لُوقَا 16 - العهد الجديد بالدارجة التونسية 2022

مَثَلْ المَسْؤُولْ الِّي مَاهُوشْ أَمِينْ

¹ وزَادْ قَالْ لِتْلَامِذْتُو: «كَانْ فَمَّة رَاجِلْ غْنِيْ عَنْدُو وَاحِدْ مَسْؤُولْ عْلَى رِزْقُو، سْمَعْ بِيهْ قَاعِدْ يْبَذَّرْلُو فِي فْلُوسُو.

² يَاخِي عَيِّطْلُو وقَالُّو: "شْنُوَّة الِّي قَاعِدْ نِسْمَعْ فِيهْ عْلِيكْ؟ أَعْطِي حْسَابْ عَلِّي صْرَفْتُو، عْلَى خَاطِرْ مِاليُومْ مَا عَادِشْ بِشْ تْكُونْ مَسْؤُولْ عْلَى رِزْقِي".

³ يَاخِي قَالْ بِينُو وبِينْ رُوحُو: "سِيدِي بِشْ يْطَرِّدْنِي مِنْ خِدْمْتِي، آشْ بِشْ نَعْمِلْ؟ آنَا مَا عَنْدِيشْ جِهْدْ لِلْفْلَاحَة ونِحْشِمْ بَاشْ نْمِدْ يِدِّي لِلطُّلْبَة.

⁴ عْرَفْتْ آشْ بِشْ نَعْمِلْ، بَاشْ حَتَّى كَانْ نَحَّالِي خِدْمْتِي، النَّاسْ يِقْبْلُونِي فِي دْيَارْهُمْ".

⁵ «واسْتَدْعَى الِّي كَانْ سِيدُو يْسَالْهُمْ وَاحِدْ وَاحِدْ. وسْإِلْ الأُوِّلْ: "قَدَّاشْ سِيدِي يْسَالِكْ؟".

⁶ قَالُّو: "100 بِرْمِيلْ زِيتْ زِيتُونَة". يَاخِي قَالُّو: "شِدْ كِمْبْيَالْتِكْ وأُقْعُدْ فِيسَعْ وإِكْتِبْ 50".

⁷ وقَالْ لْوَاحِدْ آخِرْ: "وإِنْتِ فِي قَدَّاشْ مُسَالْ؟". جَاوْبُو: "100 شْكَارَة قَمْحْ". يَاخِي قَالُّو: "شِدْ كِمْبْيَالْتِكْ وإِكْتِبْ 80".

⁸ «والرَّاجِلْ مْدَحْ المَسْؤُولْ الِّي مَاهُوشْ أَمِينْ عْلَى خَاطْرُو تْصَرِّفْ بِذْكَاء. رَاهُو وْلَادْ العَالِمْ هَاذَا عَنْدْهُمْ حِكْمَة أَكْثِرْ مِنْ وْلَادْ النُّورْ فِي مُعَامْلَاتْهُمْ مْعَ بْعَضْهُمْ.

⁹ وآنَا نْقُولِلْكُمْ: أَعْمْلُوا اصْحَابْ بِمَالْ الدِّنْيَا هَاذِي، بَاشْ نْهَارِةْ الِّي يُوفَى عْلِيكُمْ، يِقْبْلُوكُمْ فِي الدْيَّارْ الأَبَدِيَّة.

¹⁰ الأَمِينْ فِي الأُمُورْ البْسِيطَة، أَمِينْ زَادَا فِي الأُمُورْ الكْبِيرَة. ولِّي مُشْ أَمِينْ فِي الأُمُورْ البْسِيطَة، مُشْ أَمِينْ زَادَا فِي الأُمُورْ الكْبِيرَة.

¹¹ إِذَا مَا تْكُونُوشْ أُمَنَاءْ عَالْمَالْ البَاطِلْ، شْكُونْ بِشْ يْأَمِّنْكُمْ عْلَى مَالْ الحَقْ؟

¹² وإِذَا مَا تْكُونُوشْ أُمَنَاءْ عْلَى حَاجِةْ غِيرْكُمْ، شْكُونْ بِشْ يَعْطِيكُمْ حَاجِتْكُمْ؟

¹³ حَتَّى خْدِيمْ مَا يْنَجِّمْ يِخْدِمْ زُوزْ أَسْيَادْ، عْلَى خَاطِرْ يَا إِمَّا بِشْ يِكْرَهْ وَاحِدْ ويْحِبْ الآخِرْ، وَلَّا بِشْ يْتَبَّعْ وَاحِدْ ويَحْقِرْ الآخِرْ. مَا تْنَجْمُوشْ تِخْدْمُوا اللَّهْ والفْلُوسْ مْعَ بْعَضْهُمْ».

الشَّرِيعَة ومَمْلَكْةْ اللَّهْ

¹⁴ والفِرِّيسِيِّينْ كَانُوا يِسْمْعُوا فِي هَاذَا الكُلْ ويِتْمَسْخْرُوا عْلِيهْ، عْلَى خَاطِرْهُمْ كَانُوا يْحِبُّوا الفْلُوسْ.

