لُوقَا 3 - العهد الجديد بالدارجة التونسية 2022

يُوحَنَّا يْحَضِّرْ الطْرِيقْ لْيَسُوعْ

¹ وَقْتِلِّي القَيْصِرْ طِيبَارْيُوسْ عْمَلْ 15 سْنَة فِي الحُكْمْ، وكَانْ بِيلَاطُسْ البُنْطِي وَالِي عْلَى مَنْطَقْةْ اليَهُودِيَّة، وهِيرُودُسْ وَالِي عْلَى مَنْطَقْةْ الجَلِيلْ، وخُوهْ فِيلِيبُّسْ وَالِي عْلَى مَنْطَقْةْ إِيطُورِيَّة وتْرَاخُونِيتْسْ، ولِيسَانْيُوسْ وَالِي عْلَى مَنْطَقْةْ الأَبِلِيَّة،

² وفِي الوَقْتْ الِّي كَانُوا فِيهْ حَنَّانْ وقِيَافَا كْبَارْ الكَهَنَة، كَلِّمْ اللَّهْ يُوحَنَّا وِلْدْ زَكَرِيَّا وهُوَّ فِي الخْلَاء.

³ يَاخِي مْشَى لِلْبْقَايَعْ الكُلْ الدَّايْرَة بْوَادْ الأُرْدُنْ، يْنَادِي لِلنَّاسْ بَاشْ يْتُوبُوا ويِتْعَمْدُوا بَاشْ تِتْغْفِرْ ذْنُوبْهُمْ،

⁴ كِيمَا مَكْتُوبْ فِي كْتَابْ النَّبِيْ إِشَعْيَاءْ: «صُوتْ يْعَيِّطْ فِي الخْلَاء: حَضّْرُوا طْرِيقْ الرَّبْ، إِسْتْوِيوْ الثْنِيَّة قُدَّامُو!

⁵ كُلْ وَادْ يِتِرْدِمْ، وكُلْ جْبَلْ وهَضْبَة يُوطَاوْ، والثْنَايَا المْعَوْجَة تِتْسْتْوَى، والوَاعْرَة تِسْهَالْ،

⁶ والنَّاسْ الكُلْ بِشْ يْشُوفُوا نْجَاةْ اللَّهْ».

⁷ وكَانْ يُوحَنَّا يْقُولْ لِلنَّاسْ الِّي جَاوْ بَاشْ يِتْعَمْدُوا عْلَى يْدِيهْ: «يَا وْلَادْ الأَفَاعِي! شْكُونْ الِّي وَرَّاكُمْ كِيفَاشْ تُهْرْبُوا مِنْ غَضَبْ اللَّهْ الِّي بِشْ يْجِي؟

⁸ أَعْمْلُوا أَعْمَالْ تْوَرِّي الِّي إِنْتُومَا تُبْتُوا بِالحَقْ، ومَا تْقُولُوشْ فِي قْلُوبْكُمْ: "أَحْنَا وْلَادْ إِبْرَاهِيمْ". عْلَى خَاطِرْ آنَا نْقُلْكُمْ إِنُّو اللَّهْ قَادِرْ يَعْمِلْ مِالحْجَرْ هَاذَا وْلَادْ لْإِبْرَاهِيمْ.

⁹ والفَاسْ تَوَّا مَحْطُوطْ عْلَى عْرُوقْ الشْجَرْ، وكُلْ شَجْرَة مَا تْجِيبِشْ غَلَّة بَاهْيَة تِتْقَصْ وتِتْرْمَى فِي النَّارْ».

¹⁰ يَاخِي سِأْلُوهْ النَّاسْ: «مَالَا شْنُوَّة لَازِمْنَا نَعْمْلُوا؟»

¹¹ وهُوَّ جَاوِبْهُمْ: «الِّي عَنْدُو لِبْسْتِينْ يَعْطِي لِلِّي مَا عَنْدُوشْ، ولِّي عَنْدُو مَاكْلَة يَعْمِلْ نَفْسْ الشَّيْ».

¹² وجَاوِهْ زَادَا جْمَاعَة مَكَّاسَة بَاشْ يِتْعَمْدُوا وسِأْلُوهْ: «يَا مُعَلِّمْ، وأَحْنَا آشْ نَعْمْلُوا؟».

¹³ يَاخِي قَالِلْهُمْ: «مَا تَاخْذُوشْ أَكْثِرْ مِلِّي لَازِمْ تَاخْذُوهْ».

¹⁴ وسِأْلُوهْ جْمَاعَة مِالعَسْكِرْ: «وأَحْنَا، آشْ نَعْمْلُوا؟». جَاوِبْهُمْ: «مَا تَاخْذُوا فْلُوسْ حَتَّى حَدْ بِالقُوَّة، ومَا تِتْبَلَّاوْ عْلَى حَتَّى حَدْ، واسْتَكْفَاوْ بِشْهَارِيكُمْ».

¹⁵ والنَّاسْ كَانُوا يِسْتَنَّاوْ فِي المَسِيحْ، والكُلْ كَانُوا يِسْأْلُوا فِي رْوَاحْهُمْ عْلَى يُوحَنَّا: «زَعْمَة هُوَّ المَسِيحْ؟».

¹⁶ يَاخِي جَاوِبْ يُوحَنَّا وقَالْ لِلنَّاسْ الكُلْ: «آنَا نْعَمِّدْكُمْ بِالمَاء، آمَا بِشْ يْجِي الِّي هُوَّ أَعْظَمْ مِنِّي، وآنَا مَا نِسْتَاهِلْشْ نْكُونْ الخْدِيمْ الِّي يْحِلُّو رْبَايِطْ صَنْدَالُو، هُوَّ بِشْ يْعَمِّدْكُمْ بِالرُّوحْ القُدُسْ والنَّارْ.

