Timoteo 1 1 - Mbengu Etemu Mabandela Nzembo Bantete 1916

¹ Paulo, ntom’embe Masiya Yesu ete nde mosikiso mombe Nyamb’e Mokosoli o biso na Masiya Yesu ’eliki’e biso,

² ombe Timoteo e mwan’o ngai o longobanu sub’o boyambi: Ngolu, molika, nyil’e bokumak’ombe Nyamb’e Sango na Masiya Yesu e Mokonzi o biso.

³ E keki ngai o Makedonia nakopekeli ete obika bw’o Epeso, na ntin’ete osikisa baoko ete bazala nde o teya liteyo lisiso ka,

⁴ mpe bazala nde o kengele bice mpe na bisekisela bi mabota bikosenga bosuku ka, mango manya matikokatisa miloboto yenyelu na bokengeli kum’ombe Nyambe bonga sub’o boyambi.

⁵ Nde bosuku bo mosikiso bonga bolingo kum’o moloko mo mpwe na lososoloko lolamu na boyambi bokosenga londelengi.

⁶ Nde baoko baoleka su o mango mpe baopengwa yek’o bilobaloba bozalaka na mpos’e zala bateyi ba mobeko,

⁷ nde banga nde o yeba ntin’e ma koloba bango ka, mpe na ntin’e ma wani ma kokendisa bango no‐no ka.

⁸ Nde lokoyeb’ete mobeko monga zeni ndiki moto abaka mongo na bolongobani,

⁹ boyebaka liy’ete mobeko monga nde o ketibwa n’ewel’e moyengebeni ka, nde n’ewel’e bamingi na batei, bakinoli ba Nyambe na basoki, ba bompunda na babebi, biboma‐basango na biboma‐banyango,

¹⁰ biboma‐bato, bapeki, ba bosodomo, biyiba‐bato, bakutinyi, basimbi ba ndai li nkuta, mpe ndiki enga zambi lisiso likotem’esongo na liteyo li nki‐nki,

¹¹ ete nde ncango ndamu li mankembo mambe Nyamb’e Momen’esengo lisembwibwi ombe ngai.

¹² Nakotondo Moyisisi o ngai, Masiya Yesu e Mokonzi o biso, nowel’ancekisi mobaki mpe antukisi yek’o bolengeleli,

¹³ ncoki ngai nazalaki yambo moyemboli, mpe monyokoli, mpe mosumbisi. Nde nayambi molika nowela nakeli na bosenga bo bososoli sub’o bosenga bo boyambi,

¹⁴ mpe ngolu embe o Mokonzi o biso etikobula mputa na boyambi na bolingo bonga sub’ombe Masiya Yesu.

¹⁵ Liloba liye linga li bobakaka mpe bokomoko na bonyangeli na bato banco ete, “Masiya Yesu ayi yek’o molongo nokosola basoki,” ba nga ngai mpomba.

¹⁶ Nde n’ewel’eye nayambi molika na ntin’ete sub’ombe ngai o mpomba Yesu Masiya alakinya mpiko encoki e Yey’e mambi boyiki ete ndakis’ombe bango banga lende nomoyambela yek’o bomoi bo lobiko.

¹⁷ Ombe o Mokonzi o lobiko, o losumbanako bosengaka, o lobononoko bosengaka, Nyamb’e mpenza, ezala bosoni na mankembo yek’o lobiko‐a‐lobiko; se bongo.

¹⁸ Nakosembola mosikiso moye ombe yo, mwana Timoteo, s’et’ebëkibwi mambi yambo na ntin’e yo, na ntin’ete na mang’oman’etumb’e

¹⁹ zeni bozalaka na boyambi mpe na lososoloko lolamu; mango baoko baomasabola mpe baobunyibwa bwengo na ntin’e boyambi.

²⁰ Ombe bango enga Umenayo, n’Alesandulo, ba semboli ngai ombe Satana na ntin’ete bateyibwa nozala nde o yembola ka.