مَتَّى 1 - العهد الجديد بالدارجة التونسية 2022

نْسَبْ يَسُوعْ المَسِيحْ

¹ هَاذَا نْسَبْ يَسُوعْ المَسِيحْ وِلْدْ دَاوِدْ وِلْدْ إِبْرَاهِيمْ:

² إِبْرَاهِيمْ جَابْ إِسْحَاقْ. وإِسْحَاقْ جَابْ يَعْقُوبْ. ويَعْقُوبْ جَابْ يَهُوذَا وخْوَاتُو.

³ ويَهُوذَا جَابْ فَارِصْ وزَارَحْ مِنْ ثَامَارْ. وفَارِصْ جَابْ حَصْرُونْ. وحَصْرُونْ جَابْ أَرَامْ.

⁴ وأَرَامْ جَابْ عَمِّينَادَابْ. وعَمِّينَادَابْ جَابْ نَحْشُونْ. ونَحْشُونْ جَابْ سَلْمُونْ.

⁵ وسَلْمُونْ جَابْ بُوعَزْ مِنْ رَاحَابْ. وبُوعَزْ جَابْ عُوبِيدْ مِنْ رَاعُوثْ. وعُوبِيدْ جَابْ يَسَّى.

⁶ ويَسَّى جَابْ المَلِكْ دَاوِدْ. ودَاوِدْ جَابْ سُلَيْمَانْ مِالمْرَا الِّي كَانْ مَاخِذْهَا أُورِيَّا.

⁷ وسُلَيْمَانْ جَابْ رَحَبْعَامْ. ورَحَبْعَامْ جَابْ أَبِيَّا. وأَبِيَّا جَابْ آسَا.

⁸ وآسَا جَابْ يَهُوشَافَاطْ. ويَهُوشَافَاطْ جَابْ يُورَامْ. ويُورَامْ جَابْ عُزِّيَّا.

⁹ وعُزِّيَّا جَابْ يُوثَامْ. ويُوثَامْ جَابْ أَحَازْ. وأَحَازْ جَابْ حِزْقِيَّا.

¹⁰ وحِزْقِيَّا جَابْ مَنَسَّى. ومَنَسَّى جَابْ آمُونْ. وآمُونْ جَابْ يُوشِيَّا.

¹¹ ويُوشِيَّا جَابْ يَكُنْيَا وخْوَاتُو، وَقْتِلِّي كَانُوا يِسْبِيوْ فِي اليْهُودْ لْبَابِلْ.

¹² وبَعْدْمَا سْبَاوْهُمْ لْبَابِلْ، يَكُنْيَا جَابْ شَأَلْتِئِيلْ. وشَأَلْتِئِيلْ جَابْ زَرُبَّابِلْ.

¹³ وزَرُبَّابِلْ جَابْ أَبِيهُودْ. وأَبِيهُودْ جَابْ أَلِيَاقِيمْ. وأَلِيَاقِيمْ جَابْ عَازُورْ.

¹⁴ وعَازُورْ جَابْ صَادُوقْ. وصَادُوقْ جَابْ أَخِيمْ. وأَخِيمْ جَابْ أَلِيُودْ.

¹⁵ وأَلِيُودْ جَابْ أَلِيعَازَرْ. وأَلِيعَازَرْ جَابْ مَتَّانْ. ومَتَّانْ جَابْ يَعْقُوبْ.

¹⁶ ويَعْقُوبْ جَابْ يُوسِفْ رَاجِلْ مَرْيِمْ الِّي وِلْدِتْ يَسُوعْ الِّي يْعَيْطُولُو المَسِيحْ.

¹⁷ وهَكَّا نَلْقَاوْ 14 جِيلْ مِنْ إِبْرَاهِيمْ حَتَّى لْدَاوِدْ، و14 جِيلْ مِنْ دَاوِدْ حَتَّى لِينْ تِسْبَاوْ اليْهُودْ لْبَابِلْ، و14 جِيلْ مِلِّي تِسْبَاوْ حَتَّى لِينْ جَاء المَسِيحْ.

وْلَادِةْ يَسُوعْ

¹⁸ وهَاوْ كِيفَاشْ تُولِدْ يَسُوعْ المَسِيحْ: كَانِتْ أُمُّو مَرْيِمْ مَخْطُوبَة لْرَاجِلْ إِسْمُو يُوسِفْ. وقْبَلْ مَا يْعَرْسُوا، ظْهُرْ الِّي هِيَّ حِبْلَى بْقُوِّةْ الرُّوحْ القُدُسْ.

¹⁹ وعْلَى خَاطِرْ يُوسِفْ كَانْ رَاجِلْ صَالَحْ، قَرِّرْ يِبْعِدْ عْلِيهَا فِي السِّرْ، مِنْ غِيرْ مَا يِفْضَحْهَا.

²⁰ وهُوَّ مَزَّالْ يْخَمِّمْ فِي الحْكَايَة، ظْهُرْلُو مَلَاكْ مِنْ عَنْدْ الرَّبْ فِي المْنَامْ، وقَالُّو: «يَا يُوسِفْ وِلْدْ دَاوِدْ، مَا تْخَافِشْ إِنِّكْ تْعَرِّسْ بْمَرْيِمْ، عْلَى خَاطِرْ الِّي حِبْلَى بِيهْ هُوَّ مِالرُّوحْ القُدُسْ.

²¹ وبِشْ تْجِيبْ وْلَيِّدْ، وإِنْتِ تْسَمِّيهْ يَسُوعْ، عْلَى خَاطْرُو بِشْ يْنَجِّي شَعْبُو مِنْ ذْنُوبْهُمْ».

²² وهَاذَا الكُلْ صَارْ بَاشْ يِتْحَقَّقْ الِّي قَالُو الرَّبْ عْلَى طْرِيقْ النَّبِيْ:

²³ «الصْبِيَّة تِحْبِلْ، وتْجِيبْ طْفُلْ، يِتْسَمَّى عِمَّانُوئِيلْ!» (الِّي تَفْسِيرُو: اللَّهْ مْعَانَا).

²⁴ ووَقْتِلِّي فَاقْ يُوسِفْ مِالنُّومْ، عْمَلْ كِيمَا قَالُّو المَلَاكْ، ورَوَّحْ بْمَرْتُو لْدَارُو،

²⁵ آمَا مَا مَسْهَاشْ حَتَّى لِينْ جَابِتْ الطْفُلْ، وسَمَّاهْ يَسُوعْ.