لُوقَا 11 - العهد الجديد بالدارجة التونسية 2022

يَسُوعْ يْعَلِّمْ تْلَامِذْتُو كِيفَاشْ يْصَلِّيوْ

¹ نْهَارْ، كَانْ يَسُوعْ يْصَلِّي فِي بْلَاصَة مِالبْلَايِصْ، وكِي كَمِّلْ، قَالُّو وَاحِدْ مِنْ تْلَامِذْتُو: «يَا سِيدِي، عَلِّمْنَا كِيفَاشْ نْصَلِّيوْ، كِيمَا عَلِّمْ يُوحَنَّا تْلَامِذْتُو».

² قَالِلْهُمْ يَسُوعْ: «وَقْتِلِّي تْصَلِّيوْ قُولُوا: يَا بُونَا الِّي فِي السْمَاء، خَلِّي إِسْمِكْ يِتْقَدِّسْ، خَلِّي مَمْلَكْتِكْ تْجِي، خَلِّي قَصْدِكْ يْصِيرْ عَالأَرْضْ كِيمَا صَايِرْ فِي السْمَاء.

³ أَعْطِينَا كُلْ يُومْ الخُبْزْ الِّي يْكَفِّينَا.

⁴ إِغْفْرِلْنَا ذْنُوبْنَا، عْلَى خَاطِرْ أَحْنَا نِغْفْرُوا لِلِّي يُغْلْطُوا فِي حَقْنَا. ومَا ادَّخَّلْنَاشْ فِي تَجْرْبَة، آمَا نَجِّينَا مِالشِّرِيرْ».

⁵ ومْبَعِّدْ زَادْ قَالِلْهُمْ: «شْكُونْ فِيكُمْ عَنْدُو صَاحْبُو، ويِمْشِيلُو فِي نُصْ اللِّيلْ ويْقُلُّو: "يَا صَاحْبِي سَلَّفْنِي ثْلَاثَة خُبْزَاتْ،

⁶ عْلَى خَاطِرْ عَنْدِي صَاحْبِي جَاء مِالسْفَرْ، وآنَا مَا لْقِيتْ مَا نَعْطِيهْ".

⁷ آمَا صَاحْبُو يْجَاوْبُو مِنْ دَاخِلْ: "مَا تْقَلَّقْنِيشْ! البَابْ مْسَكِّرْ، ووْلَادِي رَاقْدِينْ بْجَنْبِي. مَا انَّجَّمْشْ نْقُومْ ونَعْطِيكْ".

⁸ نْقُولِلْكُمْ: إِذَا كَانْ مَا يْقُومِشْ ويَعْطِيهْ عْلَى خَاطْرُو صَاحْبُو، رَاهُو بِشْ يْقُومْ ويَعْطِيهْ الِّي حَاشْتُو بِيهْ الكُلْ، عْلَى خَاطْرُو شَدْ صْحِيحْ ومَا حْشِمْشْ.

⁹ «هَاذَاكَا عْلَاشْ آنَا نْقُلْكُمْ: أُطْلْبُوا تَاخْذُوا، أَسْعَاوْ تَلْقَاوْ، دُقُّوا البَابْ يِتْحَلِّلْكُمْ.

¹⁰ عْلَى خَاطِرْ الِّي يُطْلُبْ يَاخِذْ، ولِّي يَسْعَى يَلْقَى، ولِّي يْدُقْ البَابْ يِتْحَلُّو.

¹¹ شْكُونْ البُو الِّي فِيكُمْ كِي يْجِيهْ وِلْدُو ويُطْلُبْ مِنْ عَنْدُو خُبْزَة، يَعْطِيهْ حَجْرَة؟ وَلَّا يُطْلُبْ مِنْ عَنْدُو حُوتَة، يَعْطِيهْ فِي عُوضْهَا حْنَشْ؟

¹² وَلَّا يُطْلُبْ مِنْ عَنْدُو عَضْمَة، يَعْطِيهْ عَقْرِبْ؟

¹³ إِذَا كَانْ إِنْتُومَا الأَشْرَارْ تَعْرْفُوا تَعْطِيوْ حَاجَاتْ بَاهْيَة لَوْلَادْكُمْ، مُشْ بِالأَوْلَى بُوكُمْ الِّي فِي السْمَاء يَعْطِي الرُّوحْ القُدُسْ لِلِّي يُطْلْبُوهْ؟».

قُوِّةْ اللَّهْ مُشْ بَعْلَزَبُولْ

¹⁴ وفِي مَرَّة، كَانْ يَسُوعْ يْخَرِّجْ فِي شِيطَانْ مِنْ رَاجِلْ، والشِّيطَانْ هَاذَاكَا كَانْ مْخَلِّيهْ بَكُّوشْ، وكِي خْرَجْ، الرَّاجِلْ رْجَعْ يِتْكَلِّمْ، والنَّاسْ تْعَجْبُوا.

