لُوقَا 9 - العهد الجديد بالدارجة التونسية 2022

يَسُوعْ يَبْعَثْ التْلَامْذَة الأَثْنَاشْ يْبَشْرُوا

¹ ومْبَعِّدْ عَيِّطْ يَسُوعْ لِتْلَامِذْتُو الأَثْنَاشْ، وعْطَاهُمْ قُوَّة وسُلْطَة بَاشْ يْخَرْجُوا الشْوَاطِنْ الكُلْ ويِشْفِيوْ الأَمْرَاضْ.

² وبْعَثْهُمْ بَاشْ يْبَشْرُوا بْمَمْلَكْةْ اللَّهْ ويِشْفِيوْ المُرْضَى.

³ وقَالِلْهُمْ: «وإِنْتُومَا مَاشِينْ مَا تْهِزُّوا مْعَاكُمْ شَيْ: لَا عْصَا، لَا صُرَّة، لَا خُبْزْ، لَا فْلُوسْ ولَا حَتَّى لِبْسَة زَايْدَة.

⁴ والدَّارْ الِّي تُدْخْلُولْهَا أُسْكْنُوا فِيهَا حَتَّى لِينْ تِمْشِيوْ.

⁵ وأَيْ مْدِينَة أَهْلْهَا مَا يِقْبْلُوكُمْشْ، أُخْرْجُوا مِنْهَا وأُنْفْضُوا التْرَابْ مِنْ سَاقِيكُمْ أَمَارَة إِنُّو اللَّهْ مُشْ فَرْحَانْ بِيهُمْ».

⁶ ووَقْتِلِّي خَرْجُوا، بْدَاوْ يْدُورُوا مِنْ دَشْرَة لْدَشْرَة يْبَشْرُوا ويِشْفِيوْ فِي المُرْضَى فِي كُلْ بْلَاصَة.

هِيرُودُسْ مُحْتَارْ

⁷ وسْمَعْ هِيرُودُسْ الوَالِي بِلِّي كَانْ صَايِرْ الكُلْ، وبْقَى مِتْحَيِّرْ، عْلَى خَاطِرْ فَمَّة شْكُونْ كَانُوا يْقُولُوا: «يُوحَنَّا الِّي يْعَمِّدْ قَامْ مِالمُوتْ».

⁸ وجْمَاعَة يْقُولُوا: «إِيلِيَّا ظْهُرْ»، وأُخْرِينْ يْقُولُوا: «وَاحِدْ مِالأَنْبِيَاءْ القْدُمْ قَامْ».

⁹ آمَا هِيرُودُسْ قَالْ: « يُوحَنَّا آنَا قَصِّيتْلُو رَاسُو، مَالَا شْكُونُو هَاذَا الِّي نِسْمَعْ عْلِيهْ فِي هَا الأَخْبَارْ؟». وكَانْ يْحَاوِلْ بَاشْ يْقَابْلُو.

يَسُوعْ يْشَبَّعْ 5 000 رَاجِلْ

¹⁰ وبَعْدْمَا رَجْعُوا الرُّسُلْ، حْكَاوْ لْيَسُوعْ عَلِّي عَمْلُوهْ الكُلْ. يَاخِي هَزْهُمْ مْعَاهْ ومْشَاوْ بَاشْ يُقْعْدُوا وَحَّدْهُمْ بَحْذَا مْدِينَة إِسْمْهَا بَيْتْ صَيْدَا.

¹¹ آمَا النَّاسْ فَاقُوا بِيهْ وتَبْعُوهْ. يَاخِي اسْتَقْبِلْهُمْ وكَلَّمْهُمْ عْلَى مَمْلَكْةْ اللَّهْ، وشْفَى الِّي كَانُوا مُحْتَاجِينْ يِتْشْفَاوْ.

¹² وكِي قْرِيبْ يُوفَى النْهَارْ، جَاوَهْ تْلَامِذْتُو الأَثْنَاشْ وقَالُولُو: «أَبْعِثْ النَّاسْ خَلِّيهُمْ يِمْشِيوْ لِلدْشُرْ والفِيرْمَاتْ القْرِيبَة، بَاشْ يْبَاتُوا غَادِي ويَلْقَاوْ مَا يَاكْلُوا، عْلَى خَاطِرْ هُونِي البْلَاصَة خْلَاء».

