१ कोरिन्थि 11 - बान्तावा राई1 अ़ङ्का ख्रिस्त त़ङ्तुङ्वा खानानिन्छाङ अ़ङ्का कात़ङ लिसानिन। मेत्छामाचिआ अ़चुताङ दिप्मादोत्ओ 2 अ़ङ्का खानानिन चोन्नाङ्नानिन, देकिनालो झारा य़ङ्दा खानानिन्आ अ़ङ्का त़मित्ताङ्ऩङ खोन्कि अ़ङ्का खानानिन प़नानिन्ओ च़माथाङ्माचि त़मुम्युङ्सुम्च़म। 3 हान खानानिन ख्रिस्तङा झारा म़नाचिओ अ़चुहाङ्पा म़युङ्याङ निकिना त़तुप्तुम्नेनि अ़ङ्का मिन्ङा खोन्कि खिम्हाङ्माओ अ़मुलो अ़खिम्हाङ्पा ओ, खोन्कि ख्रिस्तओ अ़चुमुलो निनाम्हाङ म़युङ्याङ। 4 खाक्को म़ना यामात्याङ्हिदा माङ्लो निनाम्हाङ्य़ङ खालुयाङ्हिदा अ़ताङ कादिप म़नाआ अ़हाङ्पाओ अ़साया पेप्तु। 5 मेन अ़ताङ मान्दिप्माङ याकामात माङ्लो निनाम्हाङ्य़ङ खाकालु खिम्हाङ्माआ अ़खिम्हाङ्पाओ अ़साया पेप्तु। ओ ना मोसोओ अ़ताङ्मुवा खोसिन्खाइसिन्वात्निङा ओ। 6 देकिनालो अ़क्छा खिम्हाङ्माआ अ़ताङ अ़दिप्तुन्नालो मोसाआ अ़ताङ्मुवा क़प्तुखाइसुने! मेन मो खिम्हाङ्माओ निम्पाङ अ़ताङ्मुवा खोमा अ़साया पेप्नालो मोसाआ अ़ताङ मुन्जेत्आ दिप्मादोत। 7 अ़खिम्हाङ्पाआ अ़ताङ दिप्मा अ़दोत्निन, देकिनालो खो निनाम्हाङ्ओ अ़चुकात्मा खोन्कि साऩङ्वा ओ। अ़खिम्हाङ्मा अ़खिम्हाङ्पाओ अ़साऩङ्वा ओ। 8 देकिनालो मेत्छामाएदाङ्का दुवाछा मुवाओ माआङ, मेन दुवाछाएदाङ्का मेत्छामा मुवाओ। 9 मेत्छामाओ निम्पाङ दुवाछा मुन्माय़ङ्ओ माआङ, मेन दुवाछाओ निम्पाङ मेत्छामा मुन्माय़ङ ओ। 10 खोन्ओसा निनाम्हाङ काफाचिओ निम्पाङ्छाङ खिम्हाङ्मा मुन्जेत्आ अ़ताङ दिप्मादोत। 11 खोन्नुछाङ, हाङ्पाओ अ़चुम़नाचिओ अ़चुरादा खिम्हाङ्माओ निम्पाङ खिम्हाङ्पा दोत, खोन्कि खिम्हाङ्पाओ निम्पाङ खिम्हाङ्मा दोत। 12 देकिनालो देत्नि दुवाछाएदाङ्का मेत्छामा मुवा, मोवात्निङा दुवाछा मेत्छामाएदाङ्का लि। मेन झारा य़ङ्चि निनाम्हाङ्दाङ्का ओ। 13 आप्पि छ़ङ्छेन्तानुम, दि मेत्छामाआ अ़ताङ मान्दिप्माङ निनाम्हाङ्एदा यामात्मा खान्तु कि? 14 दुवाछाआ किलो अ़ताङ्मुवा केन्तुनालो मो मोसोओ निम्पाङ सायापेप्माय़ङ निकिना दि रियोङ्आछाङ खानानिन त़चिन्तिमिन कि? 15 मेन मेत्छामाओ अ़ताङ्मुवा कियाङ्नालोना मो मोसोओ निम्पाङ अ़साऩङ्वा ओ। देकिनालो मेत्छामाओ अ़ताङ्मुवा अ़ताङ दिप्माओ निम्पाङ पुवाओ। 16 मेन साङ ओसोओ अ़तुक्वादा दुम्छ़न्मानि मिन्याङ्नालो आन्कान्काएदा नि च़माथाङ्मा मात्द़ङ, ना निनाम्हाङ्ओ अ़चुसाम्भुङ्चिएदाङा युङ्याङ। हाङ्पाओ अ़चुखाबाचा मत्ति २६:२६-२९ ; मर्कुस १४:२२-२५ ; लुका २२:१४-२० 17 मेन ओवात्नि अ़ङ्का लोनाङ्नानिन्हिदा अ़ङ्का अ़चोन्नानिमिन, देकिनालो आम्नुओ कोप्मान्चिन्आ अ़नुवाक्दाङ्का च़लोक अ़त्लो लि। 