Abakuka 1 - Mbengu Etemu Mabandela Nzembo Bantete 1916

¹ Nzoto li zambi li boni Abakuka e ntete.

² E Yawe, nabela yek’o elemb’e wani mpe okoboya boyoki? Nakolel’ombe Yo n’etondo e mambi makoti, mpe okoboya nokosola.

³ Boni okombonis’ekuna, mpe okonkekisa bobe? nowela bokwakoli na mambi makoti mang’o miso ma ngai: nowel’enga bokulani, mpe zomano likosukwa.

⁴ N’etondo eye mobeko mokokatatala, mpe botendi nopima nyo: nowela o mobe akozong’o moyengebeni zo‐zo; n’etondo eye botendi bokopima penge.

⁵ Bobatambwisa miso zong’o ntantei e maboko, mpe bososolo co, mpe bosemwaka semo na bosemwi: nowela nanga lende nokata lotom’o misa ma bino, lo kozala nde bin’o yamba ncoki lobotendwibwela ka.

⁶ Nowela, bakeka, nakosekola Ba‐Kasada, liboko linya li ngali‐ngali, mpe likoswenge swe; bakoleka ku o litaki li nce, nokula bizalela binga nde bi bangome ka.

⁷ Banga b’emwanga mpe ba lipaki: monkandi mo bango mpe bopitani bo bango manga bokumak’ombe bangome.

⁸ Mbalu li bango likopita ngoi mbangu, mpe linga sali‐sali nopita bibobolo bi mokolo, bayakemi ba mbalu ba bango bakongunzwa bokumaka mosika; bakobusa kwaki ete nde mpongonyoli ekoke lobangu nole.

⁹ Bakoya bango banco na ntin’e mambi makoti; bakoyikisa miso mpik’o lokenge lo esete; mpe bakoyonginya ntong’ete nde nzelo.

¹⁰ E, bakobingola bakonzi, mpe bankonwa banga se bosiswibwaka na bango: bakokengolo ndako na ndako ekoti; bakosôkia mibulu mpe bakoikwa.

¹¹ Angani bakolek’ete mompe mo botenyaka! bokitibwak’enga bango ba nga nguy’e bango nyamb’e bango.

¹² Te Y’onga kum’o misa ma kala‐kala, E Yawe, Nyamb’e ngai, o Mobulami o ngai? lokozala nde o wa ka. E Yawe, osomolabola na ntin’e botendi; mpe Yo, e Libwa, osomokotisa na ntin’e likamba.

¹³ Y’onga na miso peto nopita bobe bokeki, mpe onga nde o yis’ekuna botali ka, boni okotala ba bolenge, mpe okozala biu e komina o mobe ony’okomopita boyengebeni kio?

¹⁴ Oozalisa bato ete ncu li libeke, ete binangananga binga nde na mokongi te.

¹⁵ Akobabasa bango banco na libasa li yeye, akobatokis’o nceli e yeye, mpe akobayonginy’o boluba bo yeye: bongo akobioko mpe akolangubana.

¹⁶ N’etondo eye akokimisela nceli e yey’ekima, mpe akotumbela boluba bo yeye boyimbo; nowela na ntin’e bingo libondo li yeye linga na mali, mpe boli bo yeye bokongandandala.

¹⁷ Akotokisa boluba bo yeye yek’o lobiko, mpe aboma maboko bomu n’o bende ke?