رُومَا 15 - العهد الجديد بالدارجة التونسية 2022

وَسْعُوا بَالْكُمْ مْعَ الضْعَافْ

¹ أَحْنَا القْوِيِّينْ يِلْزِمْنَا نْوَسْعُوا بَالْنَا مْعَ الضْعَافْ، ومَا يِلْزِمْنَاشْ نْلَوْجُوا عَلِّي يْرَضِّينَا.

² وخَلِّي كُلْ وَاحِدْ فِينَا يْرَضِّي خُوهْ ويْوَجْهُو لِلخِيرْ، بَاشْ يِبْنِيهْ ويْقَوِّي إِيمَانُو.

³ عْلَى خَاطِرْ المَسِيحْ مَا لَوِّجِشْ عَلِّي يْرَضِّيهْ هُوَّ، آمَا كِيمَا مَكْتُوبْ: «سَبَّانْ الِّي يْسِبُّوا فِيكْ جَاء عْلِيَّا».

⁴ ولِّي تِكْتِبّْ قْبَلْ الكُلْ، تِكْتِبّْ بَاشْ نِتْعَلْمُوا مِنُّو، بَاشْ يْوَلِّي عَنْدْنَا رْجَى بِالصَّبْرْ والتَّشْجِيعْ الِّي فِي الكْتُبْ المُقَدْسَة.

⁵ وإِلَاهْ الصَّبْرْ والتَّشْجِيعْ يْعَاوِنْكُمْ بَاشْ تْكُونُوا بْرَأْيْ وَاحِدْ كِيمَا عَلِّمْنَا المَسِيحْ يَسُوعْ،

⁶ بَاشْ تْمَجْدُوا اللَّهْ بُو رَبْنَا يَسُوعْ المَسِيحْ، بْقَلْبْ وَاحِدْ وبْصُوتْ وَاحِدْ.

إِقْبْلُوا بْعَضْكُمْ

⁷ مَالَا إِقْبْلُوا بْعَضْكُمْ كِيمَا قْبِلْكُمْ المَسِيحْ، بَاشْ اللَّهْ يِتْمَجِّدْ.

⁸ وآنَا نْقُلْكُمْ الِّي المَسِيحْ وَلَّى خَادِمْ لِلْيْهُودْ بَاشْ يُثْبِتْ الِّي اللَّهْ صَادِقْ، وبِشْ يْحَقِّقْ الوُعُودْ الِّي عْطَاهُمْ اللَّهْ لِلجْدُودْ،

⁹ وبَاشْ الشُّعُوبْ الأُخْرِينْ يْمَجْدُوا اللَّهْ عْلَى رَحْمْتُو، كِيمَا مَكْتُوبْ: «هَاذَاكَا عْلَاشْ بِشْ نِحْمْدِكْ وُسْطْ الشُّعُوبْ الأُخْرِينْ، وبِشْ نْسَبِّحْ لْإِسْمِكْ».

¹⁰ ويْقُولْ زَادَا: «إِفْرْحُوا يَا شْعُوبْ مْعَ شَعْبْ اللَّهْ!».

¹¹ ويْقُولْ مَرَّة أُخْرَى: «سَبْحُوا الرَّبْ يَلِّي مَاكُمْشْ يْهُودْ. إِحْمْدُوهْ يَا كُلْ الشُّعُوبْ».

¹² وقَالْ إِشَعْيَاءْ زَادَا: «بِشْ يْجِي مِنْ ذُرِّيِّةْ يَسَّى الِّي يْقُومْ ويُحْكُمْ فِلِّي مَاهُمْشْ يْهُودْ، والشُّعُوبْ يْحُطُّوا رْجَاهُمْ فِيهْ».

¹³ وإِلَاهْ الرْجَى يِمْلَاكُمْ بِالفَرْحَة والسَّلَامْ بْإِيمَانْكُمْ بِيهْ، بَاشْ رْجَاكُمْ يْفِيضْ بْقُوِّةْ الرُّوحْ القُدُسْ!

بُولِسْ يَحْكِي عْلَى خِدِمْتُو

¹⁴ آنَا بِيدِي يَا خْوَاتِي مِتْأَكِّدْ الِّي إِنْتُومَا مِلْيَانِينْ بِالصَّلَاحْ وبِالمَعْرْفَة، وقَادْرِينْ بَاشْ تْعَلْمُوا بْعَضْكُمْ.

¹⁵ آمَا فَمَّة حَاجَاتْ حَبِّيتْ نْذَكِّرْكُمْ بِيهَا وكْتِبْتِلْكُمْ عْلِيهَا بْكُلْ جُرْأَة، بِالنِّعْمَة الِّي عْطَاهَالِي اللَّهْ،

¹⁶ بَاشْ نْكُونْ خَادِمْ المَسِيحْ يَسُوعْ لِلِّي مَاهُمْشْ يْهُودْ. وكِيمَا الكَاهِنْ، نْوَصْلِلْهُمْ البْشَارَة، بَاشْ يْكُونُوا قُرْبَانْ مَقْبُولْ عَنْدْ اللَّهْ مُقَدْسِينْ بِالرُّوحْ القُدُسْ.

