فِلِيمُونْ 1 - العهد الجديد بالدارجة التونسية 2022

¹ مِنْ بُولِسْ المَرْبُوطْ فِي الحَبْسْ عْلَى خَاطِرْ يَسُوعْ المَسِيحْ، ومِنْ خُونَا تِيمُوثَاوُسْ، لْفِلِيمُونْ حْبِيبْنَا وشْرِيكْنَا فِي الخِدْمَة،

² ولِلْكْنِيسَة الِّي فِي دَارِكْ، ولْأُخْتْنَا أَبْفِيَّة ولْأَرْخِبُّوسْ الِّي يْجَاهِدْ مْعَانَا فِي الخِدْمَة.

³ النِّعْمَة والسَّلَامْ لِيكُمْ مِنْ عَنْدْ اللَّهْ بُونَا والرَّبْ يَسُوعْ المَسِيحْ.

بُولِسْ يُشْكُرْ اللَّهْ عْلَى إِيمَانْ ومْحَبِّةْ فِلِيمُونْ

⁴ كُلْ مَا نِتْذَكْرِكْ فِي صْلَاتِي نُشْكُرْ اللَّهْ

⁵ عَلِّي سْمَعْتُو عْلَى مْحَبْتِكْ وإِخْلَاصِكْ لِلرَّبْ يَسُوعْ ولِلْقِدِّيسِينْ الكُلْ.

⁶ ونُطْلُبْ مِنْ اللَّهْ بَاشْ الإِيمَانْ الِّي تْشَارِكْنَا فِيهْ يْكُونْ مُثْمِرْ ويْخَلِّيكْ تَعْرِفْ كُلْ حَاجَة صَالْحَة وَلَّاتْ فِينَا عْلَى خَاطِرْ المَسِيحْ.

⁷ يَا خُويَا رَانِي فْرَحْتْ وتْشَجَّعْتْ بَرْشَة بِمْحَبْتِكْ عْلَى خَاطْرِكْ رَتَّحْتْ قْلُوبْ القِدِّيسِينْ.

بُولِسْ يُطْلُبْ مِنْ فِلِيمُونْ يِقْبِلْ أُونِسِيمُوسْ

⁸ هَاذَاكَا عْلَاشْ نْحِبْ نُطْلُبْ مِنِّكْ حَاجَة، رَغْمِلِّي عَنْدِي الحَقْ فِي المَسِيحْ بَاشْ نُأْمْرِكْ تَعْمِلْ اللَّازِمْ،

⁹ آمَا إِخْتَرْتْ نُطْلُبْهَا مِنِّكْ بْإِسْمْ المْحَبَّة، بْصِيفْتِي آنَا بُولِسْ الرَّاجِلْ الكْبِيرْ، المَرْبُوطْ فِي الحَبْسْ عْلَى خَاطِرْ يَسُوعْ المَسِيحْ،

¹⁰ وهِيَّ فِي مَا يْخُصْ وِلْدِي أُونِسِيمُوسْ، الِّي وَلَّى وِلْدِي وآنَا فِي الحَبْسْ.

¹¹ هُوَّ قْبَلْ مَا كَانِشْ نَافَعْ لِيكْ، آمَا تَوَّا وَلَّى نَافَعْ لِيكْ ولِيَّا.

¹² هَانِي مْرَجَّعْهُولِكْ وهُوَّ رَاهُو قَطْعَة مِنِّي.

¹³ وحَبِّيتْ نْخَلِّيهْ بَحْذَايَا بَاشْ يِخْدِمْنِي فِي عُوضِكْ وآنَا مَرْبُوطْ عْلَى خَاطِرْ البْشَارَة

¹⁴ آمَا مَا حَبِّيتْ نَعْمِلْ حَتَّى شَيْ مِنْ غِيرْ مَا نْشَاوْرِكْ، بَاشْ تَعْمِلْ المْزِيَّة هَاذِي بِرْضَاكْ مُشْ عْلَى خَاطِرْهَا مَفْرُوضَة عْلِيكْ.

¹⁵ مُمْكِنْ هَاذَاكَا عْلَاشْ بْعِدْ عْلِيكْ مُدَّة قْصِيرَة بَاشْ مْبَعِّدْ يِرْجَعْلِكْ عْلَى طُولْ،

¹⁶ مَا عَادِشْ بْصِيفْتُو عَبْدْ، آمَا خِيرْ مِالعَبْدْ، بْصِيفْتُو خُو مَحْبُوبْ، خَاصَّةً عَنْدِي آنَا، فَمَا بَالِكْ عَنْدِكْ إِنْتِ، ومُشْ فِي العَلَاقَة البَشَرِيَّة بَرْكْ، آمَا فِي الرَّبْ زَادَا.

¹⁷ وكَانْ إِنْتِ حَاسِبْنِي شْرِيكِكْ، إِقْبْلُو كِيمَا تِقْبِلْنِي آنَا.

¹⁸ وإِذَا كَانْ ضَرِّكْ، وَلَّا تْسَالُو حَاجَة، إِحْسِبْهَا دِينْ عْلِيَّا آنَا.

¹⁹ وآنَا بُولِسْ نِكْتِبْلِكْ بْخَطْ يِدِّي ونُضْمُنْلِكْ إِنِّي نْخَلْصِكْ. ومِنْ غِيرْ مَا نْقُلِّكْ هُونِي الِّي إِنْتِ بْكُلِّكْ مَدْيُونْ لِيَّا.

²⁰ مَالَا يَا خُويَا، أَعْمِلْ عْلِيَّا هَا المْزِيَّة عْلَى خَاطِرْ الرَّبْ، ورَتَّحْ قَلْبِي فِي المَسِيحْ.

²¹ كْتِبْتْلِكْ الرِّسَالَة هَاذِي وآنَا مِتْأَكِّدْ الِّي إِنْتِ بِشْ تِسْمَعْ كْلَامِي وعَارِفْ الِّي بِشْ تَعْمِلْ أَكْثِرْ مِلِّي نُطْلْبُو مِنِّكْ.

²² ومَاذَبِيَّا تْحَضَّرْلِي وِينْ نُسْكُنْ عْلَى خَاطِرْ نِتْمَنَّى إِنُّو اللَّهْ يَسْتَجِيبْ لِصْلَاتْكُمْ ويْرَجَّعْنِي لِيكُمْ.

سْلَامْ

²³ يْسَلَّمْ عْلِيكُمْ أَبَفْرَاسْ المَرْبُوطْ مْعَايَا فِي الحَبْسْ عْلَى خَاطِرْ يَسُوعْ المَسِيحْ،

²⁴ وزَادَا مُرْقُسْ وأَرِسْتَرْخُسْ ودِيمَاسْ ولُوقَا الِّي هُومَا مْعَايَا فِي الخِدْمَة.

²⁵ ونِعْمِةْ رَبْنَا يَسُوعْ المَسِيحْ تْكُونْ مْعَاكُمْ.