¹⁵ آمَا فَمَّة شْكُونْ مِنْهُمْ قَالْ: «هَاذَا يْخَرِّجْ فِي الشْوَاطِنْ ابَّعْلَزَبُولْ رَئِيسْ الشْوَاطِنْ».

¹⁶ ونَاسْ أُخْرِينْ طَلْبُوا مِنُّو مُعْجْزَة مِالسْمَاء، بَاشْ يْجَرْبُوهْ.

¹⁷ وعْرَفْ يَسُوعْ أَفْكَارْهُمْ، وقَالِلْهُمْ: «كُلْ مَمْلْكَة تِتْقْسِمْ ضِدْ رُوحْهَا تِخْرِبْ، وكُلْ عَايْلَة تِتْقْسِمْ ضِدْ رُوحْهَا تِدَّمِّرْ.

¹⁸ إِذَا كَانْ إِبْلِيسْ زَادَا يِتْقْسِمْ عْلَى رُوحُو، مَالَا كِيفَاشْ مَمْلَكْتُو تِبْقَى ثَابْتَة؟ عْلَى خَاطِرْكُمْ تْقُولُوا الِّي آنَا نْخَرِّجْ فِي الشْوَاطِنْ ابَّعْلَزَبُولْ.

¹⁹ إِذَا كَانْ آنَا نْخَرِّجْ فِي الشْوَاطِنْ ابَّعْلَزَبُولْ، مَالَا الِّي يْتَبْعُوا فِيكُمْ بِشْكُونْ يْخَرْجُوا فِيهُمْ؟ هَاذَاكَا عْلَاشْ هُومَا الِّي بِشْ يُحْكْمُوا عْلِيكُمْ.

²⁰ آمَا كَانْ آنَا نْخَرِّجْ فِي الشْوَاطِنْ بْقُوِّةْ اللَّهْ، مَالَا أَعْرْفُوا إِنُّو مَمْلَكْةْ اللَّهْ جَاتْ حَتَّى لْعَنْدْكُمْ.

²¹ «وَقْتِلِّي الرَّاجِلْ القْوِيْ والمْسَلَّحْ يْعِسْ عْلَى دَارُو، الحَاجَاتْ الِّي فِيهَا بِشْ تْكُونْ فِي الحِفِظْ والأَمَانْ.

²² آمَا كَانْ يِهْجِمْ عْلِيهْ وَاحِدْ أَقْوَى مِنُّو ويِغْلْبُو، يْفُكْلُو سْلَاحُو الِّي مْعَمِّلْ عْلِيهْ، يِسْلْبُو ويْفَرَّقْ المَسْلُوبْ.

²³ الِّي مُشْ مْعَايَا رَاهُو ضِدِّي، ولِّي مَا يَجْمَعْشْ مْعَايَا رَاهُو يْفَرِّتْ.

²⁴ «وَقْتِلِّي الرُّوحْ الشِّرِيرْ يُخْرُجْ مِنْ إِنْسَانْ، يِبْدَا يْدُورْ فِي الخْلَاء يْلَوِّجْ عَالرَّاحَة، وكِي مَا يَلْقَاهَاشْ يْقُولْ: "نِرْجَعْ لْدَارِي الِّي خْرَجْتْ مِنْهَا".

²⁵ وكِي يِرْجَعْ يَلْقَاهَا مَكْنُوسَة ومْنَظْمَة.

²⁶ يْوَلِّي يِمْشِي ويْجِيبْ مْعَاهْ سَبْعَة أَرْوَاحْ أُخْرِينْ أَشَرْ مِنُّو، ويُدْخْلُوا ويُسْكْنُوا غَادِيكَا، وتْوَلِّي حَالِةْ الإِنْسَانْ هَاذَاكَا أَخْيِبْ مِلِّي كَانْ عْلِيهَا قْبَلْ».

²⁷ وهُوَّ يِتْكَلِّمْ، عَلَّاتْ مْرَا صُوتْهَا فِي وِسْطْ النَّاسْ وقَالِتْ: «صَحَّة لِلْأُمْ الِّي جَابِتِّكْ ورَضْعِتِّكْ».

²⁸ آمَا هُوَّ قَالْ: «صَحَّة لِلِّي يِسْمْعُوا كِلْمِةْ اللَّهْ ويْطَبْقُوهَا».

