१ कोरिन्थि 10 - बान्तावा राईइस्राएल्ओ बुयाओ य़ङ्दाङ्का चाप्चेत्माय़ङ 1 ब़ब़, नाना खोन्कि निछाचि ओ, खानानिन ओ य़ङ सिन्तानुम्नि अ़ङ्का मिन्ङाङा, आन्सुन्तुम्चि झारा य़वारि भेन्दा म़युङाङा, खोन्कि झारा धियाङ्वामा लाम लियाङ्सा म़खारा। 2 खोन्कि निनाम्हाङ्य़ङ खाकालु मोसाएदा मोचि झारासा य़वारि खोन्कि धियाङ्वामादा बप्तिस्मा अ़तोक्ता। 3 मोचि झारासा अ़क्खालाओङा लावामि चामायु अ़चा, 4 खोन्कि झारासा अ़कनिवाओङा लावामि चाक्वा अ़दुङा। देकिनालो मोचिआ अ़क्नि कोन्माओ लावामि लुङ्छ़ङ्दाओ चाक्वा अ़दुङा खोन्कि मोक्को लुङ्छ़ङ ख्रिस्त म़युङाङा। 5 खोन्नुछाङ मोचिएदाओ ब़द्धेकापाङ्एनान निनाम्हाङ्ओ अ़चुऩङा मान्नु, खोन्ओसा मोचि लेक्लेक्लेक्वाओदा म़सुवादा। 6 खोचिआवात्निङा आन्कान अ़त्लो काचि अ़मुन्मिन्ने निकिना आन्चाप्चेत्माओ निम्पाङ मोवात्नि अ़मात्ऩङ लिसाओ। 7 मोचिएदाओ देम्कापाङ्चिवात्नि खानानिन सेम्पोक काब़क्चि मान्लिदानिन। देकिनालो ओवात्नि छाप्याङ, “म़नाचि म़युङाकि म़चा म़दुङा, खोन्किना म़पुवालोन्ताकि म़थोमा।” 8 आन्कान ताङ्लान मुमा अ़नुनिन, देत्नि मोचिएदा देम्कापाङ ताङ्लान म़मुवा, खोन्कि अ़क लेन्दाङा मोचिएदाओ तेइस हजारा म़सुवादा। 9 आन्कान ख्रिस्त चिन्माखाङ्मा अ़नुनिन, मोचिएदाओ देम्पाङ मोवात्नि म़चुवाहिदा प़चिआ म़धोक्तुसेरुचि। 10 आन्कान छुऩङ्वा मुमा अ़नुनिन, देत्नि मोचिएदाओ देम्कापाङ छुऩङ्वा म़मुवा, खोन्कि कालुक्एदाङ्का म़लुक्ता। 11 ओ य़ङ्चि आन्को अ़मात्ऩङ्ओ निम्पाङ मोचिएदा म़लिसाओ। साङ जुगाओ अ़लुक्मातारि ह़ङ, मो य़ङ्चि आन्कान चाप्चेत्माओ निम्पाङ म़छाप्ताओ। 12 खोन्ओसा, साङ नुलोक एप्ङाङानि मित्नान्चिन, मो चाप्चेत्नान्चिन्ने माङ्नालोना मो धाम। 13 म़नाएदा ताओ चिन्माखाङ्मादाङ्का खानानिन नि चिन्माखाङ्मादा मान्छुक्त़युक्तिन। निनाम्हाङ सोम्कुवा मुमा खान्तुओ म़मुयाङ खोन्कि आङ्मा त़ऱम्ओदाङ्का च़लोक चिन्माखाङ्मादा छुक्मा ऩप़न्मिन, मेन चिन्माखाङ्माएनान फुङ्खा लाम्छाङ ऩमेत्तिन्प़न खोन्कि मोवात्नि खानानिन मो आङ्मा त़ऱम। सेम्पोक ब़क्माय़ङ्ओ खाबाचा खोन्कि हाङ्पाओ अ़चुखाबाचा 14 खोन्ओसा, सोमातुक्नाङ्नानिन्ओ ब़ब़, नाना खोन्कि निछाचि ओ, सेम्पोक ब़क्मादाङ्का अ़थाया युङानिन। 15 अ़ङ्का खारु कातोक म़नाचिएनान्वा चेप्ङाङा, खानानिन्ङा अ़ङ्का य़ङ्ङाओदा छ़ङ्छेन्तानुम। 16 आसिखाओ लाङ्चोक्खुङ्ओ निम्पाङ आन्कान आसिखा दोरिन। दि मो ख्रिस्तओ अ़चुह़दा होन्मान्चिन माआङ कि? खोन्कि आन्कान पेम्पाक ओरुम, दि मो ख्रिस्तओ अ़चुयाम्दा होन्मान्चिन माआङ कि? 