لُوقَا 5 - العهد الجديد بالدارجة التونسية 2022

يَسُوعْ يِخْتَارْ تْلَامِذْتُو الأُولَانِينْ

¹ وفِي نْهَارْ مِالنْهَارَاتْ، كَانْ يَسُوعْ وَاقِفْ عْلَى شَطْ بُحَيْرِةْ جَنِّيسَارْتْ، والنَّاسْ كَانُوا مَلْمُومِينْ بِيهْ بَاشْ يِسْمْعُوا كِلْمِةْ اللَّهْ.

² وشَافْ زُوزْ فْلَايِكْ عَالشَّطْ، هَبْطُوا مِنْهُمْ الصَّيَّادَة بَاشْ يَغْسْلُوا شْبَاكْهُمْ.

³ يَاخِي رْكِبْ فِي وَحْدَة مِنْهُمْ الِّي هِيَّ مْتَاعْ سِمْعَانْ، وقَالُّو يِبْعِدْ عَالشَّطْ شْوَيَّة، ومْبَعِّدْ قْعَدْ وبْدَا يْعَلِّمْ فِي النَّاسْ مِالفْلُوكَة.

⁴ وكِي كَمِّلْ كْلَامُو قَالْ لْسِمْعَانْ: «أُدْخُلْ لِلْغْرِيقْ، وإِرْمِيوْ شْبَاكُّمْ واصْطَادُوا».

⁵ يَاخِي جَاوْبُو سِمْعَانْ: «يَا سِيدْنَا رَانَا تْعِبْنَا اللِّيلْ بْكُلُّو ومَا اصْطَدْنَا شَيْ، آمَا عْلَى كِلْمْتِكْ هَانِي بِشْ نَرْمِي الشْبَاكْ».

⁶ وكِي عَمْلُوا بِكْلَامُو، اصْطَادُوا بَرْشَة حُوتْ لِينْ شْبَاكْهُمْ بْدَاتْ تِتْقَطَّعْ.

⁷ وَلَّاوْ شَاوْرُوا بِيْدِيهُمْ لِصْحَابْهُمْ الِّي فِي الفْلُوكَة الأُخْرَى بَاشْ يْجِيوْ يْعَاوْنُوهُمْ، وجَاوْ وعَبَّاوْ الزُّوزْ فْلَايِكْ لِينْ قْرِيبْ يُغْرْقُوا.

⁸ وكِي شَافْ سِمْعَانْ بُطْرُسْ الِّي صَارْ، تِرْمَى قُدَّامْ رْكَايِبْ يَسُوعْ وقَالْ: «يَا رَبْ، إِبْعِدْ عْلِيَّا، رَانِي إِنْسَانْ مُذْنِبْ».

⁹ وكَانْ هُوَّ ولِّي مْعَاهْ مِتْعَجْبِينْ مِنْ كُثْرِةْ الحُوتْ الِّي اصْطَادُوهْ.

¹⁰ وكَانْ نَفْسْ الشَّيْ بِالنِّسْبَة لْيَعْقُوبْ ويُوحَنَّا وْلَادْ زَبَدِي الِّي هُومَا شُرْكَا مْعَ سِمْعَانْ. وقَالْ يَسُوعْ لْسِمْعَانْ: «مَا تْخَافِشْ، مِنْ تَوَّا بِشْ تْوَلِّي صَيَّادْ نَاسْ».

¹¹ وكِي رَجْعُوا بِالزُّوزْ فْلَايِكْ لِلشَّطْ، خَلَّاوْ كُلْ شَيْ وتَبْعُوا يَسُوعْ.

يَسُوعْ يِشْفِي مْرِيضْ بِالبْرَصْ

¹² ووَقْتِلِّي كَانْ يَسُوعْ فِي مْدِينَة مِالمُدُنْ، جَاهْ رَاجِلْ بَدْنُو الكُلْ مِلْيَانْ بِالبْرَصْ، وأَوِّلْ مَا شَافْ يَسُوعْ سْجِدْلُو وتْشَحْتُو وقَالْ: «يَا سِيدِي، كَانْ إِنْتِ تْحِبْ، تْنَجِّمْ اطَّهِّرْنِي مِالبْرَصْ».