مُعْجِزْةْ النَّبِيْ يُونَانْ

²⁹ كِي بْدَاتْ الدِّنْيَا تِتْعَبَّى بِالنَّاسْ قَالْ: «الجِيلْ هَاذَا جِيلْ فَاسِدْ، يْحِبْ عْلَى مُعْجْزَة، ومَا بِشْ تِتْعْطَالُو كَانْ مُعْجِزْةْ النَّبِيْ يُونَانْ.

³⁰ وكِيمَا كَانْ يُونَانْ عَلَامَة لْأَهْلْ مْدِينِةْ نِينَوَى، إِبْنْ الإِنْسَانْ زَادَا بِشْ يْكُونْ عَلَامَة لِلْجِيلْ هَاذَا.

³¹ ومَلِكِةْ الجَنُوبْ بِشْ تَاقِفْ نْهَارْ الحْسَابْ مْعَ الجِيلْ هَاذَا وتُحْكُمْ عْلِيهْ، عْلَى خَاطِرْهَا جَاتْ مِنْ آخِرْ الدِّنْيَا بَاشْ تِسْمَعْ حِكْمِةْ سُلَيْمَانْ، وهَاوْ فَمَّة شْكُونْ هْنَا أَعْظِمْ مِنْ سُلَيْمَانْ.

³² وأَهْلْ مْدِينِةْ نِينَوَى بِشْ يَاقْفُوا نْهَارْ الحْسَابْ مْعَ الجِيلْ هَاذَا ويُحْكْمُوا عْلِيهْ، عْلَى خَاطِرْهُمْ تَابُوا وَقْتِلِّي نَبَّهُّمْ يُونَانْ، وهَاوْ فَمَّة شْكُونْ هْنَا أَعْظِمْ مِنْ يُونَانْ.

العِينْ هِيَّ فْنَارْ البْدَنْ

³³ «مَا فَمَّاشْ وَاحِدْ يْشَعِّلْ فْنَارْ ويْخَبِّيهْ وَلَّا يْغُمُّو بْطَاسَة، آمَا يْحُطُّو فِي بْلَاصَة عَالْيَة بَاشْ الِّي يْجِي دَاخِلْ يْشُوفْ الضَّوْء.

³⁴ العِينْ هِيَّ فْنَارْ البْدَنْ. كَانْ عِينِكْ لَابَاسْ عْلِيهَا، بَدْنِكْ الكُلْ بِشْ يْكُونْ مْنَوِّرْ. آمَا إِذَا كَانْ عِينِكْ شِرِّيرَة، بَدْنِكْ الكُلْ بِشْ يْكُونْ مْظَلِّمْ.

³⁵ مَالَا رُدْ بَالِكْ لَا يْكُونْ النُّورْ الِّي فِيكْ ظْلَامْ.

³⁶ إِذَا كَانْ بَدْنِكْ الكُلْ مْنَوِّرْ ومَا فِيهْ حَتَّى بْلَاصَة ظْلَامْ، رَاهُو بِشْ يْكُونْ مْنَوِّرْ بْكُلُّو كَايِنُو فْنَارْ ضْوَى عْلِيكْ».

يَسُوعْ يْوَبَّخْ الفِرِّيسِيِّينْ وعُلَمَاءْ الشَّرِيعَة

³⁷ ووَقْتِلِّي يَسُوعْ كَانْ يِتْكَلِّمْ، اسْتَدْعَاهْ وَاحِدْ مِالفِرِّيسِيِّينْ بَاشْ يُفْطُرْ عَنْدُو. يَاخِي دْخَلْ لْدَارُو واتَّكَّى بَاشْ يَاكِلْ.

³⁸ وتْعَجِّبْ الفِرِّيسِي كِي شَافْ الِّي يَسُوعْ مَا غْسَلْشْ يْدِيهْ قْبَلْ الفْطُورْ.

³⁹ يَاخِي الرَّبْ يَسُوعْ قَالُّو: «إِنْتُومَا الفِرِّيسِيِّينْ تَغْسْلُوا الكَاسْ والصْحَنْ مِنْ بَرَّة، آمَا مِنْ دَاخِلْ إِنْتُومَا مِلْيَانِينْ بِالطْمَعْ والخُبْثْ.

⁴⁰ يَلِّي مَا تِفْهْمُوشْ، يَاخِي الِّي صْنَعْ البَرَّانِي، مُشْ هُوَّ بِيدُو الِّي صْنَعْ الدَّخْلَانِي زَادَا؟

⁴¹ آمَا أَعْطِيوْ صَدْقَة مِلِّي عَنْدْكُمْ، وهَكَّا يْوَلِّي كُلْ شَيْ طَاهِرْ لِيكُمْ.