¹³ آمَا يَسُوعْ قَالِلْهُمْ: «أَعْطِيوْهُمْ إِنْتُومَا مَا يَاكْلُوا». جَاوْبُوهْ: «مَا عَنْدْنَا كَانْ خَمْسَة خُبْزَاتْ وحُوتِّينْ، إِلَّا إِذَا كَانْ نِمْشِيوْ نِشْرِيوْ مَاكْلَة لِلنَّاسْ هَاذُومَا الكُلْ».

¹⁴ عْلَى خَاطِرْ كَانْ عْدَدْهُمْ تَقْرِيبْ 5 000 رَاجِلْ. يَاخِي قَالْ لِتْلَامِذْتُو: «قَعْدُوهُمْ كُلْ 50 مْعَ بْعَضْهُمْ».

¹⁵ وعَمْلُوا كِيمَا قَالِلْهُمْ وقَعْدُوا النَّاسْ الكُلْ.

¹⁶ وخْذَا يَسُوعْ الخَمْسَة خُبْزَاتْ والحُوتِّينْ وهَزْ عِينِيهْ لِلسْمَاء وشْكَرْ اللَّهْ وقَسَّمْهُمْ وعْطَاهُمْ لِتْلَامِذْتُو بَاشْ يْفَرْقُوهُمْ عَالنَّاسْ.

¹⁷ وكْلَاوْ النَّاسْ الكُلْ وشَبْعُوا. وعَبَّاوْ أَثْنَاشِنْ قُفَّة مِالمَاكْلَة الِّي فُضْلِتْ.

بُطْرُسْ يِشْهِدْ الِّي يَسُوعْ هُوَّ مَسِيحْ اللَّهْ

¹⁸ فِي نْهَارْ مِالنْهَارَاتْ كَانْ يَسُوعْ قَاعِدْ يْصَلِّي وَحْدُو والتْلَامْذَة كَانُوا بَحْذَاهْ، يَاخِي سْإِلْهُمْ: «آنَا شْكُونْ حَسْبْ رَايْ النَّاسْ؟».

¹⁹ جَاوْبُوهْ: «جْمَاعَة يْقُولُوا عْلِيكْ يُوحَنَّا الِّي يْعَمِّدْ، وجْمَاعَة يْقُولُوا الِّي إِنْتِ إِيلِيَّا، وفَمَّة شْكُونْ يْقُولْ الِّي إِنْتِ وَاحِدْ مِالأَنْبِيَاءْ القْدُمْ قَامْ مِالمُوتْ».

²⁰ يَاخِي سْإِلْهُمْ: «وحَسْبْ رَايْكُمْ إِنْتُومَا، آنَا شْكُونْ؟». جَاوْبُو بُطْرُسْ: «إِنْتِ مَسِيحْ اللَّهْ!».

يَسُوعْ يِتْنَبَّأْ بْمُوتُو وقْيَامْتُو

²¹ آمَا هُوَّ نَبَّهْ عْلِيهُمْ بَاشْ مَا يْقُولُوا هَاذَا لْحَدْ.

²² وقَالْ: «إِبْنْ الإِنْسَانْ لَازْمُو يِتْعَذَّبْ بَرْشَة، ويُرْفْضُوهْ الشْيُوخْ وكْبَارْ الكَهَنَة وعُلَمَاءْ الشَّرِيعَة، ويِتْقْتَلْ، وفِي النْهَارْ الثَّالِثْ يْقُومْ».

²³ وقَالْ لِلنَّاسْ الكُلْ: «إِذَا كَانْ وَاحِدْ يْحِبْ يْتَبَّعْنِي، لَازْمُو يُنْكُرْ رُوحُو، ويْكُونْ مِسْتْعَدْ بَاشْ يْشَارِكْنِي فِي العْذَابْ والمُوتْ كُلْ يُومْ، ويْتَبَّعْنِي.