¹³ يَاخِي مَدْ يَسُوعْ يِدُّو ومَسُّو وقَالُّو: «أَيْ نْحِبْ، أُطْهُرْ!». وبِالوَقْتْ تْنَحَّى عْلِيهْ البْرَصْ.

¹⁴ ووَصَّاهْ يَسُوعْ بَاشْ مَا يْقُولْ لْحَدْ وقَالُّو: «إِمْشِي لِلْكَاهِنْ خَلِّيهْ يْشُوفِكْ، وأَعْطِي عْلَى تَطْهِيرِكْ الِّي وَصَّى بِيهْ مُوسَى، خَلِّيهْ يْكُونْ أَمَارَة لِيهُمْ إِنِّكْ تِشْفِيتْ مِالمْرَضْ».

¹⁵ آمَا أَخْبَارْ يَسُوعْ زَادِتْ تْنَشْرِتْ أَكْثِرْ، وجَاوَهْ بَرْشَة نَاسْ بَاشْ يِسْمْعُوهْ ويِتْشْفَاوْ مِنْ أَمْرَاضْهُمْ.

¹⁶ آمَا هُوَّ بَرْشَة مَرَّاتْ كَانْ يِمْشِي لِلْخْلَاء بَاشْ يْصَلِّي.

يَسُوعْ يِشْفِي مَشْلُولْ

¹⁷ وفِي نْهَارْ مِالنْهَارَاتْ، كَانْ يَسُوعْ يْعَلِّمْ، وكَانُوا بِينْ الحَاضْرِينْ جْمَاعَة مِالفِرِّيسِيِّينْ ومِلِّي يْعَلْمُوا فِي الشَّرِيعَة، جَاوْ مِنْ كُلْ دَشْرَة فِي مَنْطَقْةْ الجَلِيلْ واليَهُودِيَّة ومِنْ أُورْشَلِيمْ، وكَانِتْ قُدْرِةْ اللَّهْ تِشْفِي المُرْضَى عْلَى يْدِيهْ.

¹⁸ وإِذَا بِيهْ جَاوْ جْمَاعَة هَازِّينْ رَاجِلْ مَشْلُولْ عْلَى فَرْشْ، وحَاوْلُوا يُدْخْلُوا بِيهْ ويْحُطُّوهْ قُدَّامُو.

¹⁹ وكِي مَا نَجْمُوشْ يُدْخْلُوا مِنْ كُثْرِةْ النَّاسْ، طَلْعُوا لِلسْطَحْ ونَقْبُوهْ وهَبْطُوا المَشْلُولْ بِالفَرْشْ مْتَاعُو وحَطُّوهْ فِي الوِسْطْ قُدَّامْ يَسُوعْ.

²⁰ وكِي شَافْ يَسُوعْ إِيمَانْهُمْ قَالْ لِلْمَشْلُولْ: «يَا رَاجِلْ، ذْنُوبِكْ تْغِفْرِتْ».

²¹ يَاخِي بْدَاوْ عُلَمَاءْ الشَّرِيعَة والفِرِّيسِيِّينْ يْقُولُوا فِي قْلُوبْهُمْ: «شْكُونُو هَاذَا الِّي قَاعِدْ يْقُولْ فِي كْلَامْ كُفْرْ؟ شْكُونْ بِخْلَافْ اللَّهْ وَحْدُو يْنَجِّمْ يِغْفِرْ الذْنُوبْ؟».

²² وعْرَفْ يَسُوعْ فَاشْ يْخَمُّوا يَاخِي قَالِلْهُمْ: «عْلَاشْ تْخَمُّوا هَكَّا فِي قْلُوبْكُمْ؟

²³ آنَاهُو الأَسْهِلْ؟ إِنُّو يِتْقَالْ: "ذْنُوبِكْ تْغِفْرِتْ"، وَلَّا يِتْقَالْ: "قُومْ وإِمْشِي"؟

²⁴ آمَا هَانِي بِشْ نْوَرِّيكُمْ الِّي إِبْنْ الإِنْسَانْ عَنْدُو السُّلْطَة فِي الأَرْضْ بَاشْ يِغْفِرْ الذْنُوبْ». يَاخِي قَالْ لِلْمَشْلُولْ: «نْقُلِّكْ: قُومْ! هِزْ فَرْشِكْ ورَوَّحْ لْدَارِكْ».