¹⁵ يَاخِي قَالِلْهُمْ يَسُوعْ: «تْحِبُّوا تُظْهْرُوا الِّي إِنْتُومَا صَالْحِينْ قُدَّامْ النَّاسْ، آمَا اللَّهْ يَعْرِفْ قْلُوبْكُمْ. رَاهُو الِّي يَعْتَبْرُوهْ النَّاسْ عْظِيمْ، هُوَّ مَكْرُوهْ عَنْدْ اللَّهْ.

¹⁶ «الشَّرِيعَة وكْتُبْ الأَنْبِيَاءْ بْقَاوْ لِينْ جَاء يُوحَنَّا. وبَعْدْهَا بْدَاتْ البْشَارَة بْمَمْلَكْةْ اللَّهْ، وكُلْ وَاحِدْ يَشْقَى بَاشْ يُدْخْلِلْهَا.

¹⁷ آمَا رَاهُو أَسْهِلْ إِنُّو السْمَاء والأَرْضْ يِتْنَحَّاوْ مِنْ إِنُّو حَرْفْ وَاحِدْ مِالشَّرِيعَة يْطِيحْ».

¹⁸ «الِّي يْطَلَّقْ مَرْتُو، ويْعَرِّسْ بِمْرَا أُخْرَى يَزْنَى، ولِّي يْعَرِّسْ بِمْرَا مْطَلْقَة يَزْنَى.

الغْنِيْ ولِعَازِرْ

¹⁹ «كَانْ فَمَّة رَاجِلْ غْنِيْ، يِلْبِسْ الغَالِي والمِذْخِمْ، وكُلْ يُومْ عَايِشْ فِي نَعِيمْ.

²⁰ وكَانْ فَمَّة رَاجِلْ مِسْكِينْ إِسْمُو لِعَازِرْ، مَحْطُوطْ قُدَّامْ بَابْ دَارُو، وبَدْنُو لْكُلُّو دِمَّالْ.

²¹ وكَانْ يِتْشَهَّى إِنُّو يِشْبَعْ مِالفِتْفَاتْ الطَّايَحْ مِنْ طَاوِلْةْ الغْنِيْ، وزِيدْ عْلَى هَاذَا حَتَّى الكْلَابْ كَانِتْ تْجِي وتَلْحِسْ الدِّمَّالْ مْتَاعُو.

²² «ومَاتْ المِسْكِينْ وهَزِّتُّو المْلَايْكَة بَحْذَا إِبْرَاهِيمْ، والغْنِيْ زَادَا مَاتْ وتِدْفِنْ.

²³ وهُوَّ قَاعِدْ يِتْعَذَّبْ فِي الهَاوْيَة، هَزْ الغْنِيْ عِينِيهْ، يَاخِي شَافْ إِبْرَاهِيمْ مِنْ بْعِيدْ ولِعَازِرْ بَحْذَاهْ.

²⁴ يَاخِي عَيِّطْ: "يَا بَابَا إِبْرَاهِيمْ! أَرْحَمْنِي، وأَبْعَثْلِي لِعَازِرْ خَلِّيهْ يْغَطِّسْ طَرْتُوشِةْ صُبْعُو فِي المَاء ويْبَرِّدْلِي لْسَانِي، رَانِي مِتْعَذَّبْ فِي هَا النَّارْ".

²⁵ آمَا إِبْرَاهِيمْ جَاوْبُو: "يَا وِلْدِي اتْذَكِّرْ الِّي إِنْتِ خْذِيتْ بَايِكْ فِي الدِّنْيَا مِالخِيرَاتْ ولِعَازِرْ خْذَا بَايُو مِالبْلَاوَاتْ، آمَا تَوَّا هُوَّ قَاعِدْ يِتْعَزَّى هْنَا، وإِنْتِ تِتْعَذَّبْ.

²⁶ وفُوقْ هَاذَا الكُلْ، بِينَاتْنَا هَفْهُوفْ كْبِيرْ، مَا يْنَجِّمْ حَدْ يِتْعَدَّاهْ، لَا مِنْ عَنْدْنَا لْعَنْدْكُمْ ولَا مِنْ عَنْدْكُمْ لْعَنْدْنَا".

²⁷ يَاخِي قَالُّو الغْنِيْ: "مَالَا نِتْرَجَّاكْ يَا بَابَا إِبْرَاهِيمْ بَاشْ تَبْعَثُو لْدَارْ بَابَا،

²⁸ بَاشْ يْنَبَّهْ خْوَاتِي الخَمْسَة، ومَا تْرَصِّيلْهُمْشْ هُومَا زَادَا فِي بْلَاصَة العْذَابْ هَاذِي".

²⁹ آمَا إِبْرَاهِيمْ قَالُّو: "عَنْدْهُمْ كْتُبْ مُوسَى والأَنْبِيَاءْ! خَلِّي يَعْمْلُوا بِلِّي فِيهُمْ".

³⁰ جَاوْبُو: "لَا يَا بَابَا إِبْرَاهِيمْ، آمَا إِذَا كَانْ وَاحِدْ مِنْ بِينْ المُوتَى مْشَالْهُمْ تَوْ يْتُوبُوا".

³¹ قَالُّو إِبْرَاهِيمْ: "إِذَا كَانْ مَا سَمْعُوشْ كْلَامْ مُوسَى والأَنْبِيَاءْ، مُشْ بِشْ يِقْتَنْعُوا حَتَّى لَوْ كَانْ قَامْ وَاحِدْ مِنْ بِينْ المُوتَى!"».