¹⁷ مَالَا عَنْدِي الحَقْ فِي المَسِيحْ يَسُوعْ بَاشْ نِتْفُوخِرْ بْخِدْمْتِي لِلَّهْ،

¹⁸ ومَا نِتْجَرَّأْ نِتْكَلِّمْ كَانْ عَلِّي عَمْلُو المَسِيحْ عْلَى يْدَيَّا بَاشْ يْخَلِّي غِيرْ اليْهُودْ يْطِيعُوا اللَّهْ. عْمَلْ هَاذَا عْلَى طْرِيقْ كْلَامِي وأَفْعَالِي،

¹⁹ بْقُوِّةْ المُعْجْزَاتْ والعْجَايِبْ، وبْقُوِّةْ رُوحْ اللَّهْ. ورَانِي كَمِّلْتْ التَّبْشِيرْ بِالمَسِيحْ مِنْ أُورْشَلِيمْ والبْلَايِصْ الِّي دَايْرِينْ بِيهَا حَتَّى لِلِّيرِيكُونْ.

²⁰ وحْرَصْتْ بَاشْ نْبَشِّرْ فِي البْلَايِصْ الِّي مَا تْبَشَّرْشْ فِيهَا بْإِسْمْ المَسِيحْ، بَاشْ مَا نِبْنِيشْ عْلَى سَاسْ حَطُّو غِيرِي،

²¹ كِيمَا مَكْتُوبْ: «الِّي مَا تْبَشْرُوشْ بِيهْ بِشْ يْشُوفُوا، ولِّي مَا سَمْعُوشْ بِيهْ بِشْ يِفْهْمُوا».

²² وهَاذَا الِّي خَلَّانِي بَرْشَة مَرَّاتْ مَا نَجَّمْتِشْ نْجِيكُمْ.

بُولِسْ يْحِبْ يْزُورْ المُؤْمْنِينْ الِّي فِي رُومَا

²³ آمَا تَوَّا مَادَامْنِي كَمَّلْتْ خِدْمْتِي فِي البْلَايِصْ هَاذُومَا، وآنَا لِيَّا بَرْشَة سْنِينْ مِتْشَوِّقْ نْحِبْ نْجِيكُمْ،

²⁴ مَذَابِيَّا نِتْعَدَّالْكُمْ وآنَا فِي طْرِيقِي لْإِسْبَانْيَا. وبَعْدْمَا نِتْمَتَّعْ بِشْوَيَّة وَقْتْ مْعَاكُمْ، نِتْمَنَّى تْعَاوْنُونِي بَاشْ نْكَمِّلْ سَفَرْتِي لْغَادِي.

²⁵ آمَا تَوَّا رَانِي مَاشِي لْأُورْشَلِيمْ بَاشْ نْعَاوِنْ القِدِّيسِينْ،

²⁶ عْلَى خَاطِرْ الكَنَايِسْ فِي مَقْدُونِيَّة وأَخَائِيَة حَبُّوا يْعَاوْنُوا القِدِّيسِينْ المُحْتَاجِينْ الِّي فِي أُورْشَلِيمْ.

²⁷ وعَمْلُوا هَاذَا وهُومَا فَرْحَانِينْ، وفِي الحْقِيقَة هَاذَا وَاجِبْ عْلِيهُمْ. عْلَى خَاطِرْ، إِذَا كَانْ اليْهُودْ شَارْكُوا بَرَكَاتْهُمْ الرُّوحِيَّة مْعَ الشُّعُوبْ الأُخْرِينْ، مَالَا الشُّعُوبْ الأُخْرِينْ يِلْزِمْهُمْ يِخْدْمُوا اليْهُودْ بِالبَرَكَاتْ المَادِّيَة.

²⁸ وبَعْدْمَا نْكَمِّلْ المُهِمَّة هَاذِي ونَعْطِيهُمْ الفْلُوسْ، نِتْعَدَّالْكُمْ وآنَا فِي طْرِيقِي لْإِسْبَانْيَا.

²⁹ وآنَا نَعْرِفْ الِّي وَقْتِلِّي نْجِي، بِشْ نْجِيكُمْ بْبَرْكَة المَسِيحْ كَامْلَة.

³⁰ يَا خْوَاتِي، نُطْلُبْ مِنْكُمْ بْإِسْمْ رَبْنَا يَسُوعْ المَسِيحْ وبِمْحَبِّةْ الرُّوحْ القُدُسْ، تْجَاهْدُوا مْعَايَا بِصْلَاتْكُمْ لِلَّهْ عْلَى خَاطْرِي،

³¹ بَاشْ يْنَجِّينِي مِلِّي مَاهُمْشْ مُؤْمْنِينْ فِي مَنْطَقْةْ اليَهُودِيَّة، ويْخَلِّي خِدْمْتِي فِي أُورْشَلِيمْ مَقْبُولَة عَنْدْ القِدِّيسِينْ،

³² وهَكَّا، كَانْ حَبْ رَبِّي، نْجِيكُمْ وآنَا مَلْيَانْ بِالفَرْحَة، ونَرْتَاحْ عَنْدْكُمْ.

³³ وإِلَاهْ السَّلَامْ يْكُونْ مْعَاكُمْ الكُلْ. آمِينْ.