²⁵ وبِالوَقْتْ قَامْ قُدَّامْهُمْ وهَزْ فَرْشُو الِّي كَانْ رَاقِدْ عْلِيهْ، ورَوَّحْ لْدَارُو وهُوَّ يْمَجِّدْ فِي اللَّهْ.

²⁶ والنَّاسْ الكُلْ قَعْدُوا بَاهْتِينْ، ومَجْدُوا اللَّهْ وقَالُوا وهُومَا مَاكِنْهُمْ الخُوفْ: «اليُومْ رِينَا عْجَايِبْ!».

يَسُوعْ يِخْتَارْ لَاوِي

²⁷ وبَعْدْ هَاذَا خْرَجْ يَسُوعْ، وشَافْ مَكَّاسْ إِسْمُو لَاوِي قَاعِدْ فِينْ يْلِمُّوا فِي المَكْسْ، يَاخِي قَالُّو: «تَبَّعْنِي!».

²⁸ يَاخِي قَامْ وخَلَّى كُلْ شَيْ وتَبْعُو.

²⁹ وعْمَلُّو لَاوِي ضْيَافَة كْبِيرَة فِي دَارُو، وكَانُوا فَمَّة بَرْشَة مَكَّاسَة ونَاسْ أُخْرِينْ قَاعْدِينْ يَاكْلُوا مْعَاهُمْ.

³⁰ وبْدَاوْ عُلَمَاءْ الشَّرِيعَة والفِرِّيسِيِّينْ يِتْشَكَّاوْ عْلَى تْلَامْذِةْ يَسُوعْ وقَالُولْهُمْ: «عْلَاشْ تَاكْلُوا وتُشْرْبُوا مْعَ المَكَّاسَة والمُذْنْبِينْ؟»

³¹ يَاخِي جَاوِبْهُمْ يَسُوعْ: «المُرْضَى هُومَا الِّي يَحْتَاجُوا لِلطْبِيبْ مُشْ الصْحَاحْ.

³² آنَا مَا جِيتِشْ لِلصَّالْحِينْ، آمَا جِيتْ نِدْعِي فِي الْمُذْنْبِينْ بَاشْ يْتُوبُوا».

يَسُوعْ والصْيَامْ

³³ يَاخِي قَالُولُو: «تْلَامْذِةْ يُوحَنَّا يْصُومُوا ويْصَلِّيوْ بَرْشَة، وتْلَامْذِةْ الفِرِّيسِيِّينْ يَعْمْلُوا نَفْسْ الشَّيْ، آمَا تْلَامِذْتِكْ يَاكْلُوا ويُشْرْبُوا».

³⁴ قَالِلْهُمْ يَسُوعْ: «يَاخِي تْنَجْمُوا تْلِزُّوا المِسْتَدْعِينْ لِلْعِرْسْ بَاشْ يْصُومُوا والعْرُوسْ مْعَاهُمْ؟

³⁵ آمَا بِشْ يْجِي الوَقْتْ الِّي يِتْنَحَّى فِيهْ العْرُوسْ مِنْ بَحْذَاهُمْ، ووَقْتْهَا يْصُومُوا».

³⁶ وقَالِلْهُمْ المَثَلْ هَاذَا: «حَتَّى حَدْ مَا يْرَقَّعْ لِبْسَة قْدِيمَة بْطَرْفْ قْمَاشْ جْدِيدْ، عْلَى خَاطِرْ القْمَاشْ الجْدِيدْ بِشْ يِتْقَطَّعْ والرُّقْعَة بِيدْهَا مُشْ بِشْ تْوَاتِي القْمَاشْ القْدِيمْ.

³⁷ ومَا فَمَّة حَتَّى وَاحِدْ يْحُطْ شْرَابْ جْدِيدْ فِي ڨِرْبَة قْدِيمَة، بَاشْ الشْرَابْ الجْدِيدْ مَا يِفْلَقْشْ الڨِرْبَة ويَخْسِرْ الشْرَابْ والڨِرْبَة.

³⁸ آمَا الشْرَابْ الجْدِيدْ يِتْحَطْ فِي ڨِرْبَة جْدِيدَة.

³⁹ ومَا فَمَّة حَدْ يُشْرُبْ الشْرَابْ المْعَتَّقْ ويْلَوِّجْ عَالجْدِيدْ، عْلَى خَاطِرُو يْقُولْ: "المْعَتَّقْ أَحْسِنْ"».