الرُّؤْيَا 12 - العهد الجديد بالدارجة التونسية 2022

المْرَا والتِّنِّينْ

¹ وظُهْرِتْ أَمَارَة عْجِيبَة فِي السْمَاء: مْرَا لَابْسَة الشَّمْسْ، والڨَمْرَة تَحْتْ سَاقِيهَا، وفُوقْ رَاسْهَا تَاجْ فِيهْ أَثْنَاشِنْ نِجْمَة.

² والمْرَا كَانِتْ حِبْلَى، وتْصِيحْ مِالوْجَايَعْ عْلَى خَاطِرْ شَدْهَا الحِسْ.

³ وظُهْرِتْ أَمَارَة أُخْرَى فِي السْمَاء: تِنِّينْ أَحْمِرْ عْظِيمْ عَنْدُو سَبْعَة رْيُوسْ وعَشْرَة ڨْرُونْ، وعْلَى كُلْ رَاسْ تَاجْ،

⁴ جْبِدْ بْذِيلُو ثْلُثْ نْجُومْ السْمَاء، ورْمَاهُمْ عَالأَرْضْ. ووْقِفْ التِّنِّينْ قُدَّامْ المْرَا الِّي شَادْهَا الحِسْ بَاشْ يِبْلَعْ صْغِيرْهَا دُوبْ مَا يِتْوْلِدْ.

⁵ وجَابِتْ وْلَيِّدْ، وهُوَّ الِّي بِشْ يُحْكُمْ فِي الشُّعُوبْ الكُلْ بِعْصَا حْدِيدْ، آمَا تِخْطَفْ الوْلَيِّدْ وتْهَزْ بَحْذَا اللَّهْ وعَرْشُو.

⁶ وهَرْبِتْ المْرَا لِلصَّحْرَاء وِينْ اللَّهْ حَضْرِلْهَا بْلَاصَة وِينْ بِشْ يِتْلْهَى بِيهَا لْمُدِّةْ 1 260 يُومْ.

⁷ وصَارِتْ حَرْبْ فِي السْمَاء: مِيخَائِيلْ ومْلَايِكْتُو حَارْبُوا التِّنِّينْ، والتِّنِّينْ حَارِبْهُمْ مْعَ مْلَايِكْتُو،

⁸ آمَا التِّنِّينْ ومْلَايِكْتُو خَسْرُوا، وخَسْرُوا بْلَاصِتْهُمْ فِي السْمَاء.

⁹ واطَّيِّشْ التِّنِّينْ العْظِيمْ لِلْأَرْضْ. هَاذَا هُوَّ اللَّفْعَى القْدِيمَة، ويِتْسَمَّى إِبْلِيسْ وَلَّا الشِّيطَانْ، الِّي يْغُرْ بِالعَالِمْ الكُلْ. واطَّيْشِتْ مْعَاهْ مْلَايِكْتُو.

¹⁰ وبَعْدْ سْمَعْتْ صُوتْ عَالِي فِي السْمَاء يْقُولْ: «اليُومْ تَمِّتْ النْجَاةْ، القُوَّة والمُلْكْ لْإِلَاهْنَا، والسُّلْطَة لْمَسِيحُو، عْلَى خَاطِرْ الِّي كَانْ يِتْهِمْ فِي خْوَاتْنَا قُدَّامْ إِلَاهْنَا لِيلْ ونْهَارْ إِطَّيِّشْ.

¹¹ وهُومَا غِلْبُوهْ بْدَمْ الخَرُوفْ، وبِشْهَادِتْهُمْ لِيهْ، ومَا كَانِتْشْ حْيَاتْهُمْ عْزِيزَة عْلِيهُمْ، حَتَّى قُدَّامْ المُوتْ.

¹² مَالَا إِفْرَحْ يَا سْمَاء وإِفْرْحُوا يَلِّي سَاكْنِينْ فِيهَا! ويَا وِيلُكُمْ يَا أَهْلْ البَرْ والبْحَرْ. رَاهُو إِبْلِيسْ هْبَطِّلْكُمْ وهُوَّ مِتْغَشِّشْ بَرْشَة عْلَى خَاطْرُو يَعْرِفْ الِّي أَيَّامَاتُو مَحْسُوبَة».

¹³ وكِي شَافْ التِّنِّينْ الِّي هُوَّ إِطَّيِشْ لِلْأَرْضْ، وَلَّى يْحَاوِزْ فِي المْرَا الِّي جَابِتْ الوْلَيِّدْ،

¹⁴ آمَا المْرَا تِعْطَاوْلْهَا جْوَانَحْ نِسْرْ كْبِيرْ بَاشْ اطِّيرْ بِيهُمْ لِلصَّحْرَاء، وِينْ بِشْ يِتْلْهَاوْ بِيهَا لْمُدِّةْ ثْلَاثَة سْنِينْ ونُصْ بْعِيدْ عَاللَّفْعَى.

¹⁵ وخَرّْجِتْ اللَّفْعَى مِنْ فُمْهَا مَاء كِيفْ الوَادْ جْرَى وْرَاء المْرَا بَاشْ يْغَرَّقْهَا.

¹⁶ آمَا الأَرْضْ عَاوْنِتْ المْرَا، وحَلِّتْ فُمْهَا وبَلْعِتْ الوَادْ الِّي خَرْجُو التِّنِّينْ مِنْ فُمُّو.

¹⁷ يَاخِي تْغَشِّشْ التِّنِّينْ عَالمْرَا، ومْشَى يْحَارِبْ فِي بَاقِي ذُرِّيِّتْهَا الِّي يْطِيعُوا فِي وْصَايَا اللَّهْ ويِشْهْدُوا لْيَسُوعْ.