१ कोरिन्थि 16 - बान्तावा राईनिनाम्हाङ्ओ अ़चुम़नाचिओ निम्पाङ छुक्दाम 1 हान निनाम्हाङ्ओ अ़चुम़नाचिओ निम्पाङ कोप्माय़ङ छेन्बिओ अ़तुक्वादा, गलातियाओ साम्भुङ्चि अ़ङ्का लोङ्च़ङ्ओवा चुवानिन। 2 झाराका साताओ बुयाओ लेन खानानिन झारासाआ आ-आप्पि त़दुउम्ओ अ़चित छेन्बि फेआनुम्कि कोवायुङ्सानुम। खोन्ओसा अ़ङ्का बान्ङाओ ग़रि कोप्मा अ़दोत्निन्ने। 3 खोन्किना अ़ङ्का बान्ङाकि खानानिन अ़छ़ङ त़मुम्च़म्ओ म़नाचि सिन्खा छाप्लावा अ़ङ्का प़ङ्च़ङ, खोन्कि आम्नुओ छुक्तुप्मा यरुसलेम खुन्मेत्तुङ्खाइसुङ्च़ङ। 4 खोन्किना अ़ङ्काछाङ खात्मा नुलोक लिनालो मोचि अ़ङ्काएनान अ़क्नि म़खात। पावल्ओ अ़मित्चिऩङ 5 माकेदोनियादा कोन्ङाचिन्ङाकि खानानिन्एनान अ़ङ्का तुप्सि ताङा, देकिनालो अ़ङ्का माकेदोनिया लियाङ्साङा खात्ङाङा। 6 मात्दे, खानानिन्एनान अ़क्चित्कालेन युङ्ङा माङ्लो चुङ्हिप्छाङ क़प्तुङ। खोन्कि अ़ङ्का खादा खात्ङानुछाङ खानानिन्आ अ़ङ्कोन्खा तोङ्माप़मा त़ऱङाऩङ्ने। 7 देकिनालो अ़ङ्का खानानिन्एनान अ़क ग़रिओ निम्पाङ ओन्ङा तुप्मानि अ़मिन्ऩङ। हाङ्पाआ ऩप़ङानालो खानानिन्एनान अ़क्चित्कालेन युङ्मानि मिन्ङाङा। 8 मेन पेन्तिकोस्तारि अ़ङ्का ओदा एफिसस्दा युङ्ङा। 9 देकिनालो अ़च़वाङ काचिओ अ़क्तात अ़धिवा लाप्तिखोप अ़ङ्को निम्पाङ ओदा होरायुङ्सा, मेन ओदा ब़द्धे रुकाफोक्चिछाङ म़युङ्याङ। 10 तिमोथि खानानिन्एदा बान्हिदा अ़क़मा मान्कात्माङ खानानिन्एनान अ़क्नि युङ्मा पुवानुम। देकिनालो खोछाङ अ़ङ्कावात्निङा हाङ्पाओ अ़चुकाचि मुयाङ। 11 खोन्ओसा साङ्आछाङ खो ऩङाऩछिरुन्ने, मेन खो अ़कोन्खा लाम्दा सेवाङ्नि बाइसानुम, खोन्किना खो अ़ङ्काएदा बान्ने। देकिनालो ब़ब़, निछाचिएनान म़बान निकिना अ़ङ्का खो हुङुङ्योङ। 12 हान निछा अपोल्लोस्ओ अ़तुक्वादा, नि ब़ब़, नाना खोन्कि निछाचिएनान खानानिन्एदा बान्मा निम्पाङ अ़ङ्का खो ब़द्धे राक प़ङ्युङ्सुङ। मेन आइमित बान्मा खोसोओ अ़न्नुनु अ़मिन्मा मात्द़ङ। अ़वाखाम तोक्तुहिदा खो बान। देङ्दाओ य़ङ 13 चाप्चेप्तानिन्चिन, आम्नुओ साकोङ्छ़ङ्दा नुलोक युङानिन। राक्स़रिओ म़ना लिसानिन। सावापोरिओ मुवानिन। 14 खोन्कि झारा काचि सोमातुक्मादा मुवानुम। 15 हान ब़ब़, नाना खोन्कि निछाचि ओ, खानानिन त़सिन्तुम्योम, स्तिफनास्ओ अ़खिम्लुम्पाचि अखैयादा बुयाओदु साकोङ्छ़ङ कामुचिओ, खोन्कि निनाम्हाङ्ओ अ़चुम़नाचिओ अ़चुकाचिदा खोचिङा म़वाङायुङ्सा। 16 ओवाको खोन्कि ओवात्निङा झारा काचि कामु आम्नुयावाओ अ़क़म्मादा युङानिन्नि अ़ङ्का खानानिन राक प़नानिन। 17 स्तिफनास, फोर्तुनातस खोन्कि अखाइकस म़बानाहिदा सेवाङ्नि लुवाङ, देकिनालो आम्नुओ मान्युङ्दामा खोचिआ युङिन्येन्वा ऩमेत्ताङ्पुवाङ। 18 मोचिआ अ़ङ्को खोन्कि आम्नुओ लावा राक अ़पुवा। ओवाको म़नाचि साऩङ्वा मेत्तानुम्च़म। देङ्दाओ सेवा 19 एसियादाओ साम्भुङ्चिआ खानानिन सेवा ऩछोक्तिन्युङ्सिन। अकिलास, प्रिस्का खोन्कि मोचिओ अ़चुखिम्दाओ साम्भुङ्आ खानानिन हाङ्पाएदा साकोङ्वाहुत्याङ्काङा सेवा ऩछोक्तिन्युङ्सिन। 20 झारा ब़ब़, नाना खोन्कि निछाचिआ खानानिन सेवा ऩछोक्तिन्युङ्सिन। अ़क्छाआ निएदा सेङ्याङ्ओ चुप्माआ सेवा मेत्मुवानिन। 21 अ़ङ्का पावल, अ़ङ्छुक्आङा सेवा छाप्तुङ्योङ। 22 साङ्आ हाङ्पा सोमाअ़तुक्तुन्नालो मो माङ्हिम्ने! आन्काओ हाङ्पो, तानिन! 23 हाङ्पा येसु ख्रिस्तओ अ़चुसोमातुक्मा खानानिन्एदा याक्ने। 24 ख्रिस्त येसुदा अ़ङ्सोम्तुक्मा खानानिन झाराएदा याक्ने। मोवात्निङा लिने। |
© Wycliffe Bible Translators, Inc. All rights reserved.
Wycliffe Bible Translators, Inc.