²⁴ الِّي يْحِبْ يْنَجِّي رُوحُو يَخْسَرْهَا. آمَا الِّي يَخْسَرْ رُوحُو عْلَى خَاطْرِي يْنَجِّيهَا.

²⁵ شْنِيَّة الفَايْدَة كَانْ الإِنْسَانْ يِرْبَحْ العَالِمْ بْكُلُّو ويَخْسَرْ حْيَاتُو وَلَّا يْضَيَّعْهَا؟

²⁶ الِّي يِسْتْعَارْ بِيَّا وبِكْلَامِي، يِسْتْعَارْ بِيهْ إِبْنْ الإِنْسَانْ وَقْتِلِّي يِرْجَعْ فِي مَجْدُو ومَجْدْ الآبْ والمْلَايْكَة القِدِّيسِينْ.

²⁷ آمَا نْقُلْكُمْ الحَقْ: فَمَّة شْكُونْ مِالوَاقْفِينْ هُونِي مَاهُمْشْ بِشْ يْذُوقُوا المُوتْ إِلَّا بَعْدْمَا يْشُوفُوا مَمْلَكْةْ اللَّهْ».

يَسُوعْ يُظْهُرْ فِي مَجْدُو

²⁸ وبَعْدْمَا قَالْ الكْلَامْ هَاذَا بِثْمَنْيَة أَيَّامْ، هَزْ يَسُوعْ بُطْرُسْ ويُوحَنَّا ويَعْقُوبْ وطْلَعْ لِلجْبَلْ بَاشْ يْصَلِّي.

²⁹ وهُوَّ يْصَلِّي، وِجْهُو تْبَدِّلْ، وحَوَايْجُو وَلَّاوْ بْيُضْ يِلْمْعُوا.

³⁰ وإِذَا بِيهُمْ زُوزْ رْجَالْ يَحْكِيوْ مْعَاهْ، وهُومَا: مُوسَى وإِيلِيَّا،

³¹ الِّي ظُهْرُوا فِي مَجْدْ، وكَانُوا يِتْكَلْمُوا عْلَى مُوتُو الِّي لَازِمْ يْتِمْ فِي أُورْشَلِيمْ.

³² بُطْرُسْ ولِّي مْعَاهْ غْلِبْهُمْ النُّومْ، آمَا كِي فَاقُوا، شَافُوا مَجْدْ يَسُوعْ والزُّوزْ الرْجَالْ الوَاقْفِينْ مْعَاهْ.

³³ وكِي جَاوْ الرْجَالْ يْفَارْقُوا فِيهْ، قَالْ بُطْرُسْ لْيَسُوعْ: « يَا سِيدِي مَحْلَاهَا القَعْدَة هُونِي، خَلِّينَا نُنْصْبُوا ثْلَاثَة خْيِمْ: وَحْدَة لِيكْ، ووَحْدَة لْمُوسَى، ووَحْدَة لْإِيلِيَّا». وكَانْ مُشْ عَارِفْ فَاشْ قَاعِدْ يْقُولْ.

³⁴ وهُوَّ مَزَّالْ يِتْكَلِّمْ جَاتْ غِيمَة وغَطَّاتْهُمْ، يَاخِي التْلَامْذَة خَافُوا كِي دَخْلُوا وِسْطْ الغِيمَة.

³⁵ وخْرَجْ صُوتْ مِالغَيْمَة يْقُولْ: «هَاذَا هُوَّ إِبْنِي الِّي اخْتَرْتُو، إِسْمْعُوا كْلَامُو».

³⁶ وبَعْدْمَا سَمْعُوا الصُّوتْ، شَافُوا يَسُوعْ وَحْدُو. يَاخِي كِتْمُوا الخْبَرْ ومَا حْكَاوْ لْحَتَّى حَدْ فِي الأَيَّامَاتْ هَاذِيكَا عَلِّي شَافُوهْ.

يَسُوعْ يْخَرِّجْ رُوحْ شِرِّيرْ مِنْ وْلَيِّدْ

³⁷ ومِنْ غُدْوَة، كِي هَبْطُوا مِالجْبَلْ، لْقَاوْ بَرْشَة نَاسْ يِسْتَنَّاوْ فِي يَسُوعْ.