17 मोदा पेम्पाक अ़क्तात्ङा युङ्याङ, आन्कान ब़द्धेकापाङ्नुछाङ अ़क्याम्ङा ओ, देकिनालो आन्कान झारासाआ अ़क्तात पेम्पाक्दाङ्का चान। 18 इस्राएलि म़नाचि मित्तानुम्च़म, प़माय़ङ हेन्खोक्वा काचाचि, दि ब़क्खादा मान्होन्म़दान्चिन कि? 19 अ़ङ्का दे य़ङ्ङाङा म़ल़क? सेम्पोक हेन्खोक्वा प़माओ अ़काचि याक्याङ? माङ्लो सेम्पोक अ़नुछ्याओ माङ्चि ओ? 20 खोवात्नि माआङ, मेन अ़ङ्का ओवात्नि य़ङ्ङाङा, सेम्पोक काब़क्चिआ चाकावालावाचि हेन्खोक्वा अ़प़, निनाम्हाङ माआङ। खोन्कि खानानिन चाकावालावाचिएनान त़होलिन्चिन्नेनि अ़ङ्का अ़मिन्ऩङ। 21 खानानिन हाङ्पाओ अ़चुलाङ्चोक्खुङ्दाङ्का दुङ्मा खोन्कि चाकावालावाचिओ अ़चुलाङ्चोक्खुङ्दाङ्काछाङ दुङ्मा त़ऱन्मिन। खानानिन हाङ्पाओ अ़चुतेबलादाङ्का चामा खोन्कि चाकावालावाचिओ अ़चुतेबलादाङ्का अ़क्धुवा चामा त़ऱन्मिन। 22 दि आन्कान हाङ्पाओ अ़चुऩङ्च़ काइसुम्योम? दि आन्कान खोक्कोएदाङ्का सावापोरि मुन्येन? साकोङ्छ़ङ कामुचिओ अ़चुलेत्माय़ङ 23 खाना त़य़ङ, “देनुछाङ च़मा नु।” मेन झारा य़ङ्आ नुलोक म़मुनिन। खाना त़य़ङ, “देनुछाङ च़मा नु।” मेन झारा य़ङ्आ म़फानिन। 24 साङ्आछाङ खोसोओ नुलोक अ़लामुन्ने, मेन निचिओ नुलोक लामुने। 25 बजारादा त़खिरुम्ओ सा छेन्खातायाओ निम्पाङ दित्छाङ मान्सेन्माङ चानुम। 26 देकिनालो “हेन्खामा खोन्कि मोदा म़याक्याङ्ओ झारा सामा हाङ्पा निनाम्हाङ्ओङा ओ।” 27 साकोङ्छ़ङ मान्मुकादाचिएदाङ्का अ़क्छाआ खानानिन चा-चासि ऩबुत्तिन्हिदा खानानिन खात्मा त़स़न्नालो खारानिन, मेन आम्नुओ बुदा दि ऩयुक्तिन, छेन्खातायाओ निम्पाङ दित्छाङ मान्सेन्माङ चानुम। 28 मेन खाक्को म़नाआ खानानिन “ओ ना हेन्खोक्वा धान्ताओ”नि त़लोन्नालो खाकाएत्ओ निम्पाङ खोन्कि खोसोओ अ़छेन्खातायाओ निम्पाङ मो मान्चादानुम। 29 आम्नुओ माआङ, मोसोओ अ़छेन्खातायाओ निम्पाङ ओ। खानानिन त़य़ङिन ओन्दे, “देकि नि म़नाओ छ़ङ्छेन्खा तायाओ निम्पाङ अ़ङ्को अ़ङ्ताकावा च़मा अ़तोक्ऩङ कि?” 30 अ़ङ्का आलाङ प़ङ्कि चासि युङ्ङानालो निनाम्हाङ आलाङ प़ङ्ओ चामायुदा देकि अ़ङ्का निआ सुङ्मा? 31 मोवात्नि माआङ, खानानिन चानिन माङ्लो दुङानिन माङ्लो आम्नुओ ताकावा चुवानिन, ओ झारा निनाम्हाङ्ओ अ़चुऩङ लोङ्माओ निम्पाङ मुवानुम। 32 साङ्छाङ धुङ्खा मान्लिदानिन, यहुदिने, ग्रिक्ने माङ्लो निनाम्हाङ्ओ अ़चुसाम्भुङ्ङाने। 33 अ़ङ्काछाङ झाराकापाराआ झारासोओ अ़चुऩङानुमा काचि मुङाङा। अ़ङ्नुलोक अ़ङ्का अ़लाम्ऩङ, मेन ब़द्धेसोओ नुलोक लामुङ, खोन्ओसा मोचि म़लेन्ने। |
© Wycliffe Bible Translators, Inc. All rights reserved.
Wycliffe Bible Translators, Inc.