⁴² آمَا يَا وِيلْكُمْ يَا فِرِّيسِيِّينْ، عْلَى خَاطِرْكُمْ تَعْطِيوْ فِي العْشُرْ مْتَاعْ النَّعْنَاعْ والفِيجِلْ وبْقِيِّتْ الحْشَايِشْ، آمَا مْهَمْلِينْ الحَقْ ومْحَبِّةْ اللَّهْ. كَانْ لَازِمْ تَعْمْلُوا هَاذَا مِنْ غِيرْ مَا تْهَمْلُوا الآخِرْ.

⁴³ يَا وِيلْكُمْ يَا فِرِّيسِيِّينْ! عْلَى خَاطِرْكُمْ تْحِبُّوا تُقْعْدُوا فِي البْلَاصَة الأُولَى فِي المْعَابِدْ، وتْحِبُّوا النَّاسْ تْجِي تْسَلِّمْ عْلِيكُمْ فِي الشْوَارَعْ.

⁴⁴ يَا وِيلْكُمْ، عْلَى خَاطِرْكُمْ تْشَبْهُوا لِلْقْبُورَاتْ الِّي مَا تِتْشَافِشْ ومَا عْلِيهَا حَتَّى أَمَارَة، الِّي يِمْشِيوْ فُوقْهَا النَّاسْ مِنْ غِيرْ مَا يَعْرْفُوا الِّي هِيَّ تَحْتْهُمْ».

⁴⁵ وتْكَلِّمْ وَاحِدْ مِنْ عُلَمَاءْ الشَّرِيعَة وقَالُّو: «يَا مُعَلِّمْ، كِي تْقُولْ هَكَّا رَاكْ قَاعِدْ تْسِبْ فِينَا أَحْنَا زَادَا!».

⁴⁶ يَاخِي قَالْ: «يَا وِيلْكُمْ إِنْتُومَا زَادَا يَا عُلَمَاءْ الشَّرِيعَة، عْلَى خَاطِرْكُمْ تْحُطُّوا فِي الأَحْمَالْ الثْقِيلَة عْلَى كْتَافْ النَّاسْ، وإِنْتُومَا مَا تْحِبُّوشْ تْمِسُّوهَا حَتَّى بِصْبُعْ.

⁴⁷ يَا وِيلْكُمْ، تِبْنِيوْ فِي قْبُورَاتْ الأَنْبِيَاءْ وجْدُودْكُمْ هُومَا الِّي قَتْلُوهُمْ.

⁴⁸ إِنْتُومَا مَالَا شَاهْدِينْ ومْوَافْقِينْ عَلِّي عَمْلُوهْ جْدُودْكُمْ. هُومَا قَتْلُوا الأَنْبِيَاءْ وإِنْتُومَا تِبْنِيوْ قْبُورَاتْهُمْ.

⁴⁹ هَاذَاكَا عْلَاشْ حِكْمِةْ اللَّهْ قَالِتْ: بِشْ نَبَعْثِلْهُمْ أَنْبِيَاءْ ورُسُلْ، مِنْهُمْ الِّي يُقْتْلُوهُمْ، ومِنْهُمْ الِّي يِضْطَهْدُوهُمْ.

⁵⁰ هَاذَاكَا عْلَاشْ نْحَاسِبْ الجِيلْ هَاذَا عْلَى دَمْ الأَنْبِيَاءْ الكُلْ الِّي سَالْ مِلِّي تْخَلْقِتْ الدِّنْيَا،

⁵¹ مِنْ دَمْ هَابِيلْ لْدَمْ زَكَرِيَّا الِّي تِقْتَلْ بِينْ المَذْبَحْ والقُدْسْ الِّي فِي الهَيْكِلْ! إِيْ نْعَمْ، نْأَكْدِلْكُمْ الِّي الدَّمْ هَاذَا الكُلْ بِشْ يِتْحَاسِبْ عْلِيهْ الجِيلْ هَاذَا.

⁵² يَا وِيلْكُمْ يَا عُلَمَاءْ الشَّرِيعَة! إِسْتَوْلِيتُوا عْلَى مِفْتَاحْ المَعْرْفَة، آمَا لَا دْخَلْتُوا إِنْتُومَا ولَا خَلِّيتُوا شْكُونْ يُدْخُلْ».

⁵³ ووَقْتِلِّي خْرَجْ يَسُوعْ مِنْ غَادِي، بْدَاوْ عُلَمَاءْ الشَّرِيعَة والفِرِّيسِيِّينْ يِنْقْمُوا عْلِيهْ، ويِسْتَنْطْقُوا فِيهْ فِي بَرْشَة أُمُورْ،

⁵⁴ ويْعِسُّوا فَمَّاشْ مَا يِزْلِقْ بْكِلْمَة يْشِدُّوهَا عْلِيهْ.