³⁸ وبْدَا وَاحِدْ مِنْهُمْ يْعَيِّطْ ويْقُولْ: «يَا مُعَلِّمْ، نِتْرَجَّاكْ تْجِي تْشُوفْلِي وِلْدِي، رَانِي مَا عَنْدِي كَانْ هُوَّ،

³⁹ رَاهُو يِمْكْنُو رُوحْ شِرِّيرْ، وفِي لَحْظَة يْوَلِّي يْصِيحْ، ويْطِيحْ يِتْصَكِّكْ وكْشَاكْشُو تُخْرُجْ، ومَا يْسَيْبُو كَانْ بِالسِّيفْ وهُوَّ مْرَضْرِضْ.

⁴⁰ وطْلَبْتْ مِنْ تْلَامِذْتِكْ بَاشْ يْخَرْجُوهْ مِنُّو، يَاخِي مَا نَجْمُوشْ».

⁴¹ جَاوِبْ يَسُوعْ: «إِنْتُومَا جِيلْ مُشْ مُؤْمِنْ وضَايَعْ! قَدَّاشْ بِشْ نُقْعْدِلْكُمْ ونُصْبُرْ عْلِيكُمْ؟» وقَالْ لِلرَّاجِلْ: «جِيبْ وِلْدِكْ هُونِي!».

⁴² والوْلَيِّدْ جَايْ فِي الثْنِيَّة، صَرْعُو الشِّيطَانْ وطَاحْ يِتْصَكِّكْ فِي القَاعَة. يَاخِي نْزَرْ يَسُوعْ عَالرُّوحْ الشِّرِّيرْ، وشْفَى الوْلَيِّدْ ورَجْعُو لْبُوهْ.

⁴³ والنَّاسْ الكُلْ تْعَجْبُوا مِنْ قُدْرِةْ اللَّهْ العْظِيمَة. وهُومَا مِتْعَجْبِينْ مِلِّي عَمْلُو يَسُوعْ، قَالْ هُوَّ لِتْلَامِذْتُو:

⁴⁴ «إِسْمْعُوا مْلِيحْ الِّي بِشْ نْقُولْهُولْكُمْ: إِبْنْ الإِنْسَانْ بِشْ يْسَلْمُوهْ فِي يْدِينْ النَّاسْ».

⁴⁵ آمَا هُومَا مَا فَهْمُوشْ كْلَامُو، عْلَى خَاطِرْ مَعْنَاهْ كَانْ مْخُبِّي عْلِيهُمْ، بَاشْ مَا يِفْهْمُوهِشْ. وخَافُوا بَاشْ يِسْأْلُوهْ شْنُوَّة يُقْصُدْ.

شْكُونْ أَعْظِمْ وَاحِدْ فِي مَمْلَكْةْ اللَّهْ؟

⁴⁶ وتْخَالْفُوا تْلَامِذْتُو فِي بْعَضْهُمْ عْلَى شْكُونْ أَعْظِمْ وَاحِدْ فِيهُمْ.

⁴⁷ آمَا يَسُوعْ عْرَفْ الِّي فِي قْلُوبْهُمْ، يَاخِي شَدْ طْفُلْ صْغِيرْ مِنْ يِدُّو ووَقْفُو بْجَنْبُو

⁴⁸ وقَالِلْهُمْ: «الِّي يِقْبِلْ الوْلَيِّدْ هَاذَا عْلَى خَاطِرْ إِسْمِي، يِقْبِلْنِي آنَا، ولِّي يِقْبِلْنِي، يِقْبِلْ الِّي بْعَثْنِي. عْلَى خَاطِرْ أَصْغِرْ وَاحِدْ فِيكُمْ الكُلْ هُوَّ أَعْظِمْ وَاحِدْ».

⁴⁹ تْكَلَّمْ يُوحَنَّا قَالْ: «يَا سِيدِي، شُفْنَا وَاحِدْ يْخَرِّجْ فِي الشْوَاطِنْ بْإِسْمِكْ، يَاخِي مْنَعْنَاهْ، عْلَى خَاطْرُو مُشْ يْتَبَّعْ فِيكْ مْعَانَا».