18 देकिनालो बुया खानानिन साम्भुङ्दा अ़क्नि त़कोइन्चिन्हिदा आम्नुओ रादा त़हासिन्येन्चिन्नि अ़ङ्का एनुङ्योङ खोन्कि अ़क्चिचित ना अ़ङ्का अ़नुछ्यानि मिन्ङा। 19 आम्नुओ रादाओ साङ सोम्कुवा मुमा खान्तुओ सिन्मा निम्पाङ खानानिन्एदा हामान्चिन्ङादोत। 20 खानानिन अ़क्नि त़कोइन्चिन्कि त़चाम्ओ मो हाङ्पाओ अ़चुखाबाचा माआङ। 21 देकिनालो खानानिन त़चान्हिदा झारासाआ आप्पिओ आम्नुओ चामायु चामा त़पुक्तुम, खोन्कि अ़क्छा मान्चा लि, खोन्कि अ़क्छा सेत्मायुआ सेरु। 22 चामा खोन्कि दुङ्माओ निकिना दि आम्नुओ खिम्चि मात्द़ङ्चि कि? माङ्लो दि खानानिन निनाम्हाङ्ओ अ़चुसाम्भुङ्चि त़सुङुम्च़म खोन्कि मान्तोक्कादाचि अ़चुसाया त़पेप्तुम्च़म? अ़ङ्का खानानिन दे लोमा? दि अ़ङ्का खानानिन ओसोओ निम्पाङ चोन्मा? माआङ, अ़ङ्का अ़चोन्नानिमिन। 23 देकिनालो हाङ्पाएदाङ्का अ़ङ्का दि तोक्तुङ, मो खानानिन प़नायुङ्नानिन। लाप्खावा म़चाओ अ़खाखुत हाङ्पा येसुआ पेम्पाक अ़क़क्ता, 24 खोन्कि आलाङ अ़पुवाकि मो अ़धाङ्साकि अ़चुकाखेङ्पाचि प़याङ्सा म़लोचि, “ओ आम्नुओ निम्पाङ अ़ङ्पोक ओ, ओ अ़ङ्मित्मादा मुयाङ्सा मुवानुम।” 25 मोवात्निङा चा म़चाकि खोक्कोसाआ लाङ्चोक्खुङ अ़क़क्ताकि म़लोचि, “ओ लाङ्चोक्खुङ्दाओ अङ्गुरा माङ्वा अ़ङ्ह़दाओ अ़ऩङ्वा य़ङ्छ़ङ ओ। दे-देम्खा खानानिन ओ त़दुङुम, अ़ङ्मित्मादा ओ मुयाङ्सा मुवानुम।” 26 दे-देम्खा खानानिन ओ पेम्पाक त़चाम, खोन्कि ओ लाङ्चोक्खुङ्दाङ्का त़दुङिन, खोक्को मान्ताम़युक्तारि खानानिन हाङ्पाओ अ़चुस़मा खात़लुसुम। 27 खोन्ओसा, साङ्आ चामा अ़नुनिनिन्हिदा हाङ्पाओ अ़पेम्पाक चा, माङ्लो लाङ्चोक्खुङ्दाङ्का दुङु, मो हाङ्पाओ अ़चुपोक खोन्कि अ़चुह़ पोप्तुओदा काफि लि। 28 झारा म़ना आप्पि चिन्मान्खाङ्मान्चिन्दोत, खोन्किना खोसाआ पेम्पाक चाने, खोन्कि लाङ्चोक्खुङ्दाङ्का दुङुने। 29 देकिनालो साङ्आ हाङ्पाओ अ़चुपोक मान्सिन्माङ चा, खोन्कि दुङु, खोसाआ मो चोओ खोन्कि दुङुओदा खोएदा दन्दा ता। 30 खोन्ओसा खानानिन्एदाङ्काओ ब़द्धेकापाङ मान्ऱकादा खोन्कि कातुक त़याइन्येन, खोन्कि देम्कापाङ म़सुवादायुङ्सा। 31 मेन अ़नुछ्याङा आन्कान आप्पि चिन्तिन्खान्युङ्सिन्चिन्नालो आन्कान छ़ङ्छेन्मादा अ़छुक्तिमिन। 32 मेन आन्कान हेन्खामाएनान अ़क्नि लाहि म़पाक्निन्ने निकिना आन्कान हाङ्पाआ छ़ङ म़छेन, खोन्कि आन्कान दन्दा म़प़। 33 खोन्ओसा, ब़ब़, नाना खोन्कि निछाचि ओ, खानानिन अ़क्नि चासि त़कोइन्चिन्हिदा अ़क्छा नि हुङ्मुवानिन। 34 साङ सास़याङ्नालो मोसाआ अ़खिम्दाङा चाने, माङ्नालोना अ़क्नि त़कोइन्चिन्हिदा छ़ङ्छेन्मादा त़छुक्तिन। खोन्कि अ़ङ्का बान्ङाहिदा नि य़ङ्चिओ अ़चुतुक्वादा लोनानिन। |
© Wycliffe Bible Translators, Inc. All rights reserved.
Wycliffe Bible Translators, Inc.