन। 16 साम्कालिन्आ म़लो, “साङ्आ हाङ्पाओ अ़चुमिन्मा सिन्तुयुङ्सु? खोन्कि साङ्आ हाङ्पा यायोक प़मा ऱ?” मेन आन्कान्एदा ना ख्रिस्तओ अ़चुमिन्मा याक्याङ। |
© Wycliffe Bible Translators, Inc. All rights reserved.
Wycliffe Bible Translators, Inc.