⁵⁰ يَاخِي قَالُّو يَسُوعْ: «مَا تِمْنْعُوهُوشْ، عْلَى خَاطِرْ الِّي مُشْ ضِدْكُمْ، هُوَّ مْعَاكُمْ».

قَرْيَة مَا تِقْبِلْشْ يَسُوعْ

⁵¹ وكِي قْرُبْ الوَقْتْ الِّي بِشْ يِتْرْفَعْ فِيهْ يَسُوعْ لِلسْمَاء، قَرِّرْ بَاشْ يِمْشِي لْأُورْشَلِيمْ.

⁵² وبْعَثْ جْمَاعَة بَاشْ يِسْبْقُوهْ، ودَخْلُوا لْقَرْيَة فِي مَنْطَقْةْ السَّامْرَة بَاشْ يْحَضْرُولُو مَا يِلْزِمْ.

⁵³ آمَا إِمَّالِيهَا مَا قِبْلُوهِشْ عْلَى خَاطْرُو كَانْ مَاشِي لْأُورْشَلِيمْ.

⁵⁴ وكِي تْلَامِذْتُو يُوحَنَّا ويَعْقُوبْ شَافُوا الِّي صَارْ قَالُوا: «يَا سِيدْنَا، تْحِبْشِي نُأْمْرُوا بَاشْ تَهْبِطْ عْلِيهُمْ نَارْ مِالسْمَاء وتَحْرَقْهُمْ؟».

⁵⁵ وتْلَفْتِلْهُمْ يَسُوعْ ولَامْ عْلِيهُمْ وقَالْ: «إِنْتُومَا مَا تَعْرْفُوشْ مِنْ آنَا رُوحْ جِيتُوا،

⁵⁶ عْلَى خَاطِرْ إِبْنْ الإِنْسَانْ مَا جَاشْ بَاشْ يِهْلِكْ النَّاسْ، آمَا جَاء بَاشْ يْنَجِّيهُمْ». ومْشَاوْ لْدَشْرَة أُخْرَى.

الِّي يْحُطْ يِدُّو عَالمِحْرَاثْ مَا يِتْلَفَّتْشْ لْتَالِي

⁵⁷ وهُومَا مَاشِينْ فِي الطْرِيقْ جَاء وَاحِدْ لْيَسُوعْ وقَالُّو: «بِشْ نْتَبْعِكْ فِينْ مَا تِمْشِي».

⁵⁸ جَاوْبُو يَسُوعْ: «الثْعَالِبْ عَنْدْهَا مْغَاغِرْ، والطْيُورْ عَنْدْهَا عْشَاشْ، آمَا إِبْنْ الإِنْسَانْ مَا عَنْدُو وِينْ يْكِنْ رَاسُو».

⁵⁹ وقَالْ يَسُوعْ لْوَاحِدْ آخِرْ: «تَبَّعْنِي!». آمَا هُوَّ قَالُّو: «يَا سِيدِي، قْبَلْ كُلْ شَيْ خَلِّينِي نِمْشِي نِدْفِنْ بَابَا».

⁶⁰ يَاخِي قَالُّو يَسُوعْ: «خَلِّي المُوتَى يِدْفْنُوا المُوتَى مْتَاعْهُمْ، آمَا إِنْتِ إِمْشِي وبَشِّرْ بْمَمْلَكْةْ اللَّهْ».

⁶¹ وقَالُّو وَاحِدْ آخِرْ: «يَا سِيدْنَا، آنَا نْتَبْعِكْ، آمَا خَلِّينِي نِمْشِي نْسَلِّمْ عْلَى عَايِلْتِي قْبَلْ».

⁶² جَاوْبُو يَسُوعْ: «الِّي يْحُطْ يِدُّو عَالمِحْرَاثْ ويِتْلَفَّتْ لْتَالِي، مَا يُصْلُحْشْ لْمَمْلَكْةْ اللَّهْ».