¹⁷ ويْهِزْ المَذْرَى فِي يِدُّو ويِفْرِزْ صَابْتُو، يْلِمْ القَمْحْ فِي المَخْزِنْ مْتَاعُو، آمَا التْبِنْ يَحْرْقُو بْنَارْ مَا تِطْفَاشْ».

¹⁸ وكَانْ يُوحَنَّا يَنْصَحْ فِي النَّاسْ إِبَّرْشَة حَاجَاتْ أُخْرِينْ ويْبَشِّرْ فِيهُمْ.

¹⁹ آمَا لَامْ الوَالِي هِيرُودُسْ عْلَى خَاطْرُو عَرِّسْ بْهِيرُودِيَّا مَرْتْ خُوهْ، وعَالحَاجَاتْ الخَايْبَة الِّي عْمَلْهَا الكُلْ.

²⁰ وفُوقْ الشَّرْ الِّي عْمَلُو الكُلْ، زَادْ هِيرُودُسْ حَطْ يُوحَنَّا فِي الحَبْسْ.

مَعْمُودِيِّةْ يَسُوعْ

²¹ وبَعْدْمَا تْعَمْدُوا النَّاسْ الكُلْ، تْعَمِّدْ يَسُوعْ زَادَا. ووَقْتِلِّي كَانْ يَسُوعْ يْصَلِّي، تْحَلِّتْ السْمَاء،

²² وهْبَطْ عْلِيهْ الرُّوحْ القُدُسْ فِي شَكْلْ حْمَامَة، وجَاء صُوتْ مِالسْمَاء يْقُولْ: «إِنْتِ إِبْنِي الِّي نْحِبُّو، وآنَا فَرْحَانْ بِيكْ».

نْسَبْ يَسُوعْ المَسِيحْ

²³ وكِي بْدَا يَسُوعْ خِدْمْتُو كَانْ عُمْرُو قْرِيبْ 30 سْنَة، وكَانْ مَعْرُوفْ الِّي هُوَّ: وِلْدْ يُوسِفْ، وِلْدْ هَالِي،

²⁴ وِلْدْ مَتْثَاتْ، وِلْدْ لَاوِي، وِلْدْ مَلْكِي، وِلْدْ يَنَّا، وِلْدْ يُوسِفْ،

²⁵ وِلْدْ مَتَّاثِيَا، وِلْدْ عَامُوصْ، وِلْدْ نَاحُومْ، وِلْدْ حَسْلِي، وِلْدْ نَجَّايْ،

²⁶ وِلْدْ مَآثْ، وِلْدْ مَتَّاثِيَا، وِلْدْ شِمْعِي، وِلْدْ يُوسِفْ، وِلْدْ يَهُوذَا،

²⁷ وِلْدْ يُوحَنَّا، وِلْدْ رِيسَا، وِلْدْ زَرُبَّابِلْ، وِلْدْ شَأَلْتِئِيلْ، وِلْدْ نِيرِي،

²⁸ وِلْدْ مَلْكِي، وِلْدْ أَدِّي، وِلْدْ قُصَمْ، وِلْدْ أَلْمُودَامْ، وِلْدْ عِيرْ،

²⁹ وِلْدْ يُوسِي، وِلْدْ أَلِيعَازَرْ، وِلْدْ يُورِيمْ، وِلْدْ مَتْثَاتْ، وِلْدْ لَاوِي،

³⁰ وِلْدْ شَمْعُونْ، وِلْدْ يَهُوذَا، وِلْدْ يُوسِفْ، وِلْدْ يُونَانْ، وِلْدْ أَلِيَاقِيمْ،

³¹ وِلْدْ مَلَيَا، وِلْدْ مَيْنَانْ، وِلْدْ مَتَّاثَا، وِلْدْ نَاثَانْ، وِلْدْ دَاوِدْ،

³² وِلْدْ يَسَّى، وِلْدْ عُوبِيدْ، وِلْدْ بُوعَزْ، وِلْدْ سَلْمُونْ، وِلْدْ نَحْشُونْ،

³³ وِلْدْ عَمِّينَادَابْ، وِلْدْ أَرَامْ، وِلْدْ حَصْرُونْ، وِلْدْ فَارِصْ، وِلْدْ يَهُوذَا،

³⁴ وِلْدْ يَعْقُوبْ، وِلْدْ إِسْحَاقْ، وِلْدْ إِبْرَاهِيمْ، وِلْدْ تَارَحْ، وِلْدْ نَاحُورْ،

³⁵ وِلْدْ سَرُوجْ، وِلْدْ رَعُو، وِلْدْ فَالَجْ، وِلْدْ عَابِرْ، وِلْدْ شَالَحْ،

³⁶ وِلْدْ قِينَانْ، وِلْدْ أَرْفَكْشَادْ، وِلْدْ سَامْ، وِلْدْ نُوحْ، وِلْدْ لَامَكْ،

³⁷ وِلْدْ مَتُوشَالَحْ، وِلْدْ أَخْنُوخْ، وِلْدْ يَارِدْ، وِلْدْ مَهْلَلْئِيلْ، وِلْدْ قِينَانْ،

³⁸ وِلْدْ أَنُوشْ، وِلْدْ شِيثْ، وِلْدْ آدَمْ، مِنْ عَنْدْ